Pinongoorapan 20

Minian si Paulus so Makadunia om Akaya

1Noingkoyod-o po koogutan maayo so Ipisus iiri, impugo yo sono ni Paulus lobuw poimaid so si Yisus dii ri, popiot nu koimaidan nosiro. Nopupus iri, sumoginaa yo iyo nu lumombus so Makadunia. 2Linumongkop iyo so wonuo oono montuduk nu lobuw poimaid so si Yisus, om nopopiot nu koimaidan nosiro, om lumombuso yo sono iyo so Akaya. 3Tolu nowulan laid minogol iyo dii. Laid niyo mutimos-timos lumayag mian so Siria, nokorongou iyo nu pokipopotoyan iyo nu lobuw Yaudi. Pagka soko iri topuso yo niyo koimbagu nu mompanou-a maid so tidong lumalan so Makadunia. 4Maido yo sono so iyo mian so Siria tinu-tinu koyuwan, ono yo si Sopatir anak ni Pirus kiat so Biria, si Aristarkus om si Sokundus, lobuw nu Tisalunika, si Gayus lobuw nu Darbi, si Tikikus om si Trupimus lobuw nu Asia, om si Timutius. 5Minogulu ya nosiro so aku om si Paulus, om minongimat so Toruas. 6Nokotalib Rami-Rami nu Baang-Baang D'ado Pongombang, lumoyago kai yo si Paulus kiat so Pilipi. Kolimaan om nokopusambat kai nai' nu kouna'an minogulu so kai so Toruas-i, om mogolo kai yo dii koturuan.

Pomupusan nu pongondaa'an ni Paulus

so Toruas

7So awi nu koturu, ono yo runat togna so minggu iiri, minuimpug kai mongokan mongoondom nu kinopotoyan ni Yisus. Minontuduk sono si Paulus so kai sampai nololongan so' mokilolombus iyo nu susuab-i. 8Osuang politaan so pinuimpugan mai ri. 9Ido omulok ingoranan so si Iutikus minogom so jondila ri. Pagka olaid sobana si Paulus montuduk, dinudu'on sono iyo om nokoturuw om noratu kiat so tingkat kotolu ri. Nowukatan-o iyo nu pinongokatan nosiro so iyo ri. 10Nga muntibaa yo si Paulus, om loubi yo niyo omulok-i om mutongaro yo nu, “Ikod kou ya kaagut. Miau po iyo!” koo. 11Mindokodo yo koimbagu si Paulus om boogio yo niyo baang-baang-i, om mongokano yo nosiro. Nosuaban iyo montuduk, om noopod-o po, lumombuso yo iyo. 12Tundano yo nosiro omulok iiri muli' om sobana ko nosudu'an om noinsosomodan nosiro nu miau-a.

Kiat so Toruas mian so Militus

13Sumondoto kai yo so kapal om lumoyago kai yo mogulu so Asus mongaambai so si Paulus, so' minontas-a iyo. 14Nokopusambat kai so Asus, sumokoyo yo si Paulus om lumoyago kai yo so Matilini. 15Kiat dii linumayag kai, om susuab-i po notimpan mai yo puru Kios. Koduo runat-i nokotalib kai yo so puru Samus om sondunat po laid tumalib kai yo so Militus. 16Dai yo minambai si Paulus so Ipisus so' mokitotalib osikap so Asia, om mokilologa' so Yirusalim, nu dai po ologa' Rami-Rami Pintakusta.

