Pinongoorapan 15

Puupokatan so Yirusalim

1Miano yo sono so Antiukia tinu-tinu koyuwan kiat so Yudia montuduk nu lobuw Yaudi poimaid so si Yisus nu, “Bang dai kou osunatan mongowaid nu Ukum ni Musa, d'ado kowiawan muyu musingkolaid kiat so Kinoringan,” koo.#Ot 12:3 2Nga sinumagka' si Paulus om si Barnabas nu pontudukan dai musuat iiri. Indadi nopili' sono nosiro maid nu tinu-tinu koyuwan kiat so Antiukia mian so Yirusalim, muupakat nu koogutan iiri so pinongoorapan ni Yisus om wowaidon wokon dii.

3Opiti yo sono nosiro nu lobuw poimaid so Antiukia ri sampai so dilabus nu bandar-i. Laid nosiro manou-panou maid nu lalan so Punisia om Samaria, nopaabar sono nosiro nu nopoimaid so si Yisus lobuw okon ko Yaudi so tontong wokon. Osudu'an sobana lobuw poimaid dii ri nu nokorongou nu abar iiri. 4Nokologa' yo po nosiro so Yirusalim, somungo yo nosiro nu lobuw poimaid, pinongoorapan ni Yisus, om wowaidon-i. Nopotuturan sono nosiro nu kiawi' winaal nu Kinoringan so lobuw okon ko Yaudi nipowaal so nosiro ri. 5Nga tinu-tinu lobuw Parisi, iri nopoimaid so si Yisus, minundii om minutangar nu, “Subai sunatan lobuw okon ko Yaudi, iri nopoimaid so si Yisus, om popongowaidon nu Ukum ni Musa,” koo.

6Muimpugo yo sono pinongoorapan ni Yisus om wowaidon wokon-i muupakat nu koogutan iiri. 7Pagka olaid nosiro mudodaawa, mundiio yo sono si Pitrus mutangar nu, “Oo su kosusulodan ku, noilaan muyu yo nu pinili' aku nu Kinoringan kiat nu gulu ri paabar nu Abar Owarong suat so si Yisus so lobuw okon ko Yaudi, tayon ong korongou nosiro om poimaid sono.#P'rapan 10:1-43 8Om Kinoringan, iri koilo nu inawo nu kiawi' lobuw, nopointolang-o nu tinorima' yo Niyo lobuw okon ko Yaudi, iya nu taakan Niyo nosiro nu Atod Niyo, soko iri ya nitaak Niyo so toko ri.#P'rapan 2:4; 10:44 9D'ado ya kopusondiangan toko so nosiro so tiningkuangon nu Kinoringan. Pagka poimaid-a nosiro so si Yisus, inidu' yo koraayan nosiro ri nu Kinoringan soko toko ya. 10Oraai sobana kou su mongolawan nu Kinoringan. D'ado kosudaan muyu monuu' nu lobuw okon ko Yaudi, iri poimaid so si Yisus, mongowaid nu adat owogat, so' insan odu aki toko ri ya om toko dai kogoos mongowaid nu ono. 11Ala' nai', poimaid toko so si Yisus om kikowiawan toko sono kiat so luluud Niyo, om soko ono ya pudi nosiro,” koo si Pitrus.

12Kiawi' lobuw minuimpug-i nokoodog om minongkinongou nu tuturan ni Paulus om ni Barnabas suat nu kiawi' koiran-iran winaal nu Kinoringan so lobuw okon ko Yaudi, nipogama' so nosiro ri. 13Noopod-o po si Paulus om si Barnabas mutangar, mutongaro yo si Yakubus nu, “Oo su kosusulodan ku, rongowo muyu yo aku! 14Sisuna ya potuturan ni Simun nu gama' nu Kinoringan mongoluluud nu lobuw okon ko Yaudi, tomod-o po Niyo nga momili' nu lobuw Niyo kiat nai so nosiro. 15Ono yo su musuat nu tinongaran nu ongo poo'abar nu Kinoringan gulu ri nu,

16‘Opupus ono, mululi' Aku ya

om uliton Ku koimbagu

pogkuosaan ni Daud,

17tayon ong kiawi' lobuw wokon

lumoga' tuui so Aku

maid nu kiawi' lobuw okon ko Yaudi,

iri pinili' Ku yo, nu osongapan Ku.

18Soko itu yo tinongaran nu TUHAN,

iri nopotuturan-o nu ono

kiat nu gulu ri,’

koo ri.#Am 9:11-12

19Indadi, so pikiran ku, dai owarong ong mongaagut toko nu lobuw okon ko Yaudi, iri poimaid so Kinoringan. 20Owarong ong monurat toko montuduk so nosiro, su' dai nosiro mongokan nu osabul, soko nokousaa' yo so tinindobuw, om mintoron nosiro gumilat, om dai mongokan nu kulos-kulos matoi kotolon, intawa mongokan nu raa'.#Kin 34:15-17; Ot 17:10-16; 18:6-23 21So' kiat po nu gulu ri sampai ya nu ono sono tu, bosa'on Ukum ni Musa so waloi sosombooyangan koduung Runat Pongintoronan toko, om niabar sono so kiawi' tontong,” koo si Yakubus.

Surat niloga' so lobuw okon ko Yaudi

iri poimaid

22Momilio yo sono pinongoorapan ni Yisus, wowaidon-i om lobuw wokon poimaid-i, nu tinu-tinu koyuwan niapit so Antiukia, maid so si Paulus om so si Barnabas, ono yo si Yudas (ngaran koduo niyo si Barsabas), om si Silas. Duo koyuwan oono sobana ko orumaton nu lobuw poimaid so Kinoringan so Yirusalim. 23Nopoowit-a nosiro nu surat so duo koyuwan oono, om itu yo totongaron so surat oono,

Orumat kiat so kai pinongoorapan ni Yisus, wowaidon om inong muyu poimaid. Surat iitu niloga' mai so kiawi' kosusulodan okon ko Yaudi, minolak so Antiukia, Siria, om Kilikia.

24Norongou mai nu kuwai tinu-tinu lobuw kiat tuui so kai minongaagut om nopogagau so kou nu pontudukan nosiro. Lobuw oono okon-a ko sinuu' mai. 25Pagka soko ono minuimpug kai sono tuui muupakat, om kiawi' nokotaayun-a nu suu'on tinu-tinu koyuwan mian nai so kou, maid so si Barnabas om si Paulus, iri sinomodan mai. 26Nosiro oono matoi miau, mugogoma'on suat so Tuhan toko si Yisus Kristus. 27Indadi sinuu' mai yo si Yudas om si Silas potarang so kou nu onsