Ruum 4

Minsuw nu koimaidan ni Abraham

1Indadi, owarong momikir toko suat so nololagan ni Abraham, aki rumpungan toko lobuw Yaudi. 2Bang iri yo koowarong nu gogoma'on ni Abraham su kopuworongan nu Kinoringan so iyo, kuwai pounayan niyo mongondos so tiningkuangon nu lobuw, nga d'ado ya pounayan niyo mongondos so tiningkuangon nu Kinoringan. 3Nokosurat-o so Buuk nu Kinoringan nu, “Nopoimaid si Abraham nu Kinoringan om kiat nu ono kopuwarong sono iyo so Kinoringan,” koo ri.#Pgn 15:6; Gal 3:6 4Bang gojian lobuw suat so gogoma'on niyo, dai tokodon nu lobuw nu soko tutungkap gaji niyo oono so' musuat nu ginama' niyo. 5Nga suat so Kinoringan, dai toko kopuwarong so Iyo ong ontob-a nu mongowaid toko nu ponuu'an Niyo, nga subai poimaid po so si Yisus Kristus. 6Si Raja Daud nga nokoputangar-a suat so kosonangan nu lobuw kopuwarong so Kinoringan nu okon ko ontob-a nu gogoma'on niyo nu,

7“Osanang-o lobuw

inidu' yo koraayan niyo,

om noompunan-o

ongo sala' niyo ri.

8Osanang-o lobuw

dai yo ondomon

nu Kinoringan

koraayan niyo no,”

koo ri.#Lgu 32:1-2

9Indadi kosonangan oono okon ko kai ya lobuw Yaudi nu musunat-o su tinaakan, nga kiawi' ya lobuw pudi okon ko Yaudi, iri dai musunat, so' soko iri yo tinangar ku suat so si Abraham sisuna ri nu, nopoimaid iyo so Kinoringan om koimaidan niyo oono su kopuworongan niyo so Kinoringan.#Pgn 15:6 10Dai po nosunatan si Abraham, nokopuwarong-o iyo so Kinoringan. 11Noopod ono, sinunatan nai' iyo, ponondu'an nu nokopuwarong-o iyo nu Kinoringan nu koimaidan niyo nu dai po nosunatan iyo ri. Indadi nosiliw iyo nu aki rumpungan nu kiawi' lobuw poimaid om torima'on-a nosiro nu Kinoringan nu kopuwarong so Iyo pudi dai osunatan.#Pgn 17:10 12Om aki rumpungan po iyo nu lobuw Yaudi, iri nosunatan-i, nga dai umarap nu kopuwarong nosiro so Kinoringan nu sunat nosiro no, sondiang ko iri koimaidan nosiro so Kinoringan, soko si Abraham su nopoimaid so Kinoringan, nu dai po nosunatan iyo ri.

Koompit nu janji nu Kinoringan

ong poimaid so Iyo

13Minongojanji Kinoringan so si Abraham om solusuk niyo nu nosiro yo su kosongapan nu wonuo tu. Minongojanji Kinoringan soko ono, okon ko iri gama' ni Abraham mongowaid nu Ukum ni Musa, nga iri yo koimaidan niyo ri sampai tinorima' iyo nu Kinoringan nu kopuwarong so Iyo.#Pgn 17:4-6; 22:17-18; Gal 3:29 14Bang toko ya, iri mongowaid nu Ukum su kotorima' nu nijanji nu Kinoringan, d'ado kosudaan nu koimaidan toko om janji Niyo, so' d'ado ido koyuwan kopongowaid nu kiawi' ponuu'an so Ukum ni Musa oono.#Gal 3:18 15Dai toko kopuwarong so Kinoringan ong ontob-a nu mongowaid toko nu Ukum, so' dai kopongowaid toko nu kiawi' Ukum oono, om mungot sono Kinoringan so toko. Bang d'ado ukum, d'ado ya lobuw dai mongowaid nu ukum.

16Indadi, nitaak nu Kinoringan kiawi' nijanji Niyo so lobuw poimaid so Iyo, su' kiat so koworongan Niyo, obana ya nu solusuk toko ni Abraham om kotorima' toko nu nijanji nu Kinoringan. Om okon ko lobuw-a nu Yaudi su kotorima' nu janji oono, nga kiawi' ya lobuw poimaid, so' si Abraham-o su aki rumpungan nu kiawi' lobuw poimaid.#Gal 3:7 17Nokosurat-o tinangar nu Kinoringan so si Abraham nu, “Siniliw Ku yo ikau nu aki rumpungan nu osuang bansa,” koo ri. Soko ono yo janji nu Kinoringan so si Abraham om nopoimaid-a si Abraham so Iyo. Iyo yo su Kinoringan mongoluli' nu lobuw minatoi. Om Iyo yo su Kinoringan, iri mutangar-o po, onu yo po dai insan kuwai, kuwai yo sono.#Pgn 17:5 18Om suat so si Abraham, pudi pona soko dai otuman janji nu Kinoringan so iyo, nga nopoimaid-a iyo nu tinongaran nu Kinoringan nu kianak-a iyo om ourug iyo nu aki nu osuang bansa, so' tinangar iyo nu Kinoringan nu, koosuang nu solusuk niyo soko korombituon.#Pgn 15:5 19Iya oono, otuo yo si Abraham om oilaan niyo nu dai yo iyo kaanak, om si Sara, sawo niyo nga tomonang#4:19: tomonang; intawa: madai po sono.#Pgn 17:17 20Nga dai ya minupiduo inawo niyo, ala' nai' opiot po koimaidan niyo om minongunsopot so Kinoringan nu onu ya waalon Niyo ong wagu. 21Obasag kopongoorapan niyo nu waalon-a nu Kinoringan onu yo po nokojanji yo Niyo. 22Iri yo po totongaron so Buuk nu Kinoringan nu, “pinokowarong iyo nu Kinoringan,” koo ri,#Pgn 15:6

23okon ko suat-a so si Abraham, 24nga suat po so toko, ong poimaid toko so Kinoringan, iri minongoluli' so si Yisus Kristus, Tuhan toko. 25Si Yisus-o su nikomouli' nu matoi mongidu' nu koraayan toko, om linuli'an Iyo, nu popuwarong so toko so Kinoringan.#Yis 53:4-5

Currently Selected:

Ruum 4: TomPWPgLgPn

Highlight

Copy