Ruum 13

Kopotutan toko suat so moomogkuasa

1Otoop ong mokikuasa toko nu ongo moomogkuasa so wonuo tu, so' kuasa yo po nosiro oono kiat so Kinoringan. Om kiawi' moomogkuasa nu kosiono tu notantu yo nu Kinoringan. 2Ono yo ko', isai lumawan nu moomogkuasa, koorotian lumawan nosiro nu onu yo po notantu yo nu Kinoringan, om insaadan sono Niyo nosiro. 3Bang owarong kogoyaan toko, dai muru' toko lumaa' nu moomogkuasa so toko no. Musuat ong lumaa' toko so nosiro ong oraai kogoyaan toko. Bang moingin toko nu dai toko lumaa' so nosiro, momaal toko yo nu owarong om royowon toko sono nosiro. 4Moomogkuasa oono mugogoma'on suat so Kinoringan, monaak so kou nu kosonangan. Nga bang oraai gogoma'on muyu, otoop ong lumaa' kou so nosiro so' kikuasa nosiro, insan mongukum nu momatoi nga kopogbaya' ya. Om pagka mugogoma'on nosiro suat so Kinoringan, musuat ong mongukum nosiro nu lobuw mugogoma'on nu oraai-o. 5Ono yo ko', waido muyu yo oturan so wonuo tu, okon ko kiat-a so koirosaanan muyu nu lumaa' insaadan nu Kinoringan, nga oilaan muyu so inawo nu otoop waalon muyu ono.

6Om ono yo ko' mongobarai kou nu sukai so moomogkuasa, so' nosiro ono nga mugogoma'on suat so Kinoringan om ototog nosiro mogkuasa. 7Indadi otoop ong mongobarai kou nu sukai so moomogkuasa nu onu yo po pokiborayan nosiro so kou, om orumaton-o nosiro kiawi'.#Mat 22:21; Mrk 12:17; Luk 20:25

Kopotutan toko so inong lobuw

8Ikod kou yo pongutang nu onu-onu ya so lobuw wokon, nga pusosamod kou yo, so' isai osamod nu lobuw wokon, iyo yo su kopongowaid nu kiawi' ponuu'an nu Ukum ni Musa. 9Soko nokosurat-o so Ukum ni Musa nu, “Adang lumapa', adang momatoi, adang monakou, om adang sumolon,” koo. Kiawi' ponuu'an oono om ponuu'an wokon, nokopuido yo so ido po ponuu'an iitu nu, “Somodi muyu yo inong muyu soko monamod nu kondiri,” koo ri.#Kin 20:13-15,17; Pom 5:17-19,21; Ot 19:18 10Isai monamod nu inong niyo, dai yo sono iyo mongoraai nu lobuw somodan niyo oono. Indadi, iri yo po ponuu'an nu monamod nu inong lobuw nga ono yo su tomod nu kiawi' pinonuu'an nu Ukum ni Musa.

11-12Pusosamod kou yo, so' nokoilo kou yo nu dai yo olaid om kotalib-o kotuongan om oduruk-o onawau nu lumoga' si Yisus Kristus. Nologa' yo kooriosan, ono yo iya nu tumimpuun toko poimaid so si Yisus Kristus, om kosiono oduruk toko yo kikowiawan musingkolaid so surga. Indadi, ingkoyodi toko yo kogoyaan toko oraai, om waido toko yo kowiawan obana so konowawan, soko soujar musabung nu poongingolig nu koyuwan niyo. 13Om sumundur toko yo powarong nu kogoyaan toko soko mintolang so konowawan su' osiou nu lobuw. Adang toko yo mongokan-ngokan d'ado puontoban, om adang toko yo moginowukan, gumilat, monongkowoinoyan, mokimualod, om mokimalun nu wokon. 14Nga, pagka nokopuido toko yo so si Yisus Kristus, Tuhan toko, otoop ong minsuw toko nu kogoyaan Niyo, om adang toko yo momikir nu koinginan oraai.

Currently Selected:

Ruum 13: TomPWPgLgPn

Highlight

Copy