Pinongoorapan 1

1Oo Tiupilus,#Luk 1:1-4

so buuk ku togna ri sinurat ku yo onu-onu winaal ni Yisus om niongotuduk Niyo ri, kiat nu tinumimpuun Iyo montuduk, 2sampai runat kinoindokodan Niyo so surga ri. Dai po nokoindakod Iyo so surga ri, maid nu kuasa nu Atod nu Kinoringan, sinuu' Niyo pinongoorapan Niyo ri potuturan so lobuw wokon suat so Iyo. 3Solaid opat nopulu runat kiat so kinopotoyan Niyo ri, obulit Iyo mintolang so pinongoorapan Niyo, om nopoimaid-o sono nosiro nu miniau-a Iyo koimbagu. Nosiou Iyo nosiro, om monuturan Iyo so nosiro suat so Pogkuosaan nu Kinoringan. 4Ido runat iya nu minuimpug nosiro, tinangar sono ni Yisus nosiro nu, “Adang kou po mulaiw kiat tuui so Yirusalim. Molak kou po tuui mongindad nu Atod nu Kinoringan, iri nijanji nu Amo Kinoringan, tinangar Ku so kou gulu ri.#Luk 24:49 5Minongodiu' si Yuanis nu lobuw, sungoi-a su pinakai, nga dai yo olaid om suu'on nu Kinoringan Atod Niyo mogkuasa so kou,” koo si Yisus.#Mat 3:11; Mrk 1:8; Luk 3:16; Yns 1:33

Kinakat si Yisus so surga

6Nokopuimpug po pinongoorapan iiri om si Yisus, mongoduato yo nosiro so Iyo nu, “Oo Tuhan, kosiono yo ka ourug Ko nu raja mogkuasa nu bansa Israil soko raja mogkuasa nu gulu ri?” koo.

7Sumombuto yo si Yisus nu, “Dai kou otoop mongilo nu runat om iya kourugan Ku nu raja, so' si Amo Kinoringan-o su monantu nu ono, maid nu kopogboya'an Niyo. 8Nga otoop ong oilaan muyu nu bang lumoga' yo Atod nu Kinoringan mogkuasa so kou, taakan kou Niyo nu kuasa mugogoma'on suat so Iyo, om paabar kou sono so lobuw wokon suat so Aku so Yirusalim, so tontong wokon so Yudia, so Samaria, om so pilolongkop nu wonuo tu,” koo.#Mat 28:19; Mrk 16:15; Luk 24:47-48 9Noopod si Yisus mutangar, kinakat-o Iyo so surga nu laid nosiro momontong so Iyo ri. Tinumapu' su kawut dii so Iyo om dai yo sono nosiou nosiro.#Mrk 16:19; Luk 24:50-51

10Laid nosiro mingaa-tingaa nu kumakat si Yisus so surga, milok po su mundii-dii duo koyuwan so obi' nosiro ri, kipokakas nu oputi' 11om minutangar nu, “Oo su lobuw Galilia, adang-o mundii-dii tumingaa so langit-o! Si Yisus, iri kinakat so surga nosiou muyu ri, mululi' po koimbagu soko kinoindokodan Niyo sisuna ri,” koo.

Nokosulang si Matias so si Yudas

12Mululio yo sono pinongoorapan ni Yisus so Yirusalim kiat so Bulud Jaitun. Bulud iiri kiro-kiro ido kilumitor rawu' kiat so bandar. 13Nokologa' yo po nosiro so Yirusalim, miano yo nosiro so waloi pinolakan nosiro ri om mosuwo yo so bilik poomuimpugan nosiro ri. Nosiro yo po oono si Pitrus, si Yuanis, si Yakubus, si Andrias, si Pilipus, si Tumas, si Bartulumius, si Matius, si Yakubus anak ni Alpius, si Simun iri lobuw kiat so puimpugan lumawan nu lobuw Ruum, om si Yudas anak ni Yakub.#Mat 10:2-4; Mrk 3:16-19; Luk 6:14-16 14Dadan nosiro muimpug mogdu'a maid nu kowoinoyan, si Maria, ino ni Yisus, om kosulodan Niyo ri.

15Ido runat, minuimpug maatus duo nopulu mompomaid ni Yisus. Mundiio yo sono si Pitrus so tiningkuangon nosiro ri om mutongaro yo nu, 16“Oo su kosulodan ku, onu yo po nokosurat so Buuk nu Kinoringan gulu ri notuman-a. Niintolang nu Atod nu Kinoringan so si Daud suat so si Yudas, iri minongowit nu lobuw mongaakom so si Yisus. 17Si Yudas oono una' toko ya nu gulu ri, pinili' ni Yisus mugogoma'on maid-waid so toko,” koo si Pitrus.

18(Nokotorima' si Yudas nu siin kiat so gogoma'on niyo oraai. Siin oono pinomoli nu tana' om dii yo pinusimpotoyan niyo, nopopas tian niyo ri, om nolukan kiawi' asuw nu tian niyo ri. 19Noilaan-a iri nu kolobuwan so Yirusalim, om iningoranan sono nosiro tana' iiri so tangar nosiro nu Akil, orati yo po nu iri, “Tana' Raa'”.)#Mat 27:3-8

20Mutongaro po si Pitrus nu, “Nokosurat-o so buuk Lagu so Buuk nu Kinoringan nu,

‘Olaiw-laiwan-o bosalag nosiro no,

om insan ido po sono lobuw

miau so bosalag oono,’

koo ri. Om nokosurat-a nu,

‘Lobuw sondiang su mongowaal

nu gogoma'on niyo no,’

koo ri.#Lgu 69:25; 109:8

21Nadi momili' toko yo ido koyuwan maid so toko potuturan nu kinoluli'an ni Yisus. Nga lobuw pili'on toko no subai nokowaid-o so toko nu maid-waid toko po so si Yisus, 22kiat nu tumimpuun si Yuanis mongodiu' nu lobuw sampai kinoindokodan ni Yisus so surga,” koo si Pitrus.#Mat 3:16; Mrk 1:9; 16:19; Luk 3:21; 24:51

23Indadi, momilio yo sono nosiro duo koyuwan potingkuangon dii so nosiro, iri yo si Matias, om si Yusup pomaawan so iyo si Barsabas (om ingoranan-a so si Yustus). 24Mogdu'aa yo sono nosiro nu, “Oo Tuhan, oilaan Mu inawo nu kiawi' lobuw. Nadi, tuduki yo ombo su pili'on Mu nu duo koyuwan iitu, 25su' kopugogoma'on iyo maid so kai, sumulang so si Yudas, pinongoorapan Mu minatoi-i om nokoian so tontong mutoop so iyo,” koo. 26Nopupus mogdu'a, musuuso yo nosiro om notapus-o nosiro nu si Matias su pinili' nu Kinoringan. Iyo yo su nosuat nu koruang so opulu om ido pinongoorapan-i.

Currently Selected:

Pinongoorapan 1: TomPWPgLgPn

Highlight

Copy