Lukas 16

Moomogkoilo nu siin dai opongoorapan

1Mutongaro yo si Yisus so mompomaid Niyo ri nu, “Ido koyuwan doyaan kuwai moomogkoilo niyo nu orata' om siin. Nokorongou sono iyo nu tinidal siin niyo ri nu moomogkoilo oono. 2Paawo yo sono niyo moomogkoilo oono om tongaro yo nu, ‘Nokorongou aku nu dai musuat gogoma'on mu nu siin ku ri. Obari yo so aku ong onu koo gama' mu mogkoilo nu siin oono, so' dai ku yo sono ikau popongoorapan nu siin ku no,’ koo lobuw doyaan oono. 3Mutongaro yo sono moomogkoilo oono so inawo nu, ‘Onu koo sono gaam gama' ku? Pointoronon aku yo nu tuan ku no. Monangkul nga dai su kaabut, om mokisodaka nga oiyu'an aku ya. 4Soko itu waalon ku, ono yo bang kointoron aku yo mukoraja, pokurangon ku sono utang nu kouna'an ku so tuan ku no, su' popolakon aku nosiro so waloi nosiro no,’ koo so inawo niyo. 5Indadi, soginaa yo sono nu moomogkoilo oono kiawi' lobuw kiutang so tuan niyo ri. Duato niyo ido koyuwan-i nu, ‘Komuro utang mu so tuan ku no?’ koo. 6Sumombuto yo lobuw oono nu, ‘Maatus montaya nu inosak,’ koo. Mutongaro yo moomogkoilo oono so iyo nu, ‘Na, itu yo suang nu utang mu. Ogomo om surati yo limo nopulu, okon ko maatus,’ koo. 7Duato yo niyo koduo ri nu, ‘Om ikau, komuro utang mu so tuan ku no?’ koo. Sumombuto yo lobuw oono nu, ‘Oribu karut nu paroi,’ koo. Mutongaro yo moomogkoilo oono so iyo nu, ‘Itu yo suang nu utang mu. Ogomo om surati yo walu naatus karut, okon ko oribu,’ koo. 8Norongou-o po nu tuan-i gogoma'on nu moomogkoilo niyo iiri, rinayou sono niyo moomogkoilo dai otulid inowoon iiri nu, ‘Moilo iyo sobana modium nu kowiwiau,’ koo. Nga suat so ongo lobuw mongowaid nu kogoyaan so wonuo tu, oilo po nosiro mogkoilo nu kowiawan nosiro ko' iri ongo lobuw mongowaid nu koinginan nu Kinoringan,” koo.

9Mutongaro po si Yisus nu, “Rongowo muyu yo! Pokayo muyu yo kokoyaan muyu so wonuo tu modium nu una'-una', su' bang oliongan kou yo nu kokoyaan so wonuo tu, popolakon kou ya so surga musingkolaid. 10Isai opongoorapan nu gogoma'on oruoi, opongoorapan-a nu gogoma'on orogon, nga, isai dai opongoorapan nu gogoma'on oruoi, dai ya opongoorapan nu gogoma'on orogon. 11Indadi, bang dai kou opongoorapan suat so kokoyaan so wonuo tu, d'ado ya kopongaarap so kou suat so kokoyaan so surga. 12Om bang dai ko okimat nu orata' nu lobuw wokon, d'ado yo moingin monaak so ikau nu orata' ong kologa' ko so surga.

13Ido uripon dai kodapat muripon so duo tuan, so' kalu rumoraayan iyo nu ido no, om osamod nu koduo no, intawa mongimaid iyo so ido no, om tumolikud so koduo no. Soko ono ya pudi kou. Dai kou kowaid so Kinoringan ong toroidoon-a kokoyaan so wonuo tu,” koo si Yisus.#Mat 6:24

Pontudukan ni Yisus

(Mat 11:12-13; 5:31-32; Mrk 10:11-12)

14Kiawi' tinangar ni Yisus iiri norongou-a nu lobuw Parisi ri, nga dai ya nopoimaid nosiro ala' nai' pinurogaman si Yisus so' landu okoog nosiro nu siin. 15Mutongaro yo si Yisus so nosiro nu, “Kou yo su musingkobana-bana so tiningkuangon nu lobuw suang, nga oilaan-a nu Kinoringan inawo muyu no. Onu yo po tokodon toko nu boorogo so wonuo tu, dai ya boorogo so Kinoringan.

