Pinongoorapan 6

Turu koyuwan pinili' monabang

nu balu omiskin

1Dai po olaid, pagka muririnuang lobuw poimaid so si Yisus, musosagka' sono lobuw Yaudi mutangar nu tangar Yunani ri om lobuw Yaudi mutangar nu tangar Ibrani ri. Lobuw mutangar nu tangar Yunani ri minutangar nu, balu nosiro dai kotorima' nu siin tulungan runat-runat suat so balu. 2Pagka soko iri, popuimpugo yo nu opulu om duo pinongoorapan ni Yisus kiawi' lobuw poimaid-i om mutongaro yo nu, “Dai kai otoop ponuturanan dadan suat nu kosiinan tu, so' dai kai kotoroido monuturan nu tinongaran nu Kinoringan. 3Indadi pomili' kou yo turu koyuwan so kou, isai su opatong, kinuasa nu Atod nu Kinoringan, om bana ko oilo, nu opongoorapan mai nu gogoma'on oono. 4Bang soko ono, kotoroido kai sono mogdu'a om paabar nu tinongaran nu Kinoringan,” koo.

5Kiawi' lobuw nokotaayun-a nu upakat nu opulu om duo pinongoorapan-i, om pilio yo nosiro si Stipanus lobuw sobana ko opiot koimaidan-i, om dadan kuosaan nu Atod nu Kinoringan, om si Pilipus, si Prokurus, si Nikanur, si Timun, si Porminas, om si Nikulaus lobuw nu Antiukia okon ko bansa Yaudi nga minasuw iyo nu ugama Yaudi. 6Owito yo sono turu koyuwan oono nu lobuw wokon poimaid-i sumambat so pinongoorapan-i, om mogdu'aa yo nosiro maid nu potopop nu palad nosiro so ulu nu turu koyuwan-i monapus nu gogoma'on nosiro.

7Indadi sumunduro sono kolongkop paabar tinongaran nu Kinoringan. Mompomaid ni Yisus so Yirusalim nga rumuang sono, om imam nga osuang nopoimaid so si Yisus.

Inakom si Stipanus

8Si Stipanus-o po sobana ko binorokatan nu Kinoringan om tinaakan nu kuasa momaal nu koiran-iran om ponondu'an so tiningkuangon nu lobuw suang. 9Nga tinu-tinu koyuwan lumawan so iyo. Nosiro oono kiat so puimpugan so waloi sosombooyangan nu lobuw nokolabus kiat so pinonguriponan. Nosiro yo po lobuw Yaudi kiat so Kirini, Aliksandria, Kilikia om kiat so wonuo nu Asia. 10Nga Atod nu Kinoringan su nopoputangar so si Stipanus nu sobana ko oilo, sampai dai kosambut nosiro ong mutangar iyo. 11Taaki yo nosiro lobuw wokon-i nu siin, om upokato yo nu popomuduton nu, “Norongou mai si Stipanus mubaag so si Musa om Kinoringan,” koo. 12Soko ono yo gama' nosiro poungot nu lobuw suang, wowaidon nu lobuw Yaudi, om moomontuduk nu Ukum ni Musa. Okomo yo sono nosiro si Stipanus potingkuang so Poongobisora'an nu Ugama 13om owito yo nosiro lobuw moomudut om poputongaro yo nu, “Obulit lobuw iitu mubaag nu Waloi Maayo nu Kinoringan mai, om Ukum nu Kinoringan iri nilombus ni Musa. 14Norongou mai iyo mutangar nu, si Yisus, lobuw Najarit-i monguyas nu Waloi Maayo nu Kinoringan iitu, om mominda nu adat noguru' toko kiat so si Musa!” koo nosiro. 15Lobuw suang so Poongobisora'an nu Ugama ri momontong so si Stipanus, om osiou nosiro buatan niyo soko buatan nu susuu'on nu Kinoringan.

Currently Selected:

Pinongoorapan 6: TomPWPgLgPn

Highlight

Copy