Pinongurugan 19

Koraayan nu lobuw so Sodom

1Nokopusambat-o po so si Abraham, miano yo susuu'on nu Kinoringan iiri so bandar Sodom om nokologa' umpak nu awi. Iya oono mogom-ogom si Lut so obi' nu pintu nu bandar-i. Nosiou-o po niyo nosiro, mundiio yo iyo monamung so nosiro. Sumurukudo yo iyo so tiningkuangon nosiro ri, 2om mutongaro yo nu, “Oo tuan, ambai kou po so waloi ku. Puugas kou yo nu akod om poturuw kou po so waloi ku. Musarap kou ya suab lumombus,” koo.

Nga sumombuto yo nosiro nu, “Biaran, moturuw kai ya so padang nu bandar tu,” koo.

3Nga pagka sinosogan-a ni Lut, maido yo nosiro masuw so waloi niyo ri. Momolako yo sono si Lut nu ingkookan ongo wowarong, om minongoluu nu baang-baang muuma' so nosiro, om mongokano yo nosiro.

4Nga dai po nokoturuw tombuoi iiri, lumogaa yo su koomulokan om kotutuaan nu bandar Sodom mongoliwut nu waloi iiri. 5Paawo yo nosiro si Lut nu, “Siombo yo lobuw minaloi tuui so ikau-i? Polobuso po su' kopuuna'-una' kai so nosiro,” koo.

6Lumobuso yo si Lut, om tutubo yo niyo pintu ri. 7Mutongaro yo iyo so lobuw iiri nu, “Oo su kosusulodan, mindamo aku sobana so kou nu adang-o raayon nosiro. 8Rongowo muyu yo, kianak aku duo roraa. Itaak ku ya nosiro so kou, om waalo muyu yo onu-onu ya koinginan muyu so nosiro, nga kodi muyu yo kuro-kuroo duo tombuoi ku tu, so' opatut aku mongingolig so nosiro,” koo.#Hak 19:22-24

9Nga sumombuto yo nosiro nu, “Pulaiw-o! Lobuw ko ya kiat so tontong sondiang om musingkoukum-ukum ko sono so kai? Pulaiw-o osikap! Bang dai ko mulaiw, ikau-o su insaadan mai owogat po ko' duo koyuwan oono,” koo. Tuuri yo sono nosiro si Lut om rumonio yo, padu mongouyas nu pintu ri, 10nga pudiko yo nu duo tombuoi-i si Lut paasuw om tutubo yo nosiro su pintu. 11Pinobolou sono nu duo koyuwan oono ongo lobuw-i su' dai oimpolonuan su pintu.#2 Raj 6:18

Minulaiw si Lut kiat so bandar Sodom

12Mutongaro yo sono duo tombuoi iiri so si Lut nu, “Bang kianak ko nu kokusoyan om kowoinoyan, kotakin intawa suku-sakat mu wokon so bandar iitu, owarong owiton mu nosiro mulaiw kiat tuui, 13so' raagon mai bandar iitu. Norongou-o nu TUHAN koraayan nu kiawi' lobuw so tontong iitu, om sinuu' kai mongoraag nu itu,” koo.

14Miano yo sono si Lut sumambat nu duo koyuwan minomogong nu kiduo anak niyo ri, om tongaro yo niyo nu, “Lumabus toko yo osikap. Usiba'on nu TUHAN tontong iitu no,” koo, nga ontaman nu duo koyuwan minomogong-i nu mugawuk-a si Lut so nosiro.

15Duruk sumuab-i, ogaro yo si Lut nu duo susuu'on iiri polaiw nu, “Sikap-o ya mulaiw maid nu anak sawo mu no su' dai kou kowaid matoi nu iya pongoraagan nu bandar iitu,” koo. 16Mupiduo ya inawo ni Lut, nga pagka oluluudan-a TUHAN so iyo, tundano yo nu duo tombuoi iiri si Lut om anak sawo niyo ri lumabus.#2 Ptr 2:7 17Nopupus iri, mutongaro yo ido susuu'on-i nu, “Undak kou yo, su' osapul kou! Adang-o kumowii om adang-o mintoron so gona' no. Undak kou yo so kobubuludan-o su' dai kou matoi,” koo.

