Lukas 17

Gogoma'on koowit nu lobuw momaal nu koraayan

(Mat 18:6-7,21-22; Mrk 9:42)

1Mutongaro yo si Yisus so mompomaid Niyo ri nu, “Kuwai ya nai' gogoma'on koowit nu lobuw momaal nu koraayan, nga aagut-o lobuw kopongurug nu koraayan oono. 2Owarong po korobotuan liou niyo no om itobung so raat, ko' koowit iyo nu lobuw orukung po koimaidan-o momaal nu koraayan. 3Ingato muyu yo! Bang nokopomaal sulod mu nu koraayan, sowoyo yo iyo. Om bang rumorogo iyo, ompuno yo.#Mat 18:15 4Inturu pona iyo momaal nu koraayan so ikau sondunat, om ono ya bulit-buliton niyo lumoga' nai so ikau nu, ‘Rumorogo aku yo,’ koo, ompuno yo iyo,” koo si Yisus.

Pontudukan suat so koimaidan

5Mutongaro yo pinongoorapan-i so si Yisus nu, “Popiot-o po koimaidan mai no,” koo.

6Sumombuto yo si Yisus nu, “Bang kikoimaidan kou, nokuro ong soko linsou-a nu sonsam kaayo, koputangar kou yo so sompuun kayu okutuw nu, ‘Mokat ko yo om kopulo yo so raat,’ koo, tantu mongasip-a puun nu kayu oono so kou,” koo.

Pontudukan suat so muripon so Kinoringan

7Mutongaro yo si Yisus nu, “Bang ido koyuwan so kou kiuripon oliwang momulo so umo intawa mongipat nu pongayam, ong kouli' uripon oono, dai ya paawon niyo uripon oono nu, ‘Tuui ko mongokan,’ koo. 8Ala' nai' mutangar iyo so uripon oono nu, ‘Singkadi aku po nu kookanan. Pusabung po nu owarong om ipati aku po musingkoopod ku mongokan om monginum, om sumulang ko nai',’ koo. 9Uripon oono dai muru' royowon pudi nogama' yo niyo nisuu' nu tuan niyo no, so' ono yo gogoma'on musuat so iyo. 10Soko ono ya pudi kou. Bang ogama' muyu yo onu yo po nisuu' so kou no, putangar kou yo nu, ‘Kai yo po ombo yo nu uripon. Ombo yo po nisuu' so kai, ono yo su goma'on mai,’ koo yo muyu ya,” koo si Yisus.

Minomali' si Yisus nu opulu koyuwan bolangon

11Pinomponowan ni Yisus sundur so Yirusalim, linumalan Iyo so pubaatan nu Samaria om Galilia. 12Laid Niyo manou-panou masuw so ido kampung, sumongkomo yo so Iyo opulu koyuwan binolangon. Minundii nosiro so dirawu' ri, 13om lumuapo yo nu, “Oo Yisus, Tuan, luluudi kai yo!” koo.

14Siowi yo nosiro ni Yisus om mutongaro yo nu, “Ian kou yo so imam, om pokiudio kou,” koo.#Ot 14:1-32

Laid po nosiro manou-panou, nopoli'an-o nosiro. 15Noilaan-o po nu ido koyuwan so nosiro nu nopoli'an-o iyo, mululio yo sono iyo dii si Yisus maid nu gumonsok mongorayou nu Kinoringan. 16Tumungubo yo iyo so akod ni Yisus, om mongunsopoto yo so Iyo. Lobuw oono, lobuw Samaria. 17Mutongaro yo si Yisus nu, “Okon ka ko opulu kou koyuwan nopoli'an? Siombo yo siwoi koyuwan-i? 18Nokuro su itu yo lobuw sondiang nu bansa iitu su minululi' mongorayou nu Kinoringan?” koo. 19Tongaro yo ni Yisus lobuw iiri nu, “Undii yo om panou-o! Pagka nopoimaid ko so Aku, nopoli'an ko,” koo si Yisus.

