Pinongoorapan 19

Si Paulus so Ipisus

1Laid ni Apulus so Kurintus, linumongkop si Paulus so wonuo nu Asia, om nokologa' so bandar Ipisus. Nokosambat sono iyo dii tinu-tinu lobuw poimaid so si Yisus. 2Duato yo niyo nosiro nu, “Kinuasa kou yo ka nu Atod nu Kinoringan iya nu nopoimaid kou so si Yisus?” koo.

Sumombuto yo nosiro nu, “Dai po! Om dai kai po insan nokorongou nu kuwai Atod nu Kinoringan,” koo.

3Duato yo niyo nosiro nu, “Bang soko ono, onu orati nu diniu' kou noilaan muyu?” koo.

Sumombuto yo nosiro nu, “Orati yo po nu diu'on nga soko iri yo tinangar ni Yuanis Moongodiu',” koo.

4Mutongaro yo si Paulus nu, “Mongodiu' si Yuanis nu lobuw ponondu'an nu rumorogo nosiro momaal nu koraayan. Nopokoilo ya iyo so lobuw Yaudi nu subai poimaid nosiro nu lobuw lumoga' sumusuut so iyo, ono yo si Yisus,” koo.#Mat 3:11; Mrk 1:4,7-8; Luk 3:4,16; Yns 1:26-27

5Norongou-o po nosiro nu soko iri, diuo yo sono nosiro mongorait nu ngaran ni Tuhan Yisus. 6Laid ni Paulus potopop nu palad niyo ri dii so nosiro, kinuasa yo sono nosiro nu Atod nu Kinoringan, om tumimpuuno yo nosiro mutangar nu totongaron owulug om potuturan nu abar kiat so Kinoringan. 7Koosampuw nosiro kiro-kiro opulu om duo kokusoyan.

8Tolu nowulan laid ni Paulus muian-ian so waloi sosombooyangan-i, om opogi sobana iyo montuduk nu ongo lobuw-i, om mokimuupakat tayon ong koorati bana nosiro om poimaid nu mogkuasa Kinoringan soko raja. 9Nga tinu-tinu so nosiro okosog om dai poimaid. So tiningkuangon nu lobuw suang so puimpugan iiri, monginsala' nosiro nu pontudukan suat nu kinotopusan nu Kinoringan monapul nu lobuw poimaid so si Yisus. Pagka soko iri laiwi yo ni Paulus nosiro om lobuw wokon poimaid-i, om runat-runat masuw iyo so bilik maayo poomontudukan ni Tiranus mokimuupakat nu lobuw poimaid-i. 10Duo notoun laid soko iri yo goma'on niyo, sampai nokorongou nu tinongaran nu Tuhan kiawi' lobuw so pilolongkop nu Asia, kiat-o so lobuw Yaudi kumoo yo so bansa wokon.

Inonakan ni Iskiwa

11Osuang koiran-iran winaal nu Kinoringan nu si Paulus su pinopomaal. 12Insan sapu tangan-a om dimpou#19:12: dimpou; intawa: gimpou ni Paulus ong nitopis so lobuw dai kaatu', opoli'an-a nosiro, om osusub sono moinat sinumarung so nosiro. 13Tinu-tinu bolian nu lobuw Yaudi lumongkop monusub nu moinat kiat so lobuw mongorait nu ngaran ni Yisus nu, “So ngaran ni Yisus iri nituturan ni Paulus, susubon ku kou,” koo nosiro. 14Turu sonsulod kusoi, anak ni Iskiwa, iri Imam Maayo nu lobuw Yaudi, soko iri ya gogoma'on.

15Nga mutongaro yo moinat-i so nosiro nu, “Otondu'an ku ya si Yisus om si Paulus, nga kou yo po dai ku otondu'an,” koo.

16Torako yo sono nosiro monampo nu lobuw sinorungan nu moinat-i om noboundakan-a nosiro kiat so waloi iiri, noongopilatan om nolobasan, so' inuranut pokakas nosiro ri. 17Kiawi' lobuw Yaudi om bansa wokon iri minogol so Ipisus nokorongou-a nu iri om songlaa'-laa' sono, om sumundur nai' royowon ngaran ni Tuhan Yisus. 18Osuang lobuw nopoimaid-o so si Yisus lumoga' om potuturan nu nosiro nga soko ono ya nu gulu ri. 19Iri lobuw kiolimu ri, nga minongimpugo sono nu buuk pinosuratan nosiro nu olimu ri, om sinusulan so tiningkuangon nu lobuw suang-i. Orogo nu buuk iiri, kiro-kiro limo nopulu ribu kinopingan nu siin pirok.#19:19: Songkaping siin pirok, ono yo su gaji sondunat suat so lobuw. 20Kiat nu iri, nokolongkop-o sono tinongaran nu Tuhan om osuang lobuw korongou om nopoimaid.

