Ruum 15

Insonango muyu yo lobuw wokon,

okon ko kou ya

1Indadi suat so toko nu opiot-o koimaidan, owarong ong tumaan toko, om dai mugogoma'on nu koowit-owit nu inong toko poimaid momaal nu koraayan. Om adang toko yo maid nu koinginan kondiri, 2ala' nai' owarong po poinsanang toko nu inong toko, su' koorati sono iyo nu koinginan nu Kinoringan. 3Suat so si Kristus, dai ya Iyo minomikir nu koinginan Niyo kondiri, nga minomikir Iyo nu koinginan nu Kinoringan, soko iri nokosurat so Buuk nu Kinoringan gulu ri nu, “Iri yo po ponindoraai nosiro so Ikau-i, Aku ya su nosuat,” koo ri. Orati nu ono, bang minaid Iyo nu koinginan Niyo kondiri, dai ya Iyo osindoraai nu lobuw.#Lgu 69:9 4Kiawi' nokosurat so Buuk nu Kinoringan gulu ri montuduk so toko, su' kiorapan toko nu tumanon-a nu Kinoringan janji Niyo ri, om tumaan toko sono so kosonsora'an, om umarap nu koworongan ong wagu. 5Kinoringan-o su montuduk so toko om poinsanang nu inawo toko, om kotaan toko sono nu kosonsora'an. Muda-mudaan ong tobangon kou ya Niyo nu kopuido inowoon muyu minsuw nu kogoyaan ni Yisus Kristus, 6kopuido inawo om totongaron muyu mongorayou nu Kinoringan toko, ono yo Amo ni Tuhan toko Yisus Kristus.

Abar Owarong nituturan so lobuw

okon ko Yaudi

7Ono yo ko', torimaa muyu yo inong lobuw poimaid nu soko kosusulodan muyu sobana, so' tinorima' kou yo ni Kristus. Bang waalon muyu soko ono, royowon sono Kinoringan. 8Bana ya tongaron ku iitu nu, nosiliw-o si Kristus nu soko uripon nu lobuw Yaudi su' kointolang Niyo so nosiro nu tumanon-a nu Kinoringan janji Niyo gulu ri so odu aki nosiro ri. 9Om ido po tomod Niyo sumiliw nu soko uripon, ono yo tayon Niyo ong kiawi' lobuw okon ko Yaudi luluudan-a nu Kinoringan, om royowon sono Iyo nosiro. Soko iri tinangar ni Kristus so Kinoringan-i nu,

“Sobana ko mongunsopot

om mongorayou Aku so Ikau,

om mulagu Aku maid nu lobuw okon ko Yaudi,”

koo ri.#2 Som 22:50; Lgu 18:49 10Om nokosurat-a tinangar nu Kinoringan nu,

“Suat so kou lobuw okon ko Yaudi,

waid kou yo sumudu'an,

so' soko bana lobuw kou nu Yaudi,

iri pinili' Ku nu gulu ri,”

koo ri.#Pom 32:43 11Om nokosurat-a nu,

“Oo su kiawi' lobuw okon ko Yaudi,

royowo muyu yo TUHAN.

Kiawi' lobuw

nga mongorayou so Iyo!”

koo ri.#Lgu 117:1 12Om nokosurat-a tangar ni Yisaya nu,

“Lumoga' ido koyuwan

kiat so solusuk ni Yisai.

Mogkuasa Iyo nu lobuw

okon ko Yaudi,

om Iyo yo su pongoorapan nosiro,”

koo ri.#Yis 11:10

13Kinoringan-o su impuunon nu kiawi' koworongan orapon toko. Muda-mudaan ong pagka poimaid kou so Iyo, taakan kou Niyo nu kosudu'an om kosonangan nu inawo, om maid nu kuasa nu Atod Niyo, sumundur kou sono umarap so Iyo.