Kologa'an nu Kinoringan mogkuasa so wonuo tu

(Mat 24:23-28,37-41)

20Tinu-tinu lobuw Parisi minongoduat so si Yisus ong sombiya kologa'an nu Kinoringan mogkuasa so wonuo tu. Nga sumombuto yo Iyo so nosiro nu, “Kotimpuunan-o po nu Kinoringan mogkuasa okon-a ko osiowan nu osuang lobuw. 21Indadi d'ado ya koputangar nu, ‘Itu yo iyo,’ koo, intawa, ‘Nai yo iyo,’ koo. Nokotimpuun-o Kinoringan mogkuasa tuui so kou nu ono sono tu,” koo si Yisus.

22Mutongaro yo Iyo so mompomaid Niyo ri nu, “Mokisisiou kou ong wagu so Aku, Anak nu Riniba pudi sontagal-a, nga dai muyu ya osiou. 23Tantu mutangar lobuw so kou nu, ‘Siowi, dii maadi Iyo!’ koo, intawa ‘Siowi, tuui maadi Iyo!’ koo. Nga ikod kou yo kilabus modium so Iyo. 24Soko kudilop tumogu' kiat so pusitan mian so lidopan om osiou nu kiawi' lobuw, soko ono yo gama' Ku, Anak nu Riniba, ong lumoga' Aku. 25Nga dai po ologa' ono, koirasa Aku po laid nu osuang kosonsora'an, om tulakon Aku nu lobuw nu kosiono tu. 26Kologa'an nu Anak nu Riniba oono, soko iya ni Nuu gulu ri.#Pgn 6:5-8 27Mongokan, monginum om muontun kolobuwan-i, sampai nokosakoi-o no Nuu so kapal-i. Linumoni' yo sono nu maayo sampai noluwus ongo lobuw-i nolosod.#Pgn 7:6-24 28Kologa'an nu Anak nu Riniba oono nga soko iya ya ni Lut silaid-i. Mongokan om monginum nosiro. Momoli om powoli nosiro. Mutanom om momuwaloi nosiro soko koopotan. 29Nga nologa' runat linobusan ni Lut kiat so bandar Sodom-i, milok po su sumondot su apui, om morirang#17:29: morirang: Siowan Kamus Kitab. kisinikit kiat so langit, om naawi' lobuw-i minatoi.#Pgn 18:20—19:25 30Soko ono yo ourug ong ologa' runat pointolangan so Aku, Anak nu Riniba.

31Runat oono, isai yo po mutingongis so pontaan om kuwai gonggamon pokioolapan so rinuang nu waloi-o, adang-o masuw mongalap nu ono. Bang kuwai lobuw so umo nu runat oono, adang-o muli'.#Mat 24:17-18; Mrk 13:15-16 32Ondomo muyu yo nololagan nu sawo ni Lut.#Pgn 19:26 33Isai mokiwiwiau-a so wonuo tu, oliongan nu kowiawan kiat so Kinoringan. Nga isai yo po oliongan nu kowiawan niyo so wonuo tu, kotorima' nu kowiawan musingkolaid so surga.#Mat 10:39; 16:25; Mrk 8:35; Luk 9:24; Yns 12:25 34Mongaabar Aku so kou nu, bang kuwai duo muondot-ondot moturuw nu awi oono, ido no owiton om koduo no niogol. 35Bang kuwai duo woinoi musoud monutu nu paroi, ido no owiton om koduo no niogol. 36[Bang kuwai duo mukoraja so umo, ido no owiton om koduo no niogol,]” koo si Yisus.

37Mongoduato yo sono mompomaid Niyo ri nu, “Oo Tuhan, siombo kourugan nu ono?” koo.

Sumombuto yo si Yisus nu, “Soko bombolog moongokan nu bangkai tantu lumoga' ong kibangkai, soko ono ya totongaron Ku tantu ourug,” koo.

Currently Selected:

Lukas 17: TomPWPgLgPn

Highlight

Copy