Koogutan dii so Ipisus

21Nopupus iri, topuso yo ni Paulus nu mian so Yirusalim, tumalib-a so Makadunia om Akaya. Mutongaro yo iyo nu, “Oopod aku dii, lumombus aku po so Ruum,” koo. 22Suuo yo sono niyo duo koyuwan pookitobangan niyo ri, ono yo si Timutius om si Irastus, nu popoguluon so Makadunia, nu dai po kolaiw iyo kiat so wonuo nu Asia.

23Iya oono tumimpuuno sono koogutan so Ipisus suat nu pontudukan nu kinotopusan nu Kinoringan monapul nu lobuw poimaid so si Yisus. 24So bandar oono, kuwai moonontan nu pirok ingoranan so si Dimitrius, moomaal nu waloi-waloi pongusaa'an so si Artimis,#19:24: Artimis: Siowan Kamus Kitab. pinokokinoringan woinoi nu lobuw dii. Gogoma'on oono yo su kountungan maayo nu lobuw mugogoma'on maid so iyo. 25Indadi, impono yo niyo lobuw mugogoma'on maid so iyo om moonontan nu pirok wokon-i, om mutongaro yo nu, “Oo kosusulodan, oilaan muyu yo, nu kikountungan toko nu gogoma'on iitu. 26Kosiono norongou om nosiou muyu yo gogoma'on ni Paulus. Minutangar iyo nu tinindobuw waalon nu lobuw okon-a ko Kinoringan. Om osuang-o lobuw nopoimaid nu pontudukan niyo no, okon ko so Ipisus tu ya, nga so pilolongkop po nu Asia tu. 27Aagut ono so kountungan toko, om osindoraai ngaran toko. Okon ko ono ya, nga waloi ni Artimis kinoringan toko no poboba'on sono om dai orumaton, ampa iyo yo su kinoringan usaa'on nu kiawi' lobuw so Asia om so pilolongkop nu wonuo tu!” koo si Dimitrius.

28Norongou-o po iri nosiro, rinumoraayan sono nosiro om gumonsoko yo nu, “Miau si Artimis, kinoringan nu lobuw Ipisus,” koo. 29Nokolongkop-o sono koogutan iiri so bandar-i. Okomo yo nu lobuw oraai so bandar iiri si Gayus om si Aristarkus, una' ni Paulus kiat so Makadunia ri, om mogtuui owito nosiro mian so lologa'an nu lobuw suang so bandar-i. 30Minokiwowaid si Paulus so nosiro, nga pinogos iyo nu lobuw suang, iri nopoimaid so si Yisus. 31Kuwai po wowaidon so tontong wokon nu Asia, una' ya ni Paulus, minonuu' nu lobuw popomogos so iyo nu dai pointolangon so lologa'on nu lobuw suang iiri. 32Soko iri po, muagut-agut-o sono lobuw minuimpug-i. Kuwai gumonsok nu soko itu, kuwai ya nu soko ono, so' kosuangan so nosiro dai koilo ong onu tomod nosiro muimpug dii. 33Pagka sinuu' nu lobuw Yaudi ri si Aliksandir mian so tiningkuangon nu lobuw suang-i, tinokod sono nu tinu-tinu koyuwan nu iyo yo su nokourug nu koogutan iiri. Soko iri po, sogkai yo niyo palad niyo ri poodog nu kolobuwan-i, pokoilo nu okon ko iyo su kisala'. 34Noilaan-o po nosiro nu lobuw-a iyo nu Yaudi, muiyaa yo nosiro gumonsok solaid duo nojaam nu, “Miau si Artimis, kinoringan nu lobuw Ipisus!” koo.

35Koompusan, nodapat-a sono podoog kolobuwan-i nu moonurat so bandar iiri om mutongaro yo nu, “Oo su inong ku lobuw Ipisus! Kiawi' lobuw, nokoilo yo nu so Ipisus tu yo po moongusaa' nu waloi ni Artimis om watu, iri noratu kiat so langit-i. 36D'ado ido kopongolim nu ono. Indadi, odog kou yo! Adang-o momaal nu onu-onu ya ong dai muyu po okiro-kiro laid! 37Itu yo po lobuw inowit muyu tuui iitu, okon-a ko minonolod nu waloi tinindobuw intawa minubaag nu kinoringan toko. 38Bang kuwai topudan ni Dimitrius om lobuw maid mugogoma'on so iyo suat so nosiro, bisora'on-a so poongobisora'an soko koopotan. 39Nga ong kuwai po wokon koinginan muyu, bisora'on-a so puimpugan nu lobuw suang nu notantu yo laid mongowaid nu oturan, 40so' nourug-o po nu runat iitu kaagut-a so toko kiawi'. Tokodon toko nu lobuw nu mongindoraai toko, so' d'ado ya pounayan toko monapud nu soko ono,” koo moonurat-i. 41Notangar-o po iri nu moonurat so bandar-i, poulio yo sono niyo ongo lobuw-i.

Currently Selected:

Pinongoorapan 19: TomPWPgLgPn

Highlight

Copy