Pinongoorapan 17

Dii so Tisalunika

1Lumombuso yo si Paulus om si Silas so Tisalunika, minaid nu lalan kotalib so Ampipulis om Apulunia. Dii so Tisalunika, kuwai ido waloi sosombooyangan nu lobuw Yaudi. 2Miano yo si Paulus so waloi sosombooyangan oono soko kododanan koduung kolalag iyo nu waloi sosombooyangan nu lobuw Yaudi. Minuupakato sono nosiro dii nu tinongaran so Buuk nu Kinoringan solaid tolu nominggu nu Runat Pongintoronan. 3Nopotarang si Paulus nu orati nu tinongaran so Buuk nu Kinoringan suat nu kinosonsora'an om kinoluli'an ni Yisus nu, “Si Yisus oono yo Raja Nijanji nu Kinoringan,” koo. 4Tinu-tinu lobuw Yaudi nopoimaid nu pontudukan ni Paulus om minaid so nosiro. Soko iri ya osuang lobuw Yunani iri mongusaa' so Kinoringan nopoimaid so si Yisus, om osuang po kowoinoyan kipangkat nopoimaid-a.

5Nga minokimalun lobuw Yaudi ri. Modiumo yo nosiro nu lobuw oraai so pasar-i om ingoli yo nosiro mongindoraai so pilolongkop nu bandar-i. Miano yo nosiro so waloi ni Yasun, lobuw poimaid-i modium so si Paulus om si Silas nu doowaan so tiningkuangon nu lobuw suang. 6Pagka dai ya nooyangan nosiro si Paulus om si Silas, sosogi yo sono nosiro si Yasun om tinu-tinu po lobuw poimaid-i mongowit so lobuw kikuasa dii, om mutongaro yo nosiro nu, “Lobuw iitu mongindoraai so siombo-ombo ya, om kosiono nokologa' yo tuui. 7Pinoindakod nosiro ni Yasun so waloi niyo ri. Kiawi' ukum nu Raja Maayo nu Ruum dai waidon nosiro, so' minutangar nosiro nu kuwai raja wokon ingoranan so si Yisus,” koo. 8Norongou-o po nu lobuw suang om wowaidon so bandar-i tinangar iiri, noogutan sono nosiro. 9Suuo yo sono nu wowaidon-i si Yasun om kouna'an niyo ri mongobarai pongolukat so nosiro, om lobusi yo nosiro.

Dii so Biria

10Awi ri, suuo yo si Paulus om si Silas nu lobuw poimaid so bandar iiri mian so Biria. Nokologa' nosiro dii, miano yo nosiro so waloi sosombooyangan nu lobuw Yaudi. 11Owarong po inowoon nu lobuw so Biria ko' so Tisalunika ri. Sobana ko mokirorongou nosiro nu abar suat so si Yisus. Runat-runat mongoorati nosiro nu tinongaran so Buuk nu Kinoringan pongilaan ong bana ya ka pontudukan ni Paulus ko' dai. 12Osuang so nosiro nopoimaid so si Yisus, soko ono ya pudi lobuw Yunani woinoi kusoi kipangkat-i, nga nopoimaid-a. 13Norongou-o po nu lobuw Yaudi so Tisalunika nu minontuduk-a si Paulus nu tinongaran nu Kinoringan pudi so Biria, miano yo sono nosiro dii monindoraai om mongaagut nu lobuw dii ri. 14Mogtuui opiti nu kosusulodan so Biria ri si Paulus so imbing nu raat, nga si Silas om si Timutius minogol-a. 15Nokaapit po si Paulus so Atina, mululio yo kosusulodan iiri so Biria maid nu kodau kiat dii si Paulus, nu posuuton osikap si Silas om si Timutius.

Dii so Atina

16Laid ni Paulus mongimat so si Silas om si Timutius so Atina, olunggui sobana iyo nu nosiou niyo bandar oono nolongkop nu tinindobuw. 17Pagka soko iri, miano yo iyo so waloi sosombooyangan nu lobuw Yaudi, mokimuupakat nu lobuw Yaudi om lobuw wokon po moongusaa' nu Kinoringan dii, om soko iri ya winaal niyo so pasar. 18Moomontuduk nu Ipikurus om Istua#17:18: Ipikurus om Istua: Siowan Kamus Kitab mokimudaawa so iyo om tinu-tinu koyuwan minongoduat nu, “Onu ka oilaan nu lobuw iitu? Sabat-a pongoilaan niyo nga musingkoilo-ilo sono,” koo.

