Pinongurugan 26

Minolak si Isak so Girar

1So tontong iiri kilikop-o soko iya ni Abraham gulu ri. Miano yo sono si Isak mokimuupakat so si Abimilik, raja nu lobuw Pilistin, mokilila' nu molak dii.

2Winaal niyo soko iri so' minintolang TUHAN so iyo mutangar nu, “Adang ko yo mian so Masir. Polak-a tuui soko nisuu' Ku so ikau-i. 3Ingoligan Ku ya ikau om borokatan Ku ikau. Itaak Ku so ikau om so solusuk mu pilolongkop nu tontong iitu. Tumanon Ku ya janji Ku so si Abraham, amo mu ri. 4Posuangon Ku komongkupuan mu soko koosuang nu korombituon, om pilolongkop nu tontong iitu nitaak Ku so nosiro. Kiawi' bansa so wonuo tu mokiborakat nu soko poongoborakat Ku nu solusuk mu.#Pgn 22:16-18 5Borokatan Ku kou so' minongasip-o si Abraham nu ponuu'an om kiawi' oturan Ku,” koo.

6Indadi, molako yo sono si Isak so Girar. 7Pagka osuang kokusoyan mongoduat so si Isak ong isai woinoi maid-waid so iyo ri, sombuti yo niyo nu, “Iyo yo po toudi ku,” koo. Sobana ko oparu' si Ribka, ono yo ko' inolim ni Isak nu sawo niyo, so' lumaa' iyo potoyon nu lobuw dii ri.#Pgn 12:13; 20:2 8Olaid-laid nosiro molak dii, tinumimpan sono si Abimilik, raja nu lobuw Pilistin so jondila nu waloi niyo ri nu ido runat, om nosiou niyo si Isak om si Ribka musingud. 9Indadi, paawo yo sono niyo si Isak om duato yo nu, “Sawo mu ya boto woinoi oono. Nokuro su tinangar mu nu adi' mu iyo?” koo.

Sumombuto yo si Isak nu, “Intaman ku potoyon aku ong niabar ku nu sawo ku iyo,” koo.

10Mutongaro yo si Abimilik nu, “Nokuro su soko ono kogoyaan mu so kai? Bang ondoton nu ido poranak ku sawo mu no, ikau-a so sala',” koo. 11Soko iri po, mutongaro yo sono si Abimilik so kiawi' poranak niyo ri nu, “Isai yo po mongindoraai so si Isak intawa sawo niyo no, potoyon,” koo.

12Mutonomo yo sono si Isak dii, om toun iiri noinggatus pinumpung niyo, so' binorokatan iyo nu TUHAN. 13Muririnuang kokoyaan niyo. 14Pagka osuang sobana uripon niyo om baanan nu dumba om sapi, mokimalun sono ongo lobuw Pilistin-i so iyo. 15Indadi, inosuwan sono nosiro nu tana' kiawi' porigi inungkud nu kouriponan ni Abraham nu miau po iyo ri.

16Mutongaro yo si Abimilik so si Isak nu, “Pulaiw kou yo tuui. Kaalib kou po sono so kai,” koo.

17Indadi, mulaiwo yo si Isak om mubosolago yo so kogona'an nu Girar, om olaid-a iyo minogol dii. 18Inungkudan-o sono koimbagu ni Isak ongo porigi winaal nu miau po si Abraham, iri inosuwan nu lobuw Pilistin nu tana' ri. Iningoranan niyo porigi iiri nu soko pinongingoranan ni amo niyo.

19Mongungkudo yo kouriponan ni Isak nu porigi so kogona'an nu Girar, om nokooyang-o nosiro nu towud nu sungoi mimbuak-simbuak po koosampuw. 20Nga moongipat so Girar-i om moongipat ni Isak minualod, ido so ido mutangar nu, “Kai ya songapan nu sungoi iitu,” koo. Ingorani yo sono ni Isak porigi iiri nu, “Pinuolodan” so' minualod nosiro dii.

21Mongungkudo yo kouriponan ni Isak nu porigi wokon, nga soko iri ya nu minualod-a nosiro. Indadi ingorani yo niyo porigi iiri nu “Pinulowanan”. 22Mindaa yo iyo kiat dii, om mongungkudo yo iyo nu porigi kotolu, om ado yo sono pinuolodan nai. Indadi ingorani yo ni Isak porigi iiri nu “Oluas”, om mutongaro yo nu, “Kosiono tinaakan toko yo nu TUHAN nu tana' oluas polakan toko, om osanang toko yo sono sumokag tuui,” koo.

23Momponowo yo si Isak om nokologa' so Birsiiba. 24Awi ri mintolango yo TUHAN om mutongaro yo so iyo nu, “Aku yo Kinoringan ni apa mu si Abraham. Ikod-o kilaa', tundanon Ku om borokatan Ku ya ikau, om posuangon Ku solusuk mu so' nokopujanji Aku yo so uripon Ku si Abraham,” koo. 25Momaalo yo si Isak nu ranggar dii om mongusaa'o yo so TUHAN. Mubosolago yo iyo dii om mongungkudo yo kouriponan niyo ri nu porigi.

Pinujonjian ni Isak om ni Abimilik

26Ido runat, linumoga' si Abimilik kiat so Girar, maid so si Ahujat, rorongowon niyo ri, om si Pikul, wowaidon nu soujar-i, sumambat so si Isak.#Pgn 21:22 27Mutongaro yo si Isak nu, “Nokuro su sumambat kou so kai? Ampa gulu ri, ikororaai muyu kai, om sinusub muyu kai kiat so tontong muyu,” koo.

28Sumombuto yo nosiro nu, “Nosiou mai nai' nu tobangon kou nu TUHAN. Indadi pikiran mai owarong ong mokimuupakat kai so kou momaal nu porojonjian otatap, ono yo 29dai kou mongoraai so kai, soko kai su dai ya mongoraai so kou. Owarong kai ya so kou om pinosimaidan mai ya kou murongkat nu osanang. Noilaan mai yo sono nu binorokatan kou nu Kinoringan,” koo nosiro.

30Pookano poinumo yo sono ni Isak nosiro. 31Susuab-i mujonjio yo nosiro maid nu ibot om mutongaro yo si Isak nu, “Sompiatag toko ya,” koo. Indadi, osanang-o sono nosiro kiawi'.

32Runat-a iiri linumoga' kouriponan ni Isak paabar suat nu porigi inungkud nosiro ri nu, “Nokooyang kai yo nu sungoi,” koo. 33Ingorani yo sono ni Isak porigi iiri nu Siiba, orati “ibot”, om iri yo su impuunon nu bandar iiri iningoranan nu Birsiiba.#26:33: Orati yo po nu Birsiiba so tangar Ibrani nga, porigi pinuibotan, intawa, porigi turu (Bosa'on poPgn 21:31).

Duo sawo ni Isau kiat so bansa wokon

34Iya nu opat nopulu toun umur ni Isau, minontun iyo nu duo roraa bansa Iit, ido ri ingoranan so si Yudit anak ni Biiri, om koduo ri si Basmat, anak ni Ilum. 35Kiduo woinoi pinoputapil niyo oono nga, mongaagut so si Isak om si Ribka.

Currently Selected:

Pinongurugan 26: TomPWPgLgPn

Highlight

Copy