Pinongurugan 28

1Soginaa yo sono ni Isak si Yakub, om borokati yo niyo maid nu mutangar nu, “Adang ko yo montun nu roraa nu Kanaan. 2Ian-o so Misuputamia so suku-sakat ni Bituil, aki mu ri, om ontun-o nu ido roraa ni Laban komaman mu ri.

3Muda-mudaan ong

borokatan ko ya

nu Kinoringan Maayo Kuasa,

posuang nu sinokagan mu

om osiliw ko

nu aki nu osuang bansa.

4Muda-mudaan ong

borokatan ko nu TUHAN,

muinong nu niborakat

Niyo so si Abraham.

Om muda-mudaan ong

osongapan mu ya tana'

pinolakan ku iitu

nu nitaak nu Kinoringan

so si Abraham,”

koo.#Pgn 17:4-8 5Suuo yo sono ni Isak si Yakub mian so Misuputamia, dii si Laban anak ni Bituil lobuw nu Aram. Si Laban-o po ongko ni Ribka, ino ni Yakub om ni Isau.

Minontun koimbagu si Isau

6Norongou-o sono ni Isau nu binorokatan ni Isak si Yakub om pinoian so Misuputamia, popodiumon nu sawo dii. Om norongou-a niyo nu iya pinongoborokatan ni Isak so si Yakub, pinogos niyo si Yakub montun nu roraa nu Kanaan. 7Om noilaan-o ni Isau nu obinsuut si Yakub nu ponuu'an ni Isak om ni Ribka om nokoian-o so Misuputamia. 8Noorotian-o sono ni Isau nu dai oingin si Isak nu woinoi nu Kanaan. 9Pagka soko iri, miano yo iyo dii si Ismail, anak ni Abraham, om ontuno yo niyo anak ni Ismail ingoranan so si Mahalat, adi' ni Nibayut.

Upian ni Yakub so Bitil

10Momponowo yo sono si Yakub kiat so Birsiiba murongkat so Aram. 11Pagka tumuong-o, mintorono yo iyo om moloyo yo. Gumilio yo iyo moturuw, om minubantal nu watu. 12Nokoupi sono iyo nu kitukad sinumumpad kiat so langit, om ongo susuu'on nu Kinoringan nga muntiba mindakod so tukad oono.#Yns 1:51

13So obi' niyo no mundii-dii TUHAN, minutangar nu, “Aku yo su TUHAN, Kinoringan usaa'on ni Abraham om ni Isak. Itaak Ku so ikau om so solusuk mu pilolongkop nu tana' ginilian mu tu.#Pgn 13:14-15 14Posuangon Ku solusuk mu muinong nu koris. Lumongkop nosiro so tana' iitu, om pagka borokatan Ku ikau om solusuk mu, kiawi' bansa so wonuo tu oborokatan.#Pgn 12:3; 22:18 15Ondomo yo, tobangon Ku om ingoligan Ku ikau siombo-ombo ya pomponowan mu. Om owiton Ku ya ikau mululi' tuui. Dai Ku ya ikau laiwan musingkotuman nu kiawi' nijanji Ku so ikau oono,” koo.

16Norios-o sono si Yakub om mutongaro yo nu, “Tuui pala si TUHAN, nga sisuna ya om noilaan ku nai',” koo. 17Linumaa' sono iyo, om mutongaro yo nu, “Kolaa'-laa' sobana pala tuui. Tuui yo kiro ku waloi nu Kinoringan, longobon mian so surga,” koo.

18Susuab-i, rumioso yo si Yakub om olapo yo niyo watu binantal niyo ri, om posoki yo nu pongoondoman, om tuntugi yo niyo nu inosak#28:18: inosak; intawa: minyak ponondu'an nu pinutongaran nu Kinoringan so iyo. 19Iningoranan sono niyo tontong oono nu Bitil#28:19: Orati yo po nu Bitil so tangar Ibrani nga, waloi nu Kinoringan. (Gulu ri ingoranan nu Lus). 20Mujonjio yo sono si Yakub so Kinoringan nu, “Bang tobangon om ingoligan Mu ya aku so poponowan ku, om taakan Mu aku nu kosukupan nu ingkookan om pokakas 21musingkopululi' ku dii si apa, usaa'on ku sono Ikau. 22Taakan ku Ikau sombaagi' opulu nu onu yo po nitaak Mu so aku no. Watu niundii ku iitu no osiliw nu pongusaa'an so Ikau,” koo.

Currently Selected:

Pinongurugan 28: TomPWPgLgPn

Highlight

Copy