Nga wokon-i mutangar nu, “Mongaabar iyo gaam suat so pinokokinoringan usaa'on nu bansa wokon,” koo. Minutangar nosiro soko iri so' potuturan si Paulus suat so si Yisus om koluli'an nu lobuw minatoi. 19Ingoli yo sono nosiro si Paulus mian so puimpugan nu wowaidon moongobisara' so Ariupagus,#17:19: Ariupagus: Siowan Kamus Kitab om mutongaro yo nosiro so iyo nu, “Moki'iilo kai nu pontudukan mu, 20so' minutangar ko nu dai insan mai orongou, om ono yo ko' pokioorotian mai,” koo. 21(Soko iri tinangar nosiro so' kiawi' lobuw nu Atina om porantau nai d'ado ya gogoma'on sondiang ko mongkinongou om mututuran suat so onu yo po owagu ya.)

22Mundiio yo sono si Paulus so tiningkuangon nu lobuw so Ariupagus-i om mutongaro yo nu, “Oo su kolobuwan nu Atina, osiou ku nu sobana ko obinsuut kou nu pinokokinoringan muyu, 23so' laid ku musimpanou so pililiwut nu bandar tu, monsiou nu sosombooyangan muyu, nokolalag aku sono nu sosombooyangan muyu kisurat nu,

So Kinoringan Dai Otondu'an,

koo. Nadi ono yo Kinoringan usaa'on muyu nga dai muyu otondu'an-o su niabar ku so kou. 24Kinoringan nu minongowangun nu wonuo tu om kiawi' asuw, Iyo yo su moomogkuasa nu langit om wonuo. Dai ya Iyo mogol so waloi sosombooyangan winaal nu lobuw. 25Dai ya Iyo mokitabang nu lobuw, so' Iyo yo su powiau om monaak nu onu-onu ya so kiawi' lobuw.#1 Raj 8:27; Yis 42:5; P'rapan 7:48 26Kiat so ido koyuwan, minongurug Iyo nu kiawi' bansa, om pointoron so nosiro so wonuo tu, om Iyo ya su minonantu kiat po nu gulu ri nu kopolakan nosiro. 27Minongurug Kinoringan nu kiawi' bansa, tayon ong diumon Iyo nosiro, kalu ong kosambat-a nosiro so Iyo nu laid nosiro modium. Nga sobana yo, dai ya orawu' Kinoringan tuui so toko, 28soko tinangar nu lobuw nu, ‘Kiat so kuasa Niyo, miau toko, kopuiuk-iuk, om tuui toko so wonuo tu,’ koo ri. Om soko pinutangar nu moonundait tuui so kou nu gulu ri nu, ‘Toko kiawi' inonakan nu Kinoringan,’ koo ri. 29Pagka inonakan toko nu Kinoringan, dai musuat ong popuinongon toko Kinoringan om tinindobuw omas, pirok intawa watu winaal, iri winaal maid nu koilaan nu lobuw-a. 30Iya nu dai po noilaan nu kolobuwan onu koinginan nu Kinoringan goma'on nosiro, dai ya muad ininsaadan Niyo nosiro. Nga kosiono tu monuu' Iyo nu kiawi' lobuw so pilolongkop nu wonuo tu nu poingkoyodon mongusaa' nu tinindobuw, om Iyo yo sono su usaa'on. 31So' notatap-o Niyo iya pongukuman nu wonuo tu nu ooluk gama', om pinili' yo Niyo ido koyuwan nu popongukumon. Om niintolang-o nu Kinoringan nu obana ya ono nu pinongoluli'an Niyo nu lobuw oono kiat so kinopotoyan!” koo si Paulus.

32Norongou-o po nu lobuw-i nu oluli'an lobuw minatoi, oyak-oyaki yo sono nosiro si Paulus, nga wokon-i minutangar nu, “Moingin kai po ong mutangar ko koimbagu nu ono,” koo. 33Laiwi yo sono ni Paulus nosiro. 34Nga tinu-tinu so nosiro tumapan so si Paulus om nopoimaid so si Yisus, ono yo si Dionisius, wowaidon so poomubisora'an so Ariupagus, om ido woinoi ingoranan so si Damaris, om lobuw wokon po.

Currently Selected:

Pinongoorapan 17: TomPWPgLgPn

Highlight

Copy