Koputondiangan ni Paulus so wowaidon

so Ipisus

17Kiat so Militus, minongodau si Paulus nu mokimusambat nu wowaidon nu puimpugan so Ipisus. 18Nokologa' yo po nosiro, mutongaro yo si Paulus nu, “Oo su kosusulodan ku, noilaan muyu ya kogoyaan ku nu kinologa'an ku togna so wonuo nu Asia. 19Pudi pona osonsara' aku sampai kotangi' nu pongindoraai nu lobuw Yaudi, mugogoma'on aku ya suat so Tuhan maid nu obaba' inawo. 20Oilaan muyu ya nu dai ya su oontara pokoilo so kou nu onu yo po kiguna suat so kou. Montuduk aku so kou so poomuimpugan nu lobuw suang om so waloi muyu. 21Dadan aku poondom so lobuw Yaudi om so lobuw bansa wokon, su' rumorogo nosiro momaal nu koraayan, obinsuut so Kinoringan, om poimaid so Tuhan Yisus. 22Kosiono, maid nu ponuu'an nu Atod nu Kinoringan, mian aku so Yirusalim, nga dai ku oilaan ong onu obomboran ku dii. 23Ono yo su oilaan ku, pinokoilo aku nu Atod nu Kinoringan so kiawi' bandar inianan ku, nu jiilon aku om osonsara' dii. 24Nga dai ku ya poduli'on onu kourugan nu kowiawan ku. Ono yo su koinginan ku mongaawi' nu gogoma'on nipongaarap ni Tuhan Yisus so aku, potuturan nu Abar Owarong suat nu koworongan nu Kinoringan.#2 Tim 4:7

25Noondaa ku yo kou kiawi', om notudukan ku yo nu pogkuosaan nu Kinoringan. Opurimon ku nu dai toko yo sono kopusambat. 26Indadi, tongaron ku itu so kou nu runat tu nu, bang kuwai so kou dai poimaid om matoi ukumon nu Kinoringan, okon-o sono ko sala' ku. 27Dai su insan mulaiw kiat so gogoma'on ku potuturan nu kiawi' notantu nu Kinoringan goma'on Niyo. 28Pusingipat kou yo om ipati muyu ya lobuw poimaid so si Yisus iri nitaak nu Atod nu Kinoringan so kou nu ipoipat-i, so' nosiliw kou yo nu moongipat so nosiro. Ipati muyu yo nosiro soko mongipat nu dumba, so' sinongapan-o nosiro nu Kinoringan nu kinopotoyan nu Anak Niyo pongolukat so nosiro. 29Koungkayas aku po itu, tantu lumoga' lobuw oraai soko kulos-kulos orongit tuui so kou, om sindoraayon sono lobuw inipatan muyu no. 30Om kuwai ya so kou lobuw potuturan nu abar okon ko bana. Waalon nosiro soko ono tayon ong kowaid so nosiro lobuw nopoimaid-o so si Yisus. 31Ono yo ko' mingat-ingat kou yo bana. Ondomo muyu yo nu tolu notoun laid awi runat montuduk aku so kou, nu oluluudan so kou.

32Kosiono nikomouli' ku kou so Kinoringan su' ipatan kou Niyo, om tumatap kou poimaid nu abar suat so koworongan Niyo. Iyo yo su kikuasa popiot nu koimaidan muyu om monaak so kou nu borakat iri nokosodia' yo suat so lobuw Niyo. 33Dai ya su insan mokitaak nu siin intawa pokakas so isai-isai ya. 34Noilaan muyu ya nu mugogoma'on aku modium nu kosukup-sukupan nu kowiawan ku om kouna'an maid-waid so aku. 35Kiawi' iitu no winaal ku tayon ong oilaan muyu nu subai owasa mugogoma'on om monabang nu lobuw kikosimpitan. Ondomo toko yo tinangar ni Tuhan Yisus nu, ‘Owarong po monaak ko' taakan,’ koo ri,” koo si Paulus.

36Noopod-o po iyo mutangar, sumurukudo yo sono nosiro mogdu'a. 37Koromi yo sono nosiro si Paulus maid nu tumangi'. 38Olunggui sobana nosiro so' minutangar iyo nu dai yo sono kopusambat nosiro. Soko iri po, opiti yo nosiro si Paulus so kapal sokoyan niyo ri.

Currently Selected:

Pinongoorapan 20: TomPWPgLgPn

Highlight

Copy