Pinongoorapan 5

Si Ananias om si Sapira

1Kuwai ido kusoi ngaran niyo si Ananias, om sawo niyo si Sapira. Nopowoli si Ananias nu tana' songapan nosiro. 2Nitou' niyo sombaagi' nu siin orogo ri nu songapan nosiro, om wokon-i nitaak niyo so pinongoorapan-i, om noilaan-a iri nu sawo niyo ri. 3Pagka soko iri, tongaro yo ni Pitrus si Ananias nu, “Sobana ko oraai su pinotuudan mu Wowaidon nu Moinat-o mogkuasa so ikau, nu minomudut ko so Atod nu Kinoringan. Inolim mu sombaagi' nu siin orogo nu tana' niwoli muyu ri. 4Dai po nokowoli mu tana' iiri, ikau so songapan, nga nokowoli mu ya tana' oono, sinongapan mu ya orogo no. Nokuro su tinapus mu momaal soko ono? Okon ko momudut ko so lobuw-a, nga momudut ko po so Kinoringan!” koo si Pitrus. 5Pogrongou ni Ananias nu tangar ni Pitrus iiri, linumuluk-a iyo matoi. Kiawi' lobuw nokorongou so si Pitrus om nokosiou nu iri, sobana ko linumaa'. 6Mosuwo yo sono koomulokan-i, monolui nu bangkai ni Ananias, om owito yo nosiro polobong.

7Kiro-kiro tolu nojaam kiat nu iri, mosuwo yo sawo ni Ananias, nga dai noilaan niyo ong onu nourug so sawo niyo ri. 8Posiowi yo ni Pitrus so iyo siin iiri om duato yo nu, “Itu yo ka kiawi' siin orogo nu tana' niwoli muyu ri?” koo.

Sumombuto yo sawo ni Ananias nu, “Oo bana ya!” koo.

9Mutongaro yo si Pitrus nu, “Oraai sobana kou su tinapus muyu monginam nu Atod nu Tuhan mongilo ong onu waalon Niyo. Rongowo yo! Nokouli' yo lobuw nopolobong nu sawo mu ri, om mundii-dii nosiro so labus-o monganggung#5:9: monganggung; intawa: mongoranggung so ikau pona,” koo. 10Na, linumuluk-a iyo matoi so akod ni Pitrus. Nokaasuw koomulokan-i, om noilaan nu minatoi-o sawo ni Ananias, owito yo sono nosiro polobong, pinoruruw-a so lobong nu sawo niyo ri. 11Kiawi' lobuw nopoimaid so Yirusalim, om lobuw wokon nokorongou nu iri sobana ko linumaa'.

Ponondu'an om koiran-iran winaal

nu pinongoorapan

12Osuang ponondu'an om koiran-iran winaal nu pinongoorapan iiri. Kiawi' lobuw poimaid-i dadan muimpug so Pontaan ni Salumu so natad nu Waloi Maayo nu Kinoringan. 13D'ado ido koyuwan wokon kooku' mokimuido so nosiro, pudi pona orumaton nosiro nu lobuw suang, 14nga sumuang-a lobuw poimaid so Tuhan, woinoi kusoi. 15Nosiou-o po nu lobuw suang-i koiran-iran winaal nu pinongoorapan-i, owito yo sono nosiro lobuw sumakit so isan nu lalan-i. Nigili nosiro so onggung om poomoturuwan su' bang tumalib si Pitrus, pudi osuat-a nu lulungung niyo, opoli'an-o nosiro. 16Osuang po lobuw kiat so tontong wokon so Yirusalim linumoga' dii mongowit nu lobuw kiosakit om lobuw sinorungan nu moinat, om kiawi' nosiro nopoli'an.

Sonsora'on ongo pinongoorapan

17Laid nu laid mokimalun sono Imam Maayo, om moongowaid so iyo, ono yo lobuw so puimpugan nu Saduki, so' moingin sobana lobuw suang-i maid so pinongoorapan-i om okon ko so nosiro. Indadi mokipopononsara' sono nosiro nu pinongoorapan-i. 18Okomo yo nosiro pinongoorapan-i, om jiilo yo. 19Nga awi ri, sukabo yo pintu nu jiil-i nu ido susuu'on nu Kinoringan, om owito yo pinongoorapan-i lumabus, om tongaro yo niyo nu, 20“Ian kou yo so natad nu Waloi Maayo nu Kinoringan, potuturan so lobuw suang dii onu koo kaalap nu kowiawan musingkolaid,” koo. 21Osipo yo nu pinongoorapan-i kodau nu susuu'on-i. Osarap po, mosuwo yo sono nosiro so natad nu Waloi Maayo nu Kinoringan-i montuduk.

