Pinongoorapan 4

Inowit si Pitrus om si Yuanis so Poongobisora'an nu Ugama

1Laid po ni Pitrus om ni Yuanis mutangar-tangar so lobuw suang-i, lumogaa yo sono su imam, wowaidon nu moongipat nu Waloi Maayo nu Kinoringan om tinu-tinu lobuw Saduki.#4:1: Saduki: Siowan Kamus Kitab. 2Minungot sobana nosiro so' montuduk si Pitrus om si Yuanis so lobuw suang-i, nu noluli'an si Yisus om ono yo su pointolang nu oluli'an-a lobuw minatoi. 3Indadi, okomo yo sono nosiro duo koyuwan-i, om pagka awi-awi-o tinaan po nosiro so jiil musingkosuab. 4Nga osuang-a lobuw nopoimaid nu nokorongou nu pontudukan iiri, om rumuang sono koosuang nosiro kiro-kiro limo noribu kokusoyan.

5Pogsusuab, muimpugo yo wowaidon nu imam, wowaidon nu lobuw Yaudi, om moomontuduk nu Ukum dii so Yirusalim. 6Minuimpug nosiro maid nu Imam Maayo si Anas, si Kayapas, si Yuanis, si Aliksandir om wokon po kiat so suku-sakat nu Imam Maayo. 7Poundiio yo nosiro si Pitrus om si Yuanis so tiningkuangon nosiro ri om duato yo nu, “Onu koo ka gama' muyu momaal nu kiawi' iitu? Om onu nu kuasa intawa isai inungkiaton nu kuasa pinongowaal muyu nu ono?” koo.

8Kinuasa si Pitrus nu Atod nu Kinoringan om sumombuto yo sono iyo nu, “Oo su wowaidon nu imam om wowaidon nu lobuw Yaudi, 9duaton muyu kai gaam nu runat iitu suat so ginama' mai owarong so lobuw kakung iitu? Om mokikoilo kou gaam ong onu nokopali' mai so iyo? 10Na, pokoiloon ku kou om kiawi' lobuw Israil nu nokopali' yo po so iyo om mundii-dii sono so tiningkuangon muyu tu, nga iri yo kuasa ni Yisus Kristus, lobuw Najarit-i, iri sinalib muyu ri, nga linuli'an-a nu Kinoringan. 11Si Yisus-o su kuanon nu nokosurat so Buuk nu Kinoringan nu,

‘Iri watu niada' nu moomuwaloi,

oogot po nai' kosudaan

ko' kiawi' watu so waloi oono,’

koo ri.#Lgu 118:22 12Si Yisus-o su koponapul nu lobuw tu, so' d'ado wokon so wonuo tu tinaakan nu Kinoringan nu kuasa koponapul so toko,” koo si Pitrus.

13Noiranan lobuw so Poongobisora'an iiri nu koopogi om koo'ilo ni Pitrus om ni Yuanis, so' noilaan-o nosiro nu duo koyuwan oono lobuw-a koopotan om dai ya nokopoguru', om otondu'an po nosiro nu gulu ri maid-waid duo koyuwan oono so si Yisus. 14Nga dai nokoimbongut nosiro, so' nosiou-a nu ongo lobuw-i lobuw nopoli'an-i mundii-dii so obi' ni Pitrus om ni Yuanis. 15Indadi suuo yo sono nosiro duo koyuwan oono lumabus, om muupokato yo nosiro nu, 16“Onu ka mutoop waalon toko so duo koyuwan iitu? Kiawi' lobuw so Yirusalim nokoilo yo nu minomaal nosiro nu koiran-iran iitu no, om dai toko oolim. 17Indadi, owarong ong pogoson toko nosiro paabar suat so si Yisus so lobuw suang, su' dai kolongkop abar oono,” koo.