18Nga sumombuto yo si Lut nu, “Atuuk tuan, kodi kai yo suuo poundak so kobubuludan oono. 19Bana ya nai' nu tinabang om sinapul mu aku, nga orawu' sobana bo ong kobubuludan oono, kalu osuut kai nu kosusaan oono om matoi kai nu dai po kologa' nai. 20Siowi bo so sunduron-o nga kuwai bandar oworos, dai yo orawu' bana. Lilai aku yo mian nai su' osopulan aku,” koo.

21Sumombuto yo susuu'on iiri nu, “Oo, dai ku ya raagon ong bandar oworos oono. 22Sikap-o muyu ya! Dai po su kopomaal nu onu-onu ong dai kou kologa' nai,” koo.

Pagka pinokoworos ni Lut bandar iiri, iningoranan sono bandar iiri nu Joar.#19:22: Joar: Ngaran iitu koinong-inong mi tangar Ibrani nu “oworos”. orati oworos.

Noraag su bandar Sodom om Gomura

23Musit-o su runat nu kinologa'an ni Lut so bandar Joar iiri. 24Milok po om posondoto yo TUHAN nu morirang#19:24: morirang: Siowan Kamus Kitab. kiapui sobana ko maamut so bandar Sodom om Gomura. 25Kiduo nu bandar oono nga noraag, soko ono ya pudi gona', tonom-tonoman om kiawi' lobuw minolak dii ri.#Mat 10:15; 11:23-24; Luk 10:12; 17:29; 2 Ptr 2:6; Yud 7

26Nga kinumowii sawo ni Lut om minusiliw sono nu kotul nu asin.#Luk 17:32

27Susuab-i, mogowo yo si Abraham mian so tontong inundiian niyo so tiningkuangon nu TUHAN sondunat nokotalib-i. 28Monomburorowo yo iyo so bandar Sodom om Gomura, om so pilolongkop nu gona' ri, om nosiou-o sono niyo su lisun sumomput kiat so tontong iiri, soko lisun nu ponginopuyan maayo. 29Nga iya nu Kinoringan mongoraag nu ongo bandar so gona' pinolakan ni Lut, noondoman-a Niyo si Abraham om tinabang sono Niyo si Lut polaiw.

Inimpuunon nu lobuw Muab om Amun

30Pagka lumaa' si Lut tumotog molak so Joar, miano yo iyo so kobubuludan maid nu duo anak roraa niyo ri, om molako yo nosiro so uang nu watu. 31Mutongaro yo sono anak ongko ni Lut so adi' niyo ri nu, “Otuo yo si apa, om ado ido ya omulok so pilolongkop nu tontong iitu mongontun so kito, su' kianak kito. 32Nga poowuko to po si apa, om mondot kito sono su' kisolusuk si apa,” koo. 33Awi ri sono, poinumo yo nosiro amo nosiro ri nu anggur, om mondoto yo anak ongko ri so amo niyo ri, nga dai ya noilo-ilaan nu amo niyo ri ong onu nourug so' sobana ko noowukan iyo.

34Susuab-i mutongaro yo ongko ri so adi' niyo ri nu, “Nokoondot aku yo so si apa siawi. Indadi, awi tu poowukan to yo iyo koimbagu om ikau po sono mondot so iyo, su' kisolusuk si apa,” koo. 35Awi ri, poowuki yo nosiro si Lut om mondoto yo sono anak koduo niyo ri so iyo, om soko iri ya nu dai ya noilo-ilaan ni Lut ong onu nourug, so' sobana ko noowukan iyo.

36Indadi, minomontian-o sono kiduo anak ni Lut iiri, so' kiat-a dii so amo nosiro ri. 37Nokopuanak-o ongko iiri nu kusoi, om iningoranan so si Muab.#19:37: Orati yo po nu ngaran Muab so tangar Ibrani nga, anak kiat so amo ku. Iyo yo su aki rumpungan nu lobuw bansa Muab nu ono sono tu. 38Toudi ri nga nokopuanak-a nu kusoi, om iningoranan so si Bin-Ami.#19:38: Orati yo po nu ngaran Bin-Ami so tangar Ibrani nga, anak kiat so suku-sakat ku, om tangar iitu ogon-ogon muinong nu tangar “lobuw Amun”. Iyo yo su aki rumpungan nu lobuw bansa Amun nu ono sono tu.

Currently Selected:

Pinongurugan 19: TomPWPgLgPn

Highlight

Copy