Pinongoorapan 16
16
Minaid si Timutius so si Paulus om si Silas
1Miano yo si Paulus om si Silas so Darbi, om nopupus dii lumombuso yo so Listra. Dii so Listra nokosambat nosiro nu lobuw poimaid, ngaran-o po si Timutius. Ino niyo lobuw Yaudi nopoimaid so si Yisus, nga amo niyo lobuw Yunani. 2Kiawi' lobuw poimaid so Listra om so Ikunium, koilo nu sobana ko owarong si Timutius. 3Poki'iingolan sono ni Paulus si Timutius, nga pinopusunat po laid iyo so' noilaan nu ongo lobuw Yaudi ri nu amo yo po niyo bansa Yunani. 4Nopupus iri, lumongkopo yo nosiro so bandar potuturan nu niongopogos notantu yo nu pinongoorapan ni Yisus om wowaidon so Yirusalim-i so lobuw poimaid okon ko Yaudi ri. 5Soko iri po, sumunduro sono opiot koimaidan nosiro, om laid nu laid rumuang koosuang nu lobuw poimaid.
Nosorou-sorou ni Paulus so Toruas
6Nopupus iri, tumolibo ya nosiro so Prigia om Galatia so' pinogos nosiro nu Atod nu Kinoringan mambai so wonuo nu Asia paabar nu tinongaran nu Kinoringan. 7Nokologa' nosiro so pubaatan nu Misia om Bitinia, padu nosiro mian so Bitinia, nga pinogos-a nosiro nu Atod ni Yisus.#16:7: Atod ni Yisus, ono yo Atod nu Kinoringan (P'rapan 16:6). 8Indadi tumolibo ya nosiro dii, lumombuso so Toruas. 9Awi ri, nokosorou sono si Paulus nu ido lobuw Makadunia mundii-dii so tiningkuangon niyo ri minutangar nu, “Loga' yo tuui so Makadunia, om tobango kai yo,” koo. 10Topuso mai yo sono nu mian so Makadunia, so' poimaid kai nu sinuu' kai nu Kinoringan mian dii paabar nu Abar Owarong.
Nopoimaid si Lidia so si Yisus dii so Pilipi
11Dii so Toruas sumokoyo kai yo nu kapal mian so Somotraki, om susuab-i lumombuso kai yo so Niapulis. 12Kiat dii lumombuso kai yo so bandar Pilipi, bandar maayo so wonuo nu Makadunia, om molako kai yo dii kotinu-tinuan. 13Nologa' Runat Pongintoronan, minian kai sono so imbing nu sungoi dai orawu' so pinolakan mai ri, so' ponontaman mai ong kuwai sosombooyangan nu lobuw Yaudi dii. Mogomo kai yo mokimutangar-tangar nu kowoinoyan minuimpug-i. 14Ido koyuwan so nosiro, ingoranan so si Lidia, kiat so Tiatira, poowoli nu kumut otaas. Sobana ko obinsuut iyo nu Kinoringan, om laid niyo mongorongou so kai ri, kinijib sono nu Tuhan inawo niyo ri, om tinorima' niyo pontudukan ni Paulus. 15Diuo yo sono si Lidia om kiawi' lobuw so waloi niyo ri. Nopupus iri soginaa kai yo sono niyo poian so waloi niyo ri, om mutongaro yo nu, “Bang oilaan muyu nu bana-bana poimaid aku so si Yisus Tuhan ku, maloi kou po dii so kai,” koo. Pagka otigol sobana si Lidia powaloi, minimaid kai yo sono.
Jiniil si Paulus so Pilipi
16Ido runat, minanou-panou kai mian so sosombooyangan so imbing nu sungoi iiri. Nokosambat kai sono ido woinoi uripon, sinorungan nu moinat om moilo momirasat suat so sunduron. Sobana ko osuang siin kountungan niyo nu gogoma'on niyo ri, nitungkap so moonguripon so iyo ri. 17Muut-suut woinoi iiri so kai maid nu monsok-gonsok nu, “Lobuw iitu no uripon nu Kinoringan nu Sobana ko Opangkat. Linumoga' nosiro paabar so kou nu gama' muyu kaalap nu kowiawan musingkolaid,” koo. 18Kotinu-tinuan woinoi iiri monsok-gonsok soko iri, sampai nokoungot-o sono si Paulus. Mongkowiio yo iyo mutangar so moinat-i nu, “Maid nu kuasa ni Yisus, susubon ku ikau kiat so woinoi iitu,” koo si Paulus. Iya ya iiri, minulaiw-o sono moinat-i kiat so woinoi-i. 19Noilaan-o po nu moonguripon iiri nu ado yo sono ingkosisiin nu woinoi uripon niyo ri, okomo yo sono niyo si Paulus om si Silas. 20Owito yo niyo nosiro so tiningkuangon nu wowaidon moongobisara' so pasar-i om mutongaro yo nu, “Duo koyuwan iitu lobuw Yaudi mongaagut so tontong toko tu. 21Minontuduk nosiro nu adat dai musuat nu adat toko. Toko lobuw Ruum dai kowasa mongowaid nu adat oono,” koo. 22Osuang-a sumimpor mongolawan so si Paulus om si Silas.
