Ruum 14

Adang-o poinsala' nu lobuw inong koimaidan

1Bang kuwai inong muyu poimaid so si Kristus nu dai po opiot koimaidan, torima'on-a iyo so puimpugan muyu, om adang-o mokimudaawa so iyo suat so onu otoop om dai otoop waalon nu lobuw poimaid so si Kristus. 2Lobuw opiot-o koimaidan-i monokod nu onu yo po kowasa ya okanon niyo. Nga lobuw dai po opiot koimaidan-i, monokod nu koumbusan-a su kuasa okanon niyo. 3Indadi iri lobuw mongokan nu onu-onu ri ya, dai otoop monokod nu owarong po iyo ko' lobuw koumbusan-a okanon-i. Om iri lobuw umbus-a su kona'on-i, adang-o mongoragam nu lobuw mongokan nu onu-onu ri ya, so' kiduo so nosiro torima'on-a nu Kinoringan. 4Dai kowasa toko monginsala' nu gogoma'on nu lobuw wokon, so' ono yo tuan niyo no su otoop monginsala' so iyo. Soko ono ya pudi toko lobuw poimaid. Dai toko otoop monginsala' nu gogoma'on nu inong toko poimaid, so' Kinoringan-o su monginsala' so iyo. Om tantu musuat-a gogoma'on niyo so' tobangon-a iyo nu Kinoringan.

5Kuwai lobuw monokod nu oogot po ido runat ko' runat wokon, om wokon monokod nu kiawi' runat muinong-a. Indadi, kiawi' lobuw subai koorati so inawo niyo no ong onu su obana. 6Iri lobuw monokod nu ido yo runat su oogot, waalon niyo soko ono so' moingin iyo poinsanang nu inawo nu Kinoringan. Iri lobuw mongokan nu onu-onu ri ya, waalon niyo soko ono so' moingin iyo poinsanang nu inawo nu Kinoringan, om mongunsopot-a iyo so Kinoringan nu ookanon niyo oono. Om soko ono ya pudi lobuw umbus-a su okanon, nu waalon niyo soko ono so' moingin iyo poinsanang nu inawo nu Kinoringan, om mongunsopot-a iyo so Kinoringan suat so ookanon niyo oono.#Kul 2:16 7D'ado ido so toko lobuw poimaid, nu okon ko songapan nu Kinoringan pudi tuui-tuui toko po so wonuo tu intawa matoi toko yo. 8Solaid nu miau toko po, kogoyaan toko otoop kopongorumat nu Tuhan, om matoi toko nga koorumat-a nu Tuhan. Indadi, matoi miau toko nga Tuhan-a su mononsongapan so toko. 9So' ono yo tomod ni Kristus musimaid potoyon om noluli'an, tayon ong kopogkuasa Iyo so toko lobuw poimaid, iri miau po intawa minatoi-o. 10Pagka soko ono, dai owarong ong monginsala' toko nu inong toko poimaid nu kogoyaan nosiro, om monokod nu owarong toko po ko' nosiro, so' kiawi' so toko bisora'on-a nu Kinoringan ong wagu.#2 Kur 5:10 11Soko tinangar Niyo nokosurat nu,

“Aku yo su Kinoringan dai matoi.

Pagka obana ono,

kosurukud kiawi' lobuw

mongusaa' so Aku,”

koo ri.#Yis 45:23

12Iya oono, tumingkuang toko kiawi' so Kinoringan, nu mongudio Iyo so toko, om subai potuturan toko so Iyo onu yo po nowaal toko so wonuo tu.

Adang mongowit-owit nu inong muyu momaal nu koraayan

13Pagka soko ono su bisora'on toko ya kiawi' nu Kinoringan, mingkoyod toko yo muiinsala'! Ala' nai' udio toko po laid kogoyaan toko kondiri, kalu ong kikogoyaan kopongowit nu inong toko momaal nu koraayan. 14Pagka nokoido aku so si Tuhan Yisus, oilaan ku nu ado ido ginis nu ookanon nipogos so toko nu Kinoringan. Nga bang momikir lobuw nu nipogos ido ginis nu ookanon, dai owarong ong okanon niyo ono. 15Om bang okanon muyu onu tokodon niyo dai kowasa okanon, osakit sono inawo niyo, om soko dai somodan muyu iyo. Dai su moingin ong kopongoraag nu koimaidan nu lobuw kogoyaan muyu oono, so' si Kristus nga minatoi-a suat so iyo. 16Om bang kuwai kogoyaan tokodon nu ongo lobuw poimaid nu nipogos nu Kinoringan, nga oilaan muyu nu dai ya nipogos, kodi muyu yo ono waalo. 17So' bang mogkuasa Kinoringan nu kowiawan nu lobuw, dai yo sono oogot onu yo po kowasa niyo okanon om inumon. Ono yo su oogot mongowaid lobuw oono nu ponuu'an nu Kinoringan, om kiat nu ono, osanang inawo niyo om osudu'an iyo maid nu ponobangan nu Atod nu Kinoringan. 18Bang mugogoma'on toko suat so si Kristus nu soko ono, poinsanang toko nu inawo nu Kinoringan, om osanang inawo nu lobuw suat so kogoyaan toko oono.

19Ono yo ko' otoop ong mususulut toko nu inong lobuw poimaid om mutotabang popiot nu koimaidan. 20Adang-o usiba'on iri winaal nu Kinoringan so inawo nu lobuw poimaid, nu moingin kou mongokan nu onu tokodon nu lobuw wokon nu dai kowasa okanon. Kowasa toko yo mongokan nu onu yo po, nga bang kopongowit toko nu lobuw wokon momaal nu koraayan nu gogoma'on oono, adang-o okanon ono. 21Owarong po dai mongokan nu onsi intawa monginum nu batol, intawa onu yo po kopongowit nu inong muyu poimaid momaal nu koraayan. 22Om onu yo po pomikiran muyu suat nu ookanon intawa onu yo po, adang-o waalon ono so tiningkuangon nu lobuw wokon nga so tiningkuangon-a nu Kinoringan, so' Iyo yo su mogkuasa so kou. Osanang-o lobuw dai pokosala' nu kondiri, ong goma'on niyo onu yo po owarong kosoromaan niyo no. 23Nga bang kuwai lobuw mupiduo inawo so' dai oilaan niyo ong kowasa ka mongokan nu ono ko' dai, om okanon-a niyo ono, insola'on iyo nu Kinoringan, so' dai mongowaid nu inawo niyo. Bang momaal toko nu onu-onu ya om mupiduo inawo, kikoraayan toko sono.

Currently Selected:

Ruum 14: TomPWPgLgPn

Highlight

Copy