Pinongurugan 30

1Nga d'ado po anak ni Rahil, indadi mokimualun sono iyo so si aka' niyo. Mutongaro yo iyo so si Yakub nu, “Popomontiano aku yo. Bang dai, matoi aku,” koo.

2Minungot sono si Yakub so si Rahil om mutongaro yo nu, “Okon-a ko Kinoringan aku itu. Iyo yo su minongurug so ikau nu tomonang,”#30:2: tomonang; intawa: madai koo.

3Mutongaro yo si Rahil nu, “Tidi si Bilha, uripon ku. Ondoto yo iyo su' kopuanak iyo. Indadi kiat-o nai ourug aku nu ino,” koo. 4Poondoti yo sono niyo so si Yakub si Bilha uripon niyo ri. 5Minomontian-o si Bilha om nokopuanak nu kusoi. 6Mutongaro yo sono si Rahil nu, “Pinokobana aku ya nu Kinoringan. Rinongou-a Niyo inindamo ku ri om tinaakan aku nu anak kusoi,” koo. Ingorani yo sono niyo anak oono so si Dan. 7Minomontian-o si Bilha om nokopuanak nu kusoi. 8Mutongaro yo si Rahil nu, “Nosusa sobana aku lumawan so si aka', om nomanang aku ya,” koo. Ingorani yo sono niyo anak oono so si Naptali.

9Pagka oirosaanan-o ni Lia nu dai yo iyo momontian, niposondamin-o sono niyo si Jilpa uripon niyo so si Yakub. 10Nokopuanak-o sono si Jilpa nu kusoi. 11Mutongaro yo si Lia nu, “Nountung aku,” koo. Ingorani yo sono niyo anak oono so si Gad. 12Nokopuanak po si Jilpa nu kusoi. 13Mutongaro yo si Lia nu, “Sobana ko osanang aku! Om kosiono tu mutangar kowoinoyan nu aku yo po osanang,” koo. Indadi, ingorani yo sono niyo anak oono so si Asir.

14Iya poomoroyan, minian sono si Rubin so umo om nokooyang nu ido ginis nu sakot-sakot koubat.#30:14: ido ginis nu sakot-sakot koubat: Ngaran-o po nu rikut iitu so tangar Ibrani nga “dodayim”. Lobuw nu gulu ri poimaid nu, sakot-sakot oono koubat nu woinoi tomonang om kopoganak sono. Owito yo sono iri niyo dii si Lia, ino niyo ri. Mutongaro yo sono si Rahil so si Lia nu, “Taaki aku po sabat nu rikut nooyangan nu anak mu no,” koo.

15Sumombuto yo si Lia nu, “Dai ko po gaam notopodan monongapan nu sawo ku no. Kosiono mokitaak ko po nu ubat nooyangan nu anak ku no,” koo.

Mutongaro yo si Rahil nu, “Poondoton ku ya si Yakub so ikau nu awi tu, ong monaak ko nu ubat nooyangan nu anak mu no,” koo.

16Nokouli' si Yakub kiat so umo nu awi-awi, somungo yo iyo ni Lia om mutongaro yo nu, “Ondot-o so aku nu awi tu so' noborayan ku yo ono nu ubat nooyangan nu anak ku so umo ri,” koo. Mondoto yo sono si Yakub so si Lia nu awi ri.

17Tinumbaid-o sono nu Kinoringan du'a ni Lia, om minomontian-o iyo. Om nokopuanak iyo nu anak kusoi kolimo. 18Mutongaro yo iyo nu, “Sinuli'an aku nu Kinoringan, so' niposondamin ku si Jilpa nu sawo ku no,” koo. Indadi ingorani yo sono niyo anak oono so si Isakar. 19Minomontian-o si Lia om nokopuanak-o nu kusoi niyo koonom. 20Mutongaro yo iyo nu, “Tinaakan aku nu Kinoringan nu tutungkap nu sobana ko owarong. Kosiono poduli'on aku yo sono nu sawo ku no so' nokopuanak aku yo onom kusoi,” koo. Indadi ingorani yo sono niyo anak oono so si Jibulun. 21Kiat nu iri nokopuanak sono si Lia nu woinoi om ingorani yo niyo so si Dina.