18Nokopuupakat-o po nosiro, poosuwo yo nosiro duo koyuwan oono koimbagu, om pogoso yo nosiro nu dai popongoobaron suat so si Yisus intawa montuduk suat so Iyo. 19Nga sumombuto yo si Pitrus om si Yuanis nu, “Poputodi-todio muyu ya ong ombo su obana so tiningkuangon nu Kinoringan, mongowaid kai so kou, intawa mongowaid kai so Kinoringan, 20so' d'ado kointoronan ong kai mongaabar so lobuw suang nu onu ya nosiou om norongou mai,” koo. 21Nga wowaidon nu puimpugan oono koogaran nai' momogos nu duo koyuwan-i, nga koompusan pinolabus-a nosiro. Oilaan nosiro nu d'ado po pounayan monginsaad so si Pitrus om si Yuanis, so' lobuw suang-i mongorayou nu Kinoringan suat nu noongourug iiri. 22Om ponokodan nu lobuw suang-i nu sobana ko koiran-iran iri, so' lobuw nopoli'an-i talib-o opat nopulu toun umur.

Nobogdu'a puimpugan nu lobuw poimaid mindamo nu koopogi

23Nokolabus-o po si Pitrus om si Yuanis, mulio yo nosiro so kouna'an nosiro ri, om obari yo nosiro tinangar nu wowaidon nu imam om wowaidon nu lobuw Yaudi ri. 24Norongou-o po iri nu kouna'an nosiro ri, muiyaa yo nosiro mogdu'a nu, “Oo Tuhan Kinoringan, Ikau-o su minongowangun nu wonuo tu, langit, raat om kiawi' asuw-o.#Kin 20:11; Nih 9:6; Lgu 146:6 25Mongowaid nu nituduk nu Atod Mu, minutangar uripon Mu si Raja Daud, aki rumpungan mai ri nu,

‘D'ado kosudaan nu mokimulawan

bansa wokon so Kinoringan

om lobuw songapan Niyo,

om muburung-burung

mupadu-padu

nu d'ado kosudaan.

26Insan wowaidon nu bansa oono

mugapi' lumawan so TUHAN

om Raja Nijanji Niyo,’

koo ri,#Lgu 2:1-2 27om nourug-a kiawi' oono.#Mat 27:1-2; Mrk 15:1; Luk 23:1,7-11; Yns 18:28-29

Minuupakat si Irudis om si Puntius Pilatus maid nu lobuw okon ko Yaudi om lobuw Yaudi so bandar iitu no lumawan so si Yisus, Susuu'on Mu sobana ko owarong, iri Nijanji Mu ri. 28Minuimpug nosiro momaal nu onu-onu notantu Mu yo nu togna ri, maid nu kobosagan om koinginan Mu. 29Oo Tuhan, siowi yo gama' nosiro pooyou so kai. Popogio kai yo, susuu'on Mu tu, su' kosundur kai paabar nu abar Mu nu okon ko maa'-laa'. 30Polio yo lobuw sumakit su' koorati lobuw suang nu bana ko kikuasa om obasag Ko. Om waalo yo koiran-iran mongorait nu ngaran ni Yisus, iri Uripon Mu nu sobana ko owarong,” koo du'a nosiro.

31Noopod nosiro mogdu'a, gumuguro yo pinogdu'aan nosiro ri, om pobosago yo nosiro nu Atod nu Kinoringan, om tinumimpuuno sono potuturan nu tinongaran nu Kinoringan nu sobana ko opogi.

Mu'uurung nu songapan lobuw poimaid-i

32Iri lobuw poimaid so si Yisus kopuiido inawo. D'ado ido monokod nu otoroidaan mononsongapan onu yo po gonggamon niyo, sondiang ko songapan kiawi'.#P'rapan 2:44-45 33Potuturan pinongoorapan iiri suat nu kinoluli'an ni Tuhan Yisus maid nu kuasa maayo, om sobana ko binorokatan nosiro nu Kinoringan. 34D'ado ido so nosiro osimpit. Iri kitana' om kiwaloi-i, powoli nu orata', om orogo ri 35nikomouli' nosiro so pinongoorapan-i, su' boogi'on so kouna'an nosiro musuat nu kosimpitan nu ido soido.

36-37Si Yusup nga nopowolii ya nu tana' niyo ri om orogo ri nikomouli' niyo so pinongoorapan-i. Si Yusup-o po solusuk nu Liwi, nopuanak so puru Siprus. Iningoranan iyo nu pinongoorapan-i so si Barnabas (orati yo po nu Barnabas nga “Lobuw koinsosamod nu Inawo”).

Currently Selected:

Pinongoorapan 4: TomPWPgLgPn

Highlight

Copy