Pisio yo sono nu wowaidon moongobisara' ri pokakas ni Paulus om ni Silas, om monuuo yo nu lobuw popongolubak so nosiro. 23Nolubak-o po si Paulus om si Silas, jiilo yo sono nosiro. Wowaidon so jiil oono sinuu' popongipat sobana so nosiro. 24Osipo yo nu wowaidon so jiil-i nisuu' so iyo ri. Jiilo yo sono si Paulus om si Silas so dilalom sobana ri om poyuko yo akod nosiro ri nu kayu.
25Kiro-kiro tonga' nu awi minogdu'a sono si Paulus om si Silas om minulagu mongorayou nu Kinoringan, om norongou-a nu wokon nojiil-i. 26Milok po su ginumunggun su tana' sobana ko oontob, om nokogunggun-a waloi pinongojiilan-i. Nosukab-o sono kiawi' pintu ri, om nouyad pinomayuk so nosiro om rantai pinongkogos nu lobuw wokon nojiil-i. 27Nosiou-o po nu wowaidon so jiil-i nu nosukab kiawi' pintu ri, owuto yo sono niyo gayang niyo ri, padu musimpatoi, so' ponontaman niyo ong nokolaiw-o pinujiil-i. 28Nga lumuapo yo si Paulus nu, “Ikod pusimpatoi! Tudi kai ya!” koo.
29Mokitoguo yo wowaidon so jiil-i om mundako yo masuw maid nu mikip-kikip om tumampo so tiningkuangon ni Paulus om ni Silas. 30Owito yo sono niyo duo koyuwan iiri lumabus kiat so jiil-i om mutongaro yo nu, “Oo tuan, onu ka otoop goma'on ku su' kikowiawan aku musingkolaid?” koo.
31Sumombuto yo nosiro nu, “Poimaid ko yo so si Yisus. Bang waalon mu soko ono, ikau om suku-sakat mu no kikowiawan musingkolaid,” koo. 32Poorotio yo sono ni Paulus om ni Silas tinongaran nu Kinoringan so iri wowaidon nu jiil-i om suku-sakat niyo ri. 33Awi ya iiri, owito yo nosiro nu wowaidon nu jiil-i so tontong kisungoi mongugas nu pilat nosiro ri, om nopupus iri diuo yo sono iyo ni Paulus om ni Silas maid nu suku-sakat niyo ri. 34Owito yo niyo si Paulus om si Silas mindakod koimbagu so waloi niyo ri, om pookano yo niyo. Sobana ko nosudu'an iyo om suku-sakat niyo ri so' poimaid-o sono nosiro nu Kinoringan.
35Susuab-i, suuo yo nu wowaidon moongobisara' ri ongo pulis-i mian so jiil om kinodawan nu nipolabus nu wowaidon nu jiil-i si Paulus om si Silas.
36Mutongaro yo sono wowaidon nu jiil-i so si Paulus om si Silas nu, “Sinuu' aku nu wowaidon moongobisara' ri polabus so kou. Indadi, panou kou yo, om otago muyu ya!” koo.
37Nga mutongaro yo si Paulus so ongo pulis-i nu, “Linubak kai nosiro so tiningkuangon nu lobuw suang, om jiniil kai nai' d'ado sala', pudi lobuw kai ya nu Ruum. Om kosiono simuk-simuk nosiro polabus so kai, nga dai kai ya moingin! Subai nosiro yo su mian tuui polabus so kai,” koo.
38Mulio yo sono ongo pulis-i pokoilo so wowaidon moongobisara' ri. Norongou-o po nu wowaidon-i nu lobuw-a nu Ruum si Paulus om si Silas, maa'-laa' sono nosiro. 39Miano yo nosiro so jiil-i mokimuwarong so si Paulus om si Silas, om lobusi yo nosiro, om tongaro yo kowarong-warong nu polaiwon kiat dii. 40Mululio yo sono si Paulus om si Silas so waloi ni Lidia sumambat nu lobuw poimaid-i, monginsosamod so nosiro, om mulaiwo yo.
Currently Selected:
Pinongoorapan 16: TomPWPgLgPn
Highlight
Share
Copy

Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.