Pinongoorapan 2

Kinologa'an nu Atod nu Kinoringan

1Nologa' yo po runat Rami-Rami Pintakusta,#2:1: Rami-Rami Pintakusta: Siowan Kamus Kitab. muimpugo yo kiawi' lobuw poimaid-i so ido tontong.#Ot 23:15-21; Pom 16:9-11 2Milok po su kuwai kai-kai osangat kiat so langit soko uos opogon tumouruk orongou nu kiawi' lobuw so waloi-i. 3Nokosiou-o sono nosiro nu soko sinikit nu apui minsid dii-tuui so waloi-i om manid so ongo lobuw-i. 4Kinuasa yo sono nosiro nu Atod nu Kinoringan, om tumimpuun-o mutangar nu sondiang tangar musuat nu nitaak nu Atod iiri so nosiro nu tongaron.

5Iya iiri osuang lobuw Yaudi, iri obinsuut nu ugama nosiro, nokologa' so Yirusalim kiat so pilolongkop nu wonuo. 6Norongou-o po kai-kai iiri, osuang sono lobuw minuimpug dii. Nokotigog nosiro nu norongou lobuw poimaid-i mutangar nu tangar nosiro ido soido. 7Sobana ko noiranan nosiro om mutotongar-tongaro yo nu, “Lobuw mutangar iitu lobuw nu Galilia, om d'ado ya koilo mutangar nu tangar toko dii so Galilia! 8Onu ka koo'ilo nosiro mutangar nu tangar toko? 9Inungkiaton toko yo po so Partia, Modia, Ilam, Misuputamia, Yudia, Kapadukia, Puntus, Asia, 10Pirigia, Pampilia, Masir om so wonuo nu Libia orani so Kirini. Om kuwai ya so toko ungkiat so Ruum, 11lobuw Yaudi om lobuw bansa wokon iri kiugama nu Yaudi ri. Kuwai ya so toko kiat so Kiriti om so Arab, nga norongou toko nosiro mutangar so tangar toko suat nu gogoma'on obantug nu Kinoringan,” koo. 12Noiranan sono nosiro om mududuato yo nu, “Onu gaam orati nu iri?” koo.

13Nga wokon-i muragam nu lobuw poimaid-i om mutangar nu, “Oowukan bo gaam kolobuwan iitu,” koo.

Sambut ni Pitrus so lobuw noiranan-i

14Nadi mundiio yo si Pitrus maid nu opulu om ido pinongoorapan-i om mutongaro yo iyo nu osangat nu, “Oo kosusulodan ku inong Yaudi om kou kiawi' minogol so Yirusalim, rongowo muyu yo tangar ku tu. Potarang aku nu orati nu itu. 15Kai yo po okon-a ko oowukan soko ponontaman muyu no, so' susuab po itu, om lobuw tuui d'ado moowukan ong umpit nu susuab. 16Nga ono yo po nosiou om norongou muyu no, notangar-o laid nu Kinoringan om nokosurat-o ni Yuil, iri poo'abar gulu ri nu,

17‘Soko itu waalon Ku

ong ologa' yo

runat pongoowi'an,

ono yo itaak Ku Atod Ku tu

so kiawi' lobuw.

Inonakan muyu kokusoyan,

kowoinoyan paabar-o sono nu abar Ku iitu.

Kororaa'an koomulokan muyu

kosiou nu onu ya obana

suat so Kinoringan so ponsorowan,

om kotutuaan,

nga koorati nu abar obana

suat so Kinoringan

so upian nosiro no.

18Om uripon Ku woinoi kusoi,

taakan nu Atod Ku no

nu iya oono,

om nosiro nga paabar-a

nu abar Ku tu.

19Om momaal Aku

nu koiran-iran so langit,

om ponondu'an so riniba,

ono yo raa', apui,

kawut om lisun.

20Om dai po ologa'

runat maayo om obantug,

ono yo kologa'an nu TUHAN

mongukum nu lobuw,

rumondom su runat,

om wulan nga miang soko raa'.

21Iya oono, isai ya momaau

mokitabang so TUHAN,

dai oinsaadan nu Kinoringan

suat so koraayan niyo,’

koo ri.#Yl 2:28-32

22Oo su lobuw Israil,#2:22: lobuw Israil, ono yo, lobuw Yaudi. rongowo muyu yo totongaron ku tu! Si Yisus lobuw Najarit, Iyo yo su tinaakan nu Kinoringan nu kopogboya'an, om oilaan muyu nu obana ono kiat so koiran-iran om ponondu'an winaal Niyo so tiningkuangon muyu. Kou yo kondiri nokoilo nu onu-onu winaal Niyo so tiningkuangon muyu. 23Maid nu koinginan nu Kinoringan nu notantu yo kiat po nu timpuun-i, nikomouli' sono si Yisus so kou. Om kou yo su minonuu' nu lobuw oraai posalib so Iyo.#Mat 27:35; Mrk 15:24; Luk 23:33; Yns 19:18 24Nga linuli'an-o Iyo nu Kinoringan, so' dai ya Iyo okuasa nu kopotoyan.#Mat 28:5-6; Mrk 16:6; Luk 24:5 25Minutangar si Raja Daud gulu ri suat so si Yisus nu,

‘Oo TUHAN, oilaan ku nu dadan Ko maid-waid monabang so aku,

om d'ado lobuw

kopongaagut so aku.

