Pinongurugan 25

Solusuk ni Abraham so sawo niyo wokon

1Minontun po si Abraham nu ido woinoi ingoranan so si Kitura. 2Sawo niyo oono minuanak so si Jimran, Yuksan, Midan, Midian, Isbak om si Sua. 3Si Yuksan amo ni Siiba om ni Didan, om solusuk-o po ni Didan lobuw nu Asur, lobuw nu Litus om Lium. 4Inonakan ni Midian si Ipa, si Ipir, si Inok, si Abida, om si Ildaa. Nosiro kiawi' solusuk ni Kitura.

5Pudi pona nu nipopusaka ni Abraham so si Isak kiawi' orata' niyo ri, 6nga laid po niyo miau, tinaakan-a niyo inonakan niyo so sawo niyo wokon-i nu orata'. Notaakan-o po niyo nu orata, suuo yo sono niyo nosiro minda so tontong umpak so pusitan nu Kanaan, su' kotondiang so si Isak, anak niyo ri.

Kinopotoyan om pinolobongan

so si Abraham

7-8Minatoi si Abraham nu maatus tolu nopulu om limo toun umur niyo. 9Lobongi yo sono iyo nu duo anak niyo ri, si Isak om si Ismail, so uang nu watu ingoranan nu Makpila, umpak so pusitan nu Mamri songapan ni Iprun anak ni Juhar, lobuw nu Iit, 10nga winoli sono ni Abraham nu pinolobongan niyo so si Sara, sawo niyo ri.#Pgn 23:3-16 11Minatoi-o po si Abraham, binorokatan-o nu Kinoringan si Isak, iri minolak so obi' nu porigi ingoranan nu Lahai-Roi.

Solusuk ni Ismail

12Itu yo su solusuk ni Ismail, anak ni Abraham dii si Agar, woinoi nu Masir, uripon ni Sara. 13-16Kianak si Ismail opulu om duo sampuw; ono yo si Nibayut, Kidar, Adbiil, Mibsam, Misma, Duma, Masa, Adad, Tima, Yitur, Napis om si Kidma. Inonakan niyo oono aki nu opulu om duo bansa. Kampung om pomubosolagan nosiro nisangai-a so ngaran nosiro. 17Minatoi si Ismail nu maatus tolu nopulu om turu toun umur niyo. 18Solusuk niyo minolak so puola'an nu Awila om Sur so pusitan nu Masir, so lalan mian so Asur. Nokotondiang nosiro kiat so solusuk ni Abraham wokon.

Kinopuonakan so si Isau om si Yakub

19Itu yo solusuk ni Isak, anak ni Abraham. 20Iya nu pinongontunan ni Isak so si Ribka, umur niyo opat nopulu toun. Si Ribka oono toudi ni Laban, anak ni Bituil, lobuw nu Aram kiat so Misuputamia. 21Pagka olaid-o om d'ado po anak ni Ribka, nobogdu'a sono si Isak suat so sawo niyo oono, om minomontian-o sono si Ribka. 22Pontianon ni Ribka oono minuapid, om dai po nopuanak, dadan mutuur so pogonakan niyo. Mutongaro yo sono si Ribka nu, “Nokuro su soko itu nourug so aku?” koo. Minokikoilo yo sono iyo so TUHAN.

23Mutongaro yo TUHAN so iyo nu,

“Ono yo po lolaing

so pogonakan mu no,

wowaidon nu duo bansa

dadan mualod.

Obasag adi' no ko' ongko no.

Om ongko no ouripon

nu adi' no,”

koo.#Rm 9:12

24Nologa' poomuonakan ni Ribka, nokopuanak-o iyo nu duo kusoi minuapid. 25Kulit nu ongko ri mongkomiang-miang om kibulu soko sabung okapal. Indadi, iningoranan sono iyo so si Isau. 26Lumangus nai' koduo ri, palad niyo ri nikuyut so botu ni Isau. Indadi, iningoranan sono iyo so si Yakub.#25:26: Orati yo po nu Yakub so tangar Ibrani nga, moongaakal, om ogon-ogon muinong nu tangar “botu”. Iya oono umur ni Isak onom nopulu toun.

Niwoli ni Isau kosongopanan niyo nu anak ongko

27Kiduo lolaing iiri nga inumayo yo. Si Isau moilo mogasu om ototom mian so gowuton, nga si Yakub olimomod om dadan mogol so kobosolagan. 28Somodan sobana ni Isak si Isau so' ototom iyo mongokan nu inimporian, nga ong si Ribka osamod po so si Yakub.

29Ido runat, iya nu monarug si Yakub nu bolatung omiang, nokouli' sono si Isau kiat so pinogosuan, om sobana ko witilon iyo. 30Mutongaro yo iyo so si Yakub nu, “Witilon aku sobana itu no. Taaki aku po sabat nu sinarug nu bolatung omiang mu no!” koo. Iri yo ko' ingoranan-a iyo nu si Idum.#25:30: Ngaran Idum so tangar Ibrani ogon-ogon muinong nu tangar “omiang”.

31Sumombuto yo si Yakub nu, “Oo, nga wolii po laid so aku kosongopanan mu nu anak ongko no,” koo.

32Sumombuto yo si Isau nu, “Oo, d'ado ya kosudaan ku nu ono. Taaki aku yo! Mokipopatoi aku yo itu nu witil,” koo.

33Mutongaro yo si Yakub nu, “Nga pongibot po laid nu itaak mu ya so aku kosongopanan mu nu anak ongko no,” koo.#Ibr 12:16

Mongiboto yo sono si Isau om posongapan-i yo niyo so si Yakub. 34Noopod iri, taaki yo sono ni Yakub si Isau nu baang-baang om somangkuk sinarug nu bolatung omiang. Mongokano om monginumo yo si Isau om momponowo yo. Soko iri yo dai ikaayo ni Isau so inawo niyo kosongopanan niyo nu anak ongko ri.

Currently Selected:

Pinongurugan 25: TomPWPgLgPn

Highlight

Copy