Lukas 15

Salig-salig suat nu dumba noliong

(Mat 18:12-14)

1Ido runat, osuang lobuw kikoraayan, ono yo moomumpung nu sukai om lobuw dai poimaid nu oturan nu ugama Yaudi linumoga' dii si Yisus mongkinongou nu pontudukan Niyo. 2Minungot sono ongo lobuw Parisi om moomontuduk nu Ukum-i so si Yisus om minutangar nu, “Siowi muyu po bo nga mokimuuna'-una' Iyo nu lobuw oraai, om murung so nosiro mongokan,” koo.#Luk 5:29-30 3Musolig-soligo yo sono si Yisus nu,

4“Bang ido koyuwan so kou kidumba maatus, om noliongan ido, onu waalon niyo? Tantu niogol niyo siwoi nopulu om siwoi oono so korikutan, om diumon niyo ido ri sampai ooyangan. 5Ooyangan-o po niyo, simbanon-o niyo dumba oono mongowit muli', maid nu osudu'an. 6Pogloga' niyo so waloi, momaau-o sono iyo nu kouna'an om ombaloi om mutangar nu, ‘Simpor kou yo so aku sumudu'an, so' nooyangan ku yo dumba ku tu!’ koo. 7Mongaabar Aku so kou nu soko ono ya pudi kiawi' so surga koosudu' ong rumorogo ido koyuwan oraai kiat so koraayan niyo. Om labi po koosudu' so siwoi nopulu om siwoi koyuwan owarong-o akal-i om dai yo muru' rumorogo,” koo si Yisus.

Salig-salig suat nu siin noliong

8Mutongaro po si Yisus nu, “Bang ido woinoi kisiin opulu nokaping, om oliongan songkaping, onu waalon niyo? Tantu monikit iyo nu politaan om sopuon niyo waloi niyo modium nu siin-i sampai ooyangan. 9Ooyangan-o po niyo, momaau-o sono iyo nu kouna'an om ombaloi niyo om mutangar nu, ‘Simpor kou yo so aku sumudu'an, so' nooyangan ku yo siin ku tu!’ koo. 10Mongaabar Aku so kou nu soko ono ya koosudu' nu ongo susuu'on nu Kinoringan so surga ong rumorogo ido koyuwan kiat so koraayan niyo,” koo si Yisus.

Salig-salig suat nu anak noliong

11Monolig-soligo po si Yisus nu, “Ido koyuwan kianak duo kusoi. 12Mutongaro yo sono toudi ri so amo niyo ri nu, ‘Oo Apa, taaki yo so aku boogian ku nu orata' ipusaka mu so kai no,’ koo. Boogio yo sono niyo orata' pusaka oono so kiduo anak niyo ri. 13Dai po olaid, wolii yo sono nu toudi ri boogian niyo nu orata' ri, om owito yo mansau orogo ri so wonuo orawu'. Dii yo sono iyo minongaawi' nu siin niyo ri mogkosonangan om monongkowoinoyan. 14Naawi' yo po siin niyo ri, kilikop sono dii, om iyo nga d'ado yo sono ingkookan. 15Indadi, mukorojaa yo sono iyo so ido lobuw dii, om suuo yo iyo nu lobuw oono poponumad nu ulod so umo. 16Sobana ko witilon iyo, om mokiookan-o nu nisumad so ulod-i. Soko iri pona kowitil niyo, nga d'ado ya pookan so iyo. 17Noindanan nai' sono niyo pogokalan niyo ri, om mutongaro yo so inawo nu, ‘Osuang lobuw bogaji dii si Apa om ouma' nu mookan, nga, aku tuui moipopatoi-o witilon. 18Gaam nai' muli' aku dii si Apa. Kologa' aku om tongaron ku iyo nu, “Oo Apa, kikoraayan aku so Kinoringan om ikau. 19Ikod-o pononganak so aku. Tokodo aku ya nu lobuw sondiang bogaji tuui so ikau,” k'aku,’ koo so inawo nu anak oono. 20Notangar iri niyo om mulio yo so amo niyo ri.

Orawu' po iyo, nosiou-o iyo nu amo niyo ri. Sobana ko noluluudan amo niyo ri so iyo, om mundako yo sumamung om koromi yo moningud. 21Mutongaro yo sono anak oono so amo niyo ri nu, ‘Oo Apa, kikoraayan aku so Kinoringan om ikau. Ikod-o pononganak so aku,’ koo. 22Nga, paawo yo nu amo niyo ri kouriponan-i om tongaro yo nu, ‘Sikap-o muyu ya mongalap nu sabung sobana ko owarong om popusobungo muyu iyo. Popupondulungo om popukosuto muyu iyo. 23Pomili' kou nu uyog nu sapi olomu no om goraso muyu. Mongokan-ngokan toko nu osudu'an, 24so' anak ku iitu soko minatoi, nga noluli'an. Nopalid iyo, nga nokoimpolanu yo,’ koo amo niyo ri. Muromi-romio yo sono nosiro.

25Iya oono kakal po mukoraja so umo ongko ri. Mulio yo sono iyo, om nokorani-rani ya so waloi-i, nokorongou-o iyo nu kai-kai mutogunggu om mongalai. 26Paawo yo niyo ido uripon nosiro ri om duato yo nu, ‘Onu ka nu rami-rami ono?’ koo. 27Sumombuto yo uripon-i nu, ‘Nokouli' si adi' mu. Indadi minonuu' sono si amo mu popongogaras nu uyog nu sapi olomu ri, so' osudu'an iyo nu miau-a adi' mu no om nokouli' yo,’ koo. 28Sobana ko minungot anak ongko oono sampai dai minasuw so waloi-i. Pagka soko iri, lumobuso yo sono amo niyo ri mongolimuuk so iyo paasuw. 29Nga mutongaro yo ongko oono nu, ‘Botoun-toun aku yo tumotos mukoraja momadul so ikau, om dai ya su insan sumiwal nu niongosuu' mu no. Nga, insan uyog nu kambing dai ko po minonaak so aku nu gorason ku purami-rami ku om kouna'an ku no. 30Anak mu yo oono su minongorunsur so ikau. Minongaawi' iyo nu orata' mu ri, minonomboinoi so wonuo nu lobuw, om minuli' nai', nga, iyo nai' su ginorasan mu nu uyog nu sapi olomu!’ koo. 31Sumombuto yo amo niyo ri nu, ‘Oo Anak, ikau-o po moron-toron-a. Onu-onu so waloi tu kourung ko ya so aku momakai. 32Patut-o po osudu'an toko kiawi' om osanang inawo, so' si adi' mu soko minatoi, nga noluli'an. Nopalid iyo, nga nokoimpolanu yo,’ koo amo oono,” koo si Yisus.

Currently Selected:

Lukas 15: TomPWPgLgPn

Highlight

Copy