26Nadi osanang inawo ku,

om mulagu aku sumudu'an.

Pudi pona riniba aku,

nga tumotog aku ya umarap so Kinoringan,

27so' dai Mu ya aku

niogol so konomotayan,#2:27: konomotayan, ono yo, wonuo nu lobuw minatoi-o.

om koyuwan ku tu

dai Mu posimaidan rumunus

ong matoi aku yo.

28Nopoilo Ko so aku

nu lalan sumundur

so kowiawan musingkolaid,

om sobana ko osudu' aku

so' maid-waid Ko so aku,’

koo ri.#Lgu 16:8-11

29Oo su kosusulodan ku, monuturan aku suat so si Raja Daud, aki rumpungan toko ri. Minatoi iyo om nilobong, om lobong niyo ri kakal-a nu ono sono tu. 30Minongibot Kinoringan so si Daud nu mongurug Iyo nu raja kiat so solusuk niyo ri. Noilaan ni Raja Daud janji nu Kinoringan oono so' iyo pona nga poo'abar-a nu Kinoringan.#Lgu 132:11; 2 Som 7:12-13 31Oorotian-a ni Raja Daud onu ya waalon nu Kinoringan. Indadi, minomirasat sono iyo suat so koluli'an nu Raja Nijanji nu Kinoringan nu,

‘Dai posimaidan Iyo nu Kinoringan

kakal so konomotayan,

om dai ya rumunus

koyuwan Niyo no,’

koo iyo.#Lgu 16:10 32Si Yisus-o su linuli'an nu Kinoringan kiat so pinotoyan, om kai kiawi' nokosiou nu ono. 33Nopupus iri, kinakat Iyo nu Kinoringan so surga so tontong kikuasa, om tinaakan Iyo nu Kinoringan nu Atod Niyo, iri nijanji Niyo ri. Atod oono yo su nitaak ni Yisus so kai om onu yo po osiou om orongou muyu nu ono sono tu, ono yo su gogoma'on nu Atod oono. 34Oilaan toko nu okon-a ko suat so iyo kondiri minutangar si Daud, so' okon ko iyo su minindakod so surga soko si Yisus. Nga minutangar-o iyo nu,

‘Minutangar TUHAN Kinoringan

so Tuhan ku, ono yo

Raja Nijanji nu Kinoringan ku nu,

Ogom-o umpak so wanan Ku

so surga mogkuasa,

35om kiawi' alod-alod Mu

ipodoog Ku so Ikau,’

koo ri.#Lgu 110:1

36Oo su lobuw Israil, orotio muyu yo sobana nu si Yisus, iri sinalib muyu ri, Iyo yo su inurug nu Kinoringan nu Tuhan om Raja Nijanji Niyo,” koo si Pitrus.

37Norongou-o po iri nu lobuw suang-i, sobana ko noogutan nosiro, soko tobok-tobokon nu pais inawo nosiro ri, om mongoduato yo so si Pitrus om kouna'an niyo ri nu, “Oo su kosusulodan, onu ka su otoop goma'on mai?” koo.

38Sumombuto yo si Pitrus nu, “Rorogo kou yo momaal nu koraayan, om pokidiu' kou yo, ponondu'an nu poimaid kou so si Yisus Kristus, su' ompunan koraayan muyu ri, om kotorima' kou nu Atod nu Kinoringan. 39Minongojanji Kinoringan nu waalon Niyo soko ono, okon ko so kou ya, nga suat po so inonakan om solusuk muyu, om lobuw kiat so dirawu', iri paawon nu Tuhan, Kinoringan usaa'on toko no,” koo.

40Soko iri yo nitarang ni Pitrus so nosiro om mindomoo po iyo so nosiro nu, “Posimaidi muyu yo Kinoringan monapul so kou kiat so ponginsaadan Niyo so lobuw noposalib so si Yisus,” koo. 41Osuang sono lobuw nopoimaid nu tinangar ni Pitrus om diniu'. Kiro-kiro tolu noribu nokoruang so lobuw poimaid nu runat iiri. 42Om otigi' kolobuwan iiri mongowaid nu niongotuduk nu pinongoorapan ni Yisus, om dadan muimpug nosiro so kinosuang-i, mongokan soko sonsulod om mogdu'a.

Kowiawan nu lobuw poimaid

43Kiawi' lobuw so Yirusalim noiranan sobana nu nokosiou nu koiran-iran winaal nu pinongoorapan ni Yisus. 44Kiawi' lobuw poimaid sumundur-a muimpug, om muurung-urung nosiro nu onu yo po songapan nosiro.#P'rapan 4:32-35 45Bang kuwai so nosiro osimpitan, powoli sono wokon-i nu gonggamon, om boogi'on nosiro orogo ri musuat nu kosimpitan nu ido soido. 46Runat-runat muimpug nosiro so natad nu Waloi Maayo nu Kinoringan, om mususulang mongokan so waloi nosiro, maid nu osudu' om obaba' inawo. 47Dadan nosiro mongorayou nu Kinoringan, om ponokodan nu lobuw wokon nu owarong sobana lobuw poimaid-i. Om runat-runat mongoruang Tuhan Kinoringan nu lobuw sopulan Niyo.

Currently Selected:

Pinongoorapan 2: TomPWPgLgPn

Highlight

Copy