Pinongurugan 29

Nokologa' yo si Yakub dii si Laban

1Lumombuso yo si Yakub mian umpak so pusitan nu tana' Kanaan. 2Milok po om nokolalag iyo nu porigi so umo om songloku-loku tolu baanan nu dumba, nu koopotan poinumon so porigi oono. Porigi oono tinutuban nu watu maayo. 3Koduung oimpug-o baanan nu dumba nai, sukabon-o porigi oono nu moongipat om poinumon sono dumba ri. Koinum-o po, tutubon-o koimbagu porigi iiri nu moongipat.

4Mongoduato yo sono si Yakub so moongipat-i nu, “Oo lakitu, siombo kiat muyu?” koo.

Sumombuto yo nosiro nu, “Kiat kai so Aran,” koo. 5Mongoduato po si Yakub nu, “Otondu'an muyu ka si Laban, anak ni Nahur?” koo.

“Otondu'an-a,” koo nosiro.

6“Kaatu' ya ka nosiro?” koo si Yakub.

“Oo, kaatu' ya. Siowi! Nudi yo anak niyo woinoi ingoranan so si Rahil, mongolulung nu dumba nu amo niyo no tuui,” koo nosiro. 7Mutongaro yo sono si Yakub nu, “Orunat po boto, om okon po ko pookurungan nu dumba. Owarong poinumon muyu po om pokotipon po nu rikut koimbagu,” koo.

8Sumombuto yo nosiro nu, “Dai mai po koinum dumba no ong dai po oimpug kiawi' om dai po osukab watu pinonutub nu porigi no,” koo.

9Laid ni Yakub mokimutangar-tangar so nosiro ri, nokologa' yo si Rahil maid nu dumba niyo ri. 10Nosiou-o po ni Yakub si Rahil maid nu baanan niyo ri, miano yo iyo so porigi ri om sukabo yo niyo pinonutub-i, om poinumo yo niyo baanan-i. 11Noopod iri, singudi yo niyo si Rahil maid nu tumangi' osudu'an. 12Mutongaro yo iyo so si Rahil nu, “Aku yo po anak ni Ribka, sulod ni apa mu,” koo.

Mundako yo sono si Rahil muli' paabar nu iri so si apa niyo. 13Norongou-o po ni Laban abar suat so si Yakub, anak nu sulod niyo ri, mogowo yo iyo sumamung. Koromi yo niyo si Yakub om singudi yo. Poindokodo yo sono niyo so waloi om nokotuturan-o po ni Yakub kiawi'-awi' suat so iyo, 14mutongaro yo si Laban nu, “Bana ya nu ikau-o su anak nu sulod ku,” koo. Molako yo si Yakub so waloi oono sombulan laid.

Minonamong si Yakub dii si Laban

15Ido runat mutongaro yo si Laban so si Yakub nu, “Dai otoop ong mugogoma'on ko ya tomod tuui so aku, pudi pona komonakon ku ikau. Tongaro ya ong onu koinginan pokigojion mu?” koo. 16Si Laban-o po kianak duo roraa. Ongko ri ingoranan so si Lia om toudi ri ingoranan so si Rahil. 17Si Lia yo po mato niyo ri ya su owarong, nga si Rahil, koyuwan po om buatan po oparu'.

18Osorong sobana si Yakub so si Rahil, indadi sumombuto yo sono iyo so si Laban nu, “Moingin aku mugogoma'on turu notoun ong lila'an mu aku montun so si Rahil,” koo.

19Mutongaro yo si Laban nu, “Owarong po nu nipoontun ku iyo so ikau ko' nipoontun ku nu wokon. Indadi polak-o tuui,” koo. 20Monomongo yo sono si Yakub turu notoun laid pongontun so si Rahil. Nga pudi pona toun su mutitinalib, koirosaanan ni Yakub soko sondunat-o so' oingin sobana iyo nu roraa oono.

21Nogonop-o po toun kiat so pinuupokatan iiri, mutongaro yo si Yakub so si Laban nu, “Nokotalib-o turu notoun. Lilai aku yo mongontun nu anak mu no,” koo. 22Muromi-romio yo sono si Laban suat nu puontunan om soginaa yo niyo kiawi' lobuw so bandar iiri. 23Nga awi ri, okon-a ko si Rahil su niapit dii si Yakub, nga si Lia nai', om ondoto yo iyo ni Yakub. 24(Tinaakan-a ni Laban si Lia nu uripon ingoranan so si Jilpa.) 25Susuab-i om noilaan nai' ni Yakub nu si Lia ya su nipoontun ni Laban so iyo. Miano yo sono iyo dii si Laban om mutongaro yo nu, “Nokuro su soko ono winaal mu so aku? Minonamong aku yo pongontun so si Rahil, nga inokalan mu aku,” koo.

26Sumombuto yo si Laban nu, “Mongowaid nu adat tuui, dai kowasa kopogulu montun adi' no so ongko no. 27Imati po koturuan kotolimuasan nu rami-rami pinuontunan iitu no. Ipoontun ku ya so ikau si Rahil, nga subai monamong ko po koimbagu turu notoun,” koo.

28Tinumaayun-o si Yakub nu iri om notolimuas-o po rami-rami ri, posondomini yo ni Laban si Rahil so iyo. 29(Tinaakan-a ni Laban si Rahil nu uripon ingoranan so si Bilha.) 30Ondoto yo ni Yakub si Rahil om koinginan po bana niyo si Rahil ko' si Lia. Soko iri po, minonamong po si Yakub turu notoun laid.

Inonakan ni Yakub

31Nosiou-o po nu TUHAN nu dai somodan ni Yakub si Lia soko si Rahil, inurug sono Niyo si Lia nu kopomontian, nga si Rahil dai. 32Minomontian-o sono si Lia, om nokopuanak nu kusoi. Mutongaro yo iyo nu, “Nosiou-o nu TUHAN kosonsora'an ku. Kosiono somodan aku yo sono nu sawo ku no,” koo. Ingorani yo niyo anak oono so si Rubin. 33Minomontian-o koimbagu si Lia om nokopuanak-a nu kusoi. Mutongaro yo iyo nu, “Noilaan-o nu TUHAN nu dai aku somodan nu sawo ku, indadi tinaakan aku po Niyo nu anak iitu,” koo. Ingorani yo niyo anak oono so si Simiun. 34Minomontian po si Lia, om nokopuanak-o nu kusoi. Mutongaro yo iyo nu, “Kosiono osulut po sawo ku no so aku so' nokopuanak aku yo tolu kusoi,” koo. Ingorani yo niyo anak oono so si Liwi. 35Minomontian po si Lia om nokopuanak-o nu kusoi. Mutongaro yo iyo nu, “Insan tu mongorayou aku nu TUHAN,” koo. Ingorani yo niyo anak oono so si Yahuda. Nopupus iri, dai yo sono iyo minuanak.

Currently Selected:

Pinongurugan 29: TomPWPgLgPn

Highlight

Copy