Laid nu iri, paawo yo nu Imam Maayo om moongowaid so iyo ri ongo wowaidon nu lobuw Yaudi ri popuimpug muupakat so Poongobisora'an nu Ugama. Nadi monuuo yo nosiro nu lobuw mongalap nu ongo pinongoorapan nojiil-i, nu poundiion so tiningkuangon nu puimpugan nosiro ri. 22Nga nokologa' yo po nosiro so jiil, dai ya nooyangan nosiro pinongoorapan-i, indadi minululi' ya sono nosiro so puimpugan-i, pokoilo nu, 23“Nokologa' kai yo so jiil, nosiou mai pintu ri nopiot-a mongondadu, om moongipat-i nga modia'-sodia' ya so pintu ri. Nga sukabo mai pintu ri, d'ado ido koyuwan nosiou mai so dilalom-i,” koo. 24Norongou-o po tuturan nosiro iiri nu Imam Maayo om wowaidon nu moongipat nu Waloi Maayo nu Kinoringan-i, noiranan sono nosiro ong onu orati nu iri. 25Mosuwo yo sono ido koyuwan so puimpugan-i pokoilo nu, “Rongowo muyu! Lobuw jiniil muyu ri, dii so natad nu Waloi Maayo nu Kinoringan montuduk nu lobuw suang,” koo. 26Indadi, miano yo sono wowaidon nu moongipat nu Waloi Maayo nu Kinoringan om kouna'an niyo ri mongalap koimbagu nu pinongoorapan-i, nga dai ya nosiro sinosogan, so' lumaa' nosiro pilayon nu lobuw suang-i.

27Owito yo nosiro opulu om duo pinongoorapan iiri so tiningkuangon nu puimpugan-i, om duato yo nu Imam Maayo ri nu, 28“Pinogos mai yo boto kou nu dai popontudukon so lobuw nu nipotuduk ni Yisus so kou, nga nopolongkop kou nai' nu ono so Yirusalim, om tinapud muyu kai nu kai yo su minomatoi so Iyo,” koo.#Mat 27:25

29Sumombuto yo si Pitrus om pinongoorapan wokon-i nu, “Subai maid kai nu suu' nu Kinoringan, okon ko suu' muyu no. 30Si Yisus, iri nisalib muyu ri, linuli'an-o nu Kinoringan, iri usaa'on nu odu aki toko ri. 31Iyo yo su pinangkat nu Kinoringan umpak so wanan Niyo, sumiliw nu Wowaidon om Poowiau, su' bang rumorogo ongo lobuw Israil kiat so koraayan, ompunan nosiro nu Kinoringan om miau musingkolaid maid so Iyo. 32Pokoilo kai yo so lobuw suat so si Yisus, om tobangon kai nu Atod nu Kinoringan, iri nitaak nu Kinoringan so lobuw mongimaid nu ponuu'an Niyo,” koo.

33Norongou-o po iri nu lobuw so puimpugan-i, sobana ko minungot nosiro om pokipopotoyan-o nosiro pinongoorapan-i. 34Nga kuwai ido lobuw Parisi, ngaran niyo si Gamalil, moomontuduk nu Ukum nu sobana ko orumaton nu kiawi' lobuw Yaudi. Mundiio yo iyo so tiningkuangon nu puimpugan-i, om suuo yo niyo nu polobuson sontagal pinongoorapan-i. 35Nokolabus nosiro, mutongaro yo iyo so puimpugan-i nu, “Oo su kosusulodan ku lobuw Israil, otago muyu mongiro-kiro ong onu waalon muyu so lobuw oono. 36Ondomo muyu si Tiudas iri linumawan nu lobuw Ruum nu gulu ri. Nopaabar iyo nu iyo yo su maayo pangkat, om kiro-kiro opat naatus koyuwan minongowaid so iyo. Nga nopatoi-a iyo, om kiawi' moongowaid so iyo ri noboiasan. 37Nopupus iri, ido po koyuwan ingoranan so si Yudas kiat so wonuo nu Galilia linumawan-a nu lobuw Ruum, iya nu pongiapan nu lobuw ong komuro kosuang, om osuang-a lobuw minongowaid so iyo, nga nopatoi ya pudi iyo, om noboiasan-a moongowaid so iyo ri. 38Nadi soko ono ya pudi ono sono tu. Pokoilo aku so kou nu adang-o kuro-kuroon lobuw iitu no. Potuudan-a nosiro, so' onu yo po pokigogoma'an, bang gogoma'on-a nu lobuw, ado kosunduran nu ono. 39Nga bang kiat itu no so Kinoringan, dai kou kopongodoog so nosiro, ala' nai' kopualod kou nu Kinoringan ong wagu!” koo si Gamalil.

Osipo yo nosiro pongobiatan ni Gamalil. 40Poosuwo yo nosiro koimbagu pinongoorapan-i, lubako yo nosiro, om pinogos nu dai poponuturanon so lobuw suat so si Yisus. Nopupus iri, polobuso yo sono nosiro. 41Mulaiwo yo ongo pinongoorapan iiri kiat so puimpugan-i maid nu osudu'an, so' pinokotoop nosiro nu Kinoringan sumonsara' suat so si Yisus. 42Runat-runat pinongoorapan-i sumundur montuduk so natad nu Waloi Maayo nu Kinoringan om so waloi nu lobuw suang, paabar nu si Yisus-o su Raja Nijanji nu Kinoringan.

Currently Selected:

Pinongoorapan 5: TomPWPgLgPn

Highlight

Copy