22Noondoman-o nu Kinoringan si Rahil. Tinumbaid-o niyo du'a ni Rahil om pinopuanak-o sono. 23Minomontian-o si Rahil, om nokopuanak nu kusoi. Mutongaro yo iyo nu, “Inidu' yo nu Kinoringan koiyu'-iyu' ku ri. 24Muda-mudaan ong taakan aku po Niyo nu anak kusoi,” koo. Indadi ingorani yo sono niyo anak oono so si Yusup.

Pinuupokatan ni Yakub om ni Laban

25Nopuanak-o po ni Rahil si Yusup, mutongaro yo si Yakub so si Laban nu, “Lilai aku yo muli' so tontong ku ri. 26Poowiti yo so aku kiduo sawo ku om inonakan ku tu, iri noborayan ku yo nu pinonomongan ku tuui so ikau-i. Oilaan mu ya nu sobana ko owasa aku mugogoma'on tuui,” koo.

27Sumombuto yo si Laban nu, “Rongowo po! So pirasat ku, oilaan ku nu binorokatan aku nu Kinoringan nu pinonomongan mu tuui so aku, 28indadi, tongaro ya ong komuro pokitaakon mu,” koo.

29Sumombuto yo si Yakub nu, “Noilaan mu yo kondiri nu sobana ko owasa aku mugogoma'on sampai sinumuang-o pongayam mu. 30Dai po su nokologa' ri, owako ya gonggamon mu, nga kosiono tu okaya ko yo sono. Binorokatan ko nu Kinoringan nu iri pinonomongan ku ri. Indadi kosiono nologa' yo poomugogoma'an ku suat so anak sawo ku,” koo.

31Sumombuto yo si Laban nu, “Onu ka pokitaakon mu?” koo.

“Ado ya pokitaakon ku sondiang, nga poriora'on ku po pongayam mu no ong tumaayun ko. 32Lilai aku yo nu runat tu monsiou nu baanan nu dumba mu, om pili'on ku iri oitom, kumorot-korot, om balat-i. Ono yo su pokigojion ku so ikau. 33Oilaan mu ya ong wagu nu owarong-a gogoma'on ku so ikau ko' dai. Bang impa'on mu baanan nu kambing ku om kosiou ko nu dumba okon ko balat intawa kumorot-korot intawa moitom, tokodo ya nu notakou ku pongayam oono,” koo si Yakub.

34Sumombuto yo si Laban nu, “Tumaayun aku ya! Waalo to yo kiawi' pinutangar mu oono,” koo. 35Runat-a iiri potondiango yo ni Laban kiawi' kambing kusoi iri balat, kumorot-korot, om kiawi' kambing woinoi kumorot-korot om balat, om oitom. Soko iri po, suuo yo niyo inonakan niyo ri popomoriara' nu iri. 36Momponowo yo sono nosiro maid nu pongayam-i, mulaiw kiat dii si Yakub, kiro-kiro kotoluan ponowon puola'an nosiro. Iri yo po noolu' nu baanan nu kambing dumba ni Laban, si Yakub sono su minomoriara'.

37Mongolapo yo si Yakub nu ongo raan oiyau om korot-koroto yo niyo monginkanit kulit-i nu soko kumorot-korot su wotik. 38Polaki yo niyo raan iiri so poonginuman nu dumba ri so' koopotan musonsawo dumba ri koduung monginum-o. 39Indadi anak sono nu dumba ri, mimaid nu wotik winaal ni Yakub.

40Potondiango yo ni Yakub uyog nu dumba ri om potingkuango yo niyo so dumba kumorot-korot, balat om oitom songapan ni Laban. Soko iri yo gama' niyo kibaanan nu dumba niyo kondiri, om tondiangi yo niyo kiat so baanan nu dumba ni Laban.

41Koduung musonsawo yo dumba olomu ri, nipolak-o ni Yakub raan iningkonitan niyo ri so poonginuman nu dumba ri, 42nga dai niyo nipolak raan oono so poonginuman nu dumba oogas-i. Indadi iri dumba olomu ri songapan ni Yakub om iri oogas-i songapan ni Laban. 43Soko iri po sobana ko okaya sono si Yakub. Osuang sobana baanan nu dumba, unta, koladai om kouriponan niyo.

Currently Selected:

Pinongurugan 30: TomPWPgLgPn

Highlight

Copy