Pinongurugan 21

Kinopuonakan so si Isak

1Binorokatan nu TUHAN si Sara, soko nokojanji yo Niyo nu gulu ri. 2Nologa' po iya notantu yo nu Kinoringan, nu otuo yo si Abraham, minomontian-o sono si Sara om minuanak-o nu kusoi.#Ibr 11:11 3Ingorani yo ni Abraham anak iiri so si Isak. 4Kowoluan nai' umur ni Isak, sunati yo ni Abraham musuat nu ponuu'an nu Kinoringan.#Pgn 17:12; P'rapan 7:8 5Maatus-o toun umur ni Abraham nu kinopuonakan so si Isak.#21:5: Orati yo po nu Isak so tangar Ibrani nga, kokaayak iyo (Bosa'on po Pgn 17:17-19). 6Mutongaro yo si Sara nu, “Nopopuayak Kinoringan s'aku nu osudu'an. Isai yo po korongou nu itu no, osudu'an-a,” koo. 7Mutongaro po iyo nu, “Kiawi' lobuw nokoputangar so sawo ku no nu dai aku yo kopuanak. Soko ono pona, nokopuanak aku po pudi otuo yo sawo ku no,” koo.

8Umayo yo sono si Isak, om runat nu pinomupuan so iyo tumiti' ri, momaalo yo si Abraham nu rami-rami maayo.

Sinusub si Agar om si Ismail

9Ido runat, si Ismail, anak ni Abraham so si Agar woinoi kiat so Masir, minulilang siro si Isak, anak ni Sara. 10Nosiou ni Sara iri, tongaro yo sono niyo si Abraham nu, “Susubo yo uripon woinoi oono om anak niyo no. Dai otoop kaalap anak niyo no nu boogian kiat so kokoyaan mu, nu opusaka ni Isak, anak ku no,” koo.#Gal 4:29-30 11Pagka si Ismail nga anak-a niyo, umogutan sono si Abraham nu upakat ni Sara iiri.

12Nga mutongaro yo Kinoringan so si Abraham nu, “Ikod-o kaagut suat so uripon mu oono om anak niyo no. Waid-o ya tangar ni Sara no, so' solusuk-a ni Isak su bana-bana yo nu solusuk mu.#Rm 9:7; Ibr 11:18 13Soko ono ya pudi anak ni Agar-o. Posuangon Ku ya solusuk niyo su' ourug nosiro nu osuang bansa, so' iyo nga anak mu ya,” koo.

14Susuab-i, taaki yo ni Abraham si Agar nu ingkookan om ido gilin winaal kiat so kulit kiasuw nu sungoi boota'on so lolanon. Ibai yo niyo lolaing iiri dii si Agar, om suuo yo popanou. Momponowo yo sono si Agar mogilolongkop so padang pantai so Birsiiba. 15Naawi' yo po su sungoi, susudi yo ni Agar anak niyo ri so sinupot, 16om mogomo yo iyo kiro-kiro maatus mitor korawu' kiat so pinosusudan niyo nu anak niyo ri. Mutongaro yo iyo so inawo nu, “Dai su kosoromo monsiou nu anak ku no matoi,” koo, om tumongio yo sono iyo.

17Norongou-a nu Kinoringan tangi' ni Ismail. Mutongaro yo sono susuu'on nu Kinoringan kiat so langit so si Agar nu, “Oo Agar, onu ka koogutan mu no? Ikod kilaa'. Norongou-o nu Kinoringan tangi' nu anak mu no. 18Pululi' yo so anak mu no, om lilio yo monginsosamod. Siliwon Ku solusuk niyo nu bansa obantug,” koo.

19Potorango yo nu Kinoringan ponsiowan ni Agar, om nokosiou-o iyo nu ido porigi. Miano yo sono iyo posagob nu gilin kulit iiri om poinumo yo anak niyo ri. 20Waid-waidon-a nu Kinoringan si Ismail. Maayo yo sono iyo. Tumotogo yo iyo molak so padang pantai nu Paran, om nourug iyo nu moomogasu nu sobana ko oilo. 21Pinoontun sono iyo ni ino niyo nu woinoi kiat so Masir.

Janji ni Abraham om ni Abimilik

22Iya oono, lumogaa yo si Raja Abimilik om si Pikul, wowaidon nu soujar niyo ri dii si Abraham om mutongaro yo nu, “Tobangon ko nu Kinoringan so onu yo po waalon mu.#Pgn 26:26 23Indadi pongibot-o so tiningkuangon nu Kinoringan nu dai ko ya mongoraai so aku, om inonakan ku intawa solusuk ku. Soko koowarong ku so ikau, soko ono ya pudi ikau s'aku om so tontong pinolakan mu tu,” koo.

24Sumombuto yo si Abraham nu, “Oo, mongibot aku yo,” koo.

25Nga nokopuinduo sono si Abraham so si Abimilik suat nu porigi sinolod nu uripon nu raja oono. 26Sumombuto yo sono si Abimilik nu, “Dai ku ya oilaan ong isai su minonolod nu ono, om itu nai' su rongou ku nu ono. Dai ko ya insan mutangar suat nu ono so aku,” koo. 27Taaki yo sono ni Abraham si Abimilik nu dumba om sapi osuang, om mujonjio yo nosiro. 28Nopotondiang si Abraham turu uyog nu dumba kiat so baanan nu dumba niyo ri.

29Mongoduato yo sono si Abimilik so si Abraham nu, “Nokuro su soko ono waalon mu?” koo.

30Sumombuto yo si Abraham nu, “Olapo yo kituru anak nu dumba iitu, pongokunan mu nu aku yo su minomaal nu porigi iitu,” koo. 31Iningoranan sono tontong iiri nu Birsiiba,#21:31: Orati yo po nu Birsiiba so tangar Ibrani nga, porigi pinuibotan, intawa, porigi turu (Bosa'on po Pgn 26:33). so' nai yo pinujonjian nu duo koyuwan oono maid nu ibot.

32Nokopujanji yo po si Abraham om si Abimilik, mululio yo si Abimilik om si Pikul so tontong nu lobuw Pilistin. 33Momuloo yo sono si Abraham sompuun kayu ingoranan nu tamariska so Birsiiba, om kiat nu iri, inurug sono niyo tontong iiri nu pongusaa'an so TUHAN Kinoringan iri miau musingkolaid. 34Olaid-laid-a si Abraham minolak so wonuo nu lobuw Pilistin.

Currently Selected:

Pinongurugan 21: TomPWPgLgPn

Highlight

Copy