16Ukum ni Musa om pontudukan nu ongo poo'abar nu Kinoringan gulu ri, kakal-a waidon musingkologa' ni Yuanis Moongodiu'. Kiat nu iri, tinumimpuun-o sono si Yuanis potuturan nu Abar Owarong suat so gama' nu Kinoringan mogkuasa soko raja, om mogkari'-kari' sono ongo lobuw mimaid so Kinoringan, so' mokiaasuw nosiro so surga.#Mat 11:12-13 17Nga oruoi po tana' om langit tu lumiong, ko' ido tangar nu Ukum nu Kinoringan oliong.#Mat 5:18

18Isai paada' nu sawo om montun nu woinoi sondiang, nokolapa' yo iyo, om ono kusoi mongontun nu woinoi niada' no nga kolapa' ya,” koo si Yisus.#Mat 5:32; 1 Kur 7:10-11

Lobuw doyaan om si Lajarus

19Mutongaro yo si Yisus nu, “Kuwai ido koyuwan doyaan dadan mupokakas nu owarong om otaas, om runat-runat owarong ookanon niyo. 20Om kuwai ya ido koyuwan omiskin ingoranan so si Lajarus, nolongkop nu bongkuang koyuwan niyo ri. Lobuw oono nipolak so obi' nu pintu nu waloi nu lobuw doyaan-i. 21Pagka witilon iyo, mokiookan iyo nu pinitak kiat so mija pongokanan nu lobuw doyaan oono, om asu nga lumoga' monila' nu bongkuang niyo ri.

22Minatoi-o sono lobuw omiskin oono, om inowit nu susuu'on nu Kinoringan atod-i so tontong owarong sobana so obi' ni Abraham so surga. 23Lobuw doyaan iiri nga minatoi-a om nilobong. Kinologa'an-o po niyo so konomotayan,#16:23: konomotayan, ono yo Hades, koorotian, wonuo nu lobuw minatoi. om sobana ko osonsara'. Tumingaa'o yo iyo, om nosiou-siou-o si Abraham so dirawu', om mobi'-obi' si Lajarus so iyo. 24Paawo yo sono nu lobuw doyaan oono si Abraham nu, ‘Oo Aki, Abraham, luluudi aku yo. Suuo po si Lajarus potudul nu tontuduk niyo no so sungoi-o om mian tuui mongoyopos nu dila' ku tu, so' sobana ko osonsara' aku so apui tu,’ koo lobuw doyaan oono. 25Nga sumombuto yo si Abraham nu, ‘Oo anak, ondomo yo, laid mu po miau-i, nokoirasa ko yo nu kiawi' kosonangan om koworongan, nga si Lajarus, koraayan-a kiawi' noirosaan niyo nu miau po iyo ri. Kosiono, osanang-o iyo tuui, om ikau nosonsara'. 26Sondiang ko ono, so puola'an toko tu kuwai ido timbang olalom, dai oripawan. Kiat tuui lumoga' nai nga dai koripau, om kiat nai lumoga' tuui nga dai ya koripau,’ koo si Abraham. 27Mutongaro yo lobuw doyaan-i nu, ‘Oo Aki, bang soko ono, suuo po si Lajarus poian so waloi ni amo ku, 28so' kisulod aku po limo koyuwan dii. Indadi owarong ong oilaan nosiro su' dai nosiro kosuut so aku so polak osonsara' iitu,’ koo. 29Nga sumombuto yo si Abraham nu, ‘Kuwai yo dii so nosiro buuk Ukum ni Musa om buuk nu poo'abar nu Kinoringan. Indadi owarong ong mongkinongou om maid nosiro nu pontudukan nokosurat so ongo buuk oono,’ koo. 30Sumombuto yo lobuw doyaan oono nu, ‘Oo Aki Abraham, dai ono muuma', so' bang kuwai ido koyuwan minatoi oluli'an lumoga' dii so nosiro, tantu rumorogo ya nosiro momaal nu koraayan,’ koo. 31Nga mutongaro yo si Abraham nu, ‘Bang dai ya mongimaid nosiro nu sinurat ni Musa om ongo poo'abar nu Kinoringan-i, tantu dai ya poimaid nosiro pudi kuwai lobuw oluli'an kiat so pinotoyan lumoga' mongaabar so nosiro,’ koo si Abraham,” koo si Yisus.

Currently Selected:

Lukas 16: TomPWPgLgPn

Highlight

Copy