Tomod ni Paulus opogi monurat nu itu

14Oo su kosusulodan ku, oilaan ku nu sobana ko owarong kogoyaan muyu. Koorati kou sobana nu tinongaran nu Kinoringan, om kopontuduk kou sono nu ono so lobuw wokon. 15Nga, insan soko ono, pagka Kinoringan-o su minonuu' so aku nu gogoma'on ku iitu, musimpogi aku ya monurat nu itu so kou su' dai lupaanan muyu onu yo po nituduk ku so kou gulu ri. 16Indadi inurug aku Niyo nu uripon ni Yisus Kristus monabang nu lobuw okon ko Yaudi. Soko ido imam ototog mugogoma'on suat so Kinoringan, soko ono ya pudi aku ototog potuturan nu Abar Owarong kiat so Iyo so ongo lobuw okon ko Yaudi. Om nosiro yo po soko ponaak niusaa' ku so Kinoringan poinsanang nu inawo Niyo, om songapan sono Niyo nosiro, so' maid-waid Atod nu Kinoringan so nosiro. 17Indadi pagka kopuido aku so si Yisus Kristus, kopongondos aku ya nu gogoma'on ku suat so Kinoringan-o. 18So' dai su kooku' mutangar nu onu yo po, sondiang ko onu yo po niarap ni Kristus nu nipogama' so aku no, ono yo montuduk nu ongo lobuw okon ko Yaudi nu gama' mongowaid nu tinongaran nu Kinoringan. Totongaron om gogoma'on ku no yo su pontuduk ku so nosiro popongowaid nu tinongaran nu Kinoringan, 19maid nu ponondu'an koiran-iran om kuasa nu Atod nu Kinoringan. Om ono yo su kinoponowan ku lumongkop kiat so Yirusalim lumoga' so wonuo nu Ilirikum, potuturan so nosiro nu Abar Owarong suat so si Kristus. 20Om koinginan ku yo po nga potuturan nu Abar Owarong so ongo tontong dai po insan nokorongou suat so si Kristus, so' dai su moingin potuturan koimbagu so ongo tontong notuturanan-o nu lobuw wokon. 21Soko nokosurat so Buuk nu Kinoringan nu,

“Ongo lobuw dai po insan

notuturanan suat so Iyo

nga kotondu' sono so Iyo,

om ongo lobuw dai po insan

korongou suat so Iyo

nga kotondu' ya nosiro

ong isai Iyo,”

koo ri.#Yis 52:15

Padu-padu ni Paulus mongondaa so Ruum

22Om ono yo koosuang nu gogoma'on ku oono su dai ku kotodirian mongondaa so kou.#Rm 1:13 23Nga kosiono tu, pagka d'ado yo sono tontong ianan ku tuui potuturan nu Abar Owarong, om olaid aku yo mokipopongondaa so kou, 24tinapus ku yo nu mambai nai so kou ong mian aku yo so Sopanyul, om mokiapit aku sono so kou lumombus, ong kaambai aku nai so kou kotinu-tinuan mongidu' nu impong ku so kou. 25Nga kosiono tu mungkayas aku yo so Yirusalim paapit nu siin ponabang nu lobuw poimaid dii. 26Moingin sobana ongo lobuw poimaid so Makadunia om so Akaya monabang nu lobuw poimaid omiskin so Yirusalim.#1 Kur 16:1-4 27Sobana ko moingin nosiro monabang, om ono yo nai' su otoop goma'on nu lobuw okon ko Yaudi, so' lobuw Yaudi yo su inungkiaton nu tinongaran nu Kinoringan, iri nituturan so lobuw okon ko Yaudi. Ono yo ko', otoop ong paapit nosiro nu siin so lobuw sobana ko omiskin dii so Yirusalim.#1 Kur 9:11 28Indadi bang oopod ku yo ono, mian aku yo sono so wonuo nu Sopanyul, om mambai aku nai so kou. 29Oilaan ku nu, bang kologa' aku yo nai so kou, pokoilo aku sono suat so ponobangan ni Kristus so toko kiat so koworongan Niyo d'ado kaalib.

30Oo su kosusulodan ku, pagka nitaak-o so toko koworongan kiat so Tuhan toko si Yisus Kristus, om pagka notudukan toko yo nu Atod nu Kinoringan nu subai musosamod, mindamo aku so kou nu simpor kou yo so aku mogdu'a so Kinoringan suat so aku, 31su' dai aku okomon nu lobuw dai poimaid dii so Yudia orani so Yirusalim, om pogdu'a kou ya su' osudu'an lobuw poimaid dii so Yirusalim nu siin niapit ku no. 32Oopod ono, bang lila'an aku nu Kinoringan, mian aku nai' nai so kou maid nu osudu' inawo, om oinsonangan muyu sono aku. 33Kinoringan-o su impuunon nu kopusulutan. Muda-mudaan ong maid-waid Iyo so kou kiawi'. Amin.

Currently Selected:

Ruum 15: TomPWPgLgPn

Highlight

Copy