Ruum 5

Kopuwarong lobuw om Kinoringan

1Pagka nopoimaid toko so si Tuhan Yisus Kristus, kopuwarong toko sono so Kinoringan, nu soko dai insan kikoraayan, om kopusulut toko so Iyo nu kinopotoyan ni Yisus gumanti' so toko. 2Pagka poimaid toko so si Yisus Kristus, niintolang sono nu Kinoringan koworongan Niyo so toko, om sobana ko osudu'an om umarap toko nu orumaton toko maid so Iyo ong wagu. 3Om osudu'an toko pudi kikoogutan nu ono sono tu, so' oilaan toko nu kotaan toko sono mongirasa nu koogutan oono. 4Om bang kotaan toko, osanang-o sono Kinoringan. Om bang osanang inawo Niyo nu kogoyaan toko, kiorapan toko nu kotorima' nu koworongan Niyo ong wagu. 5Oilaan toko nu ourug ono, so' Atod nitaak Niyo so toko no yo su pointolang nu sobana ko osamod Iyo so toko.

6Oilaan toko nu sinomodan toko nu Kinoringan, so' laid nu dai toko po nokolabus kiat so koraayan, ginonti'an toko ni Kristus matoi, iya nu notantu yo nu Kinoringan. 7Orogon sobana gumanti' matoi pudi so lobuw ooluk gogoma'on, nga kuwai ya gaam lobuw kooku' gumanti' matoi so lobuw sobana ko owarong. 8Nga ong Kinoringan, nopointolang Iyo nu sobana ko osamod Iyo so toko, so' pinosimaidan Niyo nu pinatoi si Yisus gumanti' so toko nu kakal toko po kikoraayan. 9Pagka bana ya nu iri yo kinopotoyan ni Yisus su kopuworongan toko so Kinoringan, oilaan toko po nu osopulan toko kiat so ponginsaadan Niyo ong wagu. 10Bang laid nu alod-alod toko po nu Kinoringan, pinopuwarong toko so Iyo nu kinopotoyan ni Kristus, makin-o po nga sopulan toko ya nu kinoluli'an ni Kristus, so' nokopuwarong toko yo so Kinoringan nu kosiono tu. 11Om okon ko ontob-a nu ono, nga osudu'an toko po nu koworongan Niyo so toko, iri niintolang Niyo nu pinonuu'an Niyo so si Tuhan Yisus Kristus, popuwarong so toko om Iyo.

Si Adam om si Kristus

12Pagka una'-una' toko yo nu Kinoringan, koorati toko sono nu kuwai kopuinongan nu aki rumpungan toko si Adam, om si Yisus Kristus, Tuhan toko. Ono yo, si Adam-o su inungkiaton nu koraayan so wonuo tu, om kikopotoyan sono, om linumongkop kopotoyan-o so wonuo tu, sampai kiawi' lobuw kikoraayan sono.#Pgn 3:6 13Dai po nokoponaak Kinoringan nu Ukum ni Musa nu gulu ri, oraai sobana kogoyaan nu lobuw. Nga pagka d'ado po pomogosan nu Kinoringan, dai po tokodon Niyo nu insaadan nosiro suat so koraayan nosiro. 14Nga soko ono pona, kiat-o so iya ni Adam, iri dai minongowaid nu pomogosan nu Kinoringan, sampai so iya yo pinotaakan ni Musa nu Ukum nu Kinoringan, otatap-o nu opatoi kiawi' lobuw. Pudi pona dai nokowaal lobuw wokon nu koraayan soko winaal ni Adam, iri dai minongowaid nu pomogosan nu Kinoringan, nga kowaid-a matoi.

Nourug soko ono so' gogoma'on ni Adam iiri suat-a so toko kiawi', soko goma'on ni Kristus nga suat-a so toko kiawi'. 15Nga dai muinong bana nosiro. Soko itu kopusondiangan nosiro, ono yo kiat so kosola'an nu ido yo koyuwan, ono yo si Adam, matoi sono kiawi' lobuw. Nga kiat so koworongan nu Kinoringan, om koworongan nu ido yo koyuwan, ono yo si Yisus Kristus, taakan sono nu Kinoringan nu koworongan osuang lobuw om kopuwarong sono so Iyo. 16Om gogoma'on ni Yisus popuwarong so toko so Kinoringan okon ko soko kosola'an ni Adam, so' koompusan nu kosola'an ni Adam, kiawi' lobuw nga ukumon nu potoyon. Nga iya nu osuang koraayan nu lobuw, nopointolang Kinoringan nu koworongan Niyo, su' kopuwarong toko so Iyo soko dai insan toko sono kikoraayan. 17Indadi koompusan nu koraayan nu ido yo si Adam, matoi kiawi' lobuw so wonuo tu. Nga sobana ko maayo gogoma'on nu ido koyuwan, ono yo si Yisus Kristus, om isai yo po monorima' nu koworongan oono, kopuwarong sono so Kinoringan om taakan nu kowiawan musingkolaid, om orumaton maid so Iyo ong wagu.

18Soko ono po, oilaan toko nu koompusan nu ido yo kosola'an ni Adam, ukumon kiawi' lobuw, nga koompusan nu gogoma'on obana nu ido yo koyuwan, ono yo si Kristus nu olila' matoi, isai yo po poimaid, kopuwarong sono iyo so Kinoringan om taakan Niyo nosiro nu kowiawan musingkolaid. 19Koompusan nu kosola'an nu ido yo koyuwan, ono yo si Adam, kiawi' lobuw nga kikoraayan. Nga koompusan nu gogoma'on nu ido yo koyuwan, ono yo si Yisus Kristus iri minongowaid nu kiawi' koinginan nu Kinoringan, osuang sono lobuw kopuwarong so Kinoringan.

20Minonaak Kinoringan nu Ukum tayon Niyo ong kointolang kiawi' koraayan nu lobuw, nga makin nosiro mongowaid nu Ukum oono, makin po kointolang nu osuang koraayan nosiro. Nga makin po sono rumuang koworongan Niyo. 21Indadi, dai toko kopongowaid nu kiawi' ponuu'an nu Ukum ni Musa, om matoi toko sono. Nga pagka osamod Kinoringan so toko, nopointolang Iyo nu koworongan Niyo tayon Niyo ong kopuwarong toko so Iyo, om taakan toko nu kowiawan musingkolaid kiat dii si Yisus Kristus, Tuhan toko.

Currently Selected:

Ruum 5: TomPWPgLgPn

Highlight

Copy