Pinongurugan 20

Si Abraham om si Raja Abimilik

1Indadi, murongkato yo sono si Abraham kiat so Mamri, mian umpak so solatan nu tana' Kanaan, om tumotogo yo iyo molak so puola'an nu Kadis om Sur. Iya oono molak-polak-a iyo so Girar. 2Pagka tinangar ni Abraham nu si Sara yo po adi' niyo, suuo yo sono ni Abimilik, raja nu Girar, iri moomugogoma'on niyo ri mongowit so si Sara dii so iyo, olapon nu sawo.#Pgn 12:13; 26:7

3Nga awi ri, mintolango yo Kinoringan so upian ni Abimilik om mutongaro yo nu, “Pagka inalap mu woinoi oono, matoi ko, so' kisawo yo iyo,” koo.

4Nga dai po norompitan ni Abimilik si Sara, indadi mutongaro yo sono iyo nu, “Oo Tuhan, ado ya sala' ku! Kodi aku yo ukumo om ongo bansa ku no. 5Si Abraham-o kondiri minutangar nu, woinoi oono adi' niyo kolaai, om woinoi oono nga soko ono ya tangar. Owarong-a tomod ku momaal nu ono. Indadi ado ya sala' ku,” koo.

6Koo Kinoringan so upian niyo nu, “Oilaan Ku ya nu owarong-a tomod mu momaal nu ono. Ono yo ko' dai Ku ya ikau posimaidan momaal nu koraayan mongondot nu woinoi oono. 7Nga kosiono poulio yo iyo so sawo niyo no. Sawo niyo oono poo'abar nu Kinoringan. Mogdu'a iyo so ikau su' dai ko matoi. Nga bang dai mu iuli' woinoi oono, ikau om poranak mu oluwus matoi,” koo.

8Susuab-i, soginaa yo ni Abimilik kiawi' moomugogoma'on niyo ri om obari yo niyo nu iri. Sobana ko linumaa' sono nosiro. 9Soko iri po, soginaa yo sono si Abraham ni raja Abimilik, om duato yo niyo nu, “Nokuro su soko ono waalon mu so kai? Onu sala' ku so ikau, su koowit ko nu kopotoyan so aku om poranak ku? Sobana ko dai musuat gama' mu oono so aku. 10Nokuro su soko ono waalon mu?” koo.

11Sumombuto yo si Abraham nu, “Oo raja, intaman ku ya bo ong ado ido kotondu' nu Kinoringan tuui, om potoyon aku sono nu lobuw moingin nu sawo ku no. 12Om bana ya nu adi' ku iyo. Muido ya amo mai, nga kopusondiang nu ino, indadi minuontun kai sono. 13Ono yo ko', iya nu sinuu' aku nu Kinoringan posondiang kiat so ino amo ku, om mogilolongkop so tontong sondiang, inupakat ku sono sawo ku no nu, ‘Pointolango yo koototog mu so aku nu mutangar so kiawi' lobuw nu aku yo po ongko mu,’ k'aku,” koo si Abraham.

14Soko iri po, ulii yo ni Abimilik si Sara dii si Abraham. Om iya ya iiri pinonaakan niyo so si Abraham nu kouriponan, kambing, dumba, om sapi. 15Mutongaro yo raja iiri so si Abraham nu, “Kiawi' tana' iitu no songapan ku. Pomili' ya ong siombo koinginan mu tumotog molak,” koo. 16Mutongaro po iyo so si Sara nu, “Tinaakan ku yo ongko mu no oribu siin pirok, pongimbonaan nu kiawi' lobuw nu bana ko ado ya sala' mu,” koo.

17-18Iya iiri, dai pinopoganak nu TUHAN kiawi' woinoi so waloi ni Abimilik so' iri nourug so si Sara, sawo ni Abraham. Nga nobogdu'a si Abraham so Kinoringan, om pinoli'an sono nu Kinoringan si Abimilik, sawo niyo ri, om kouriponan niyo woinoi, om kopoganak-o sono.

Currently Selected:

Pinongurugan 20: TomPWPgLgPn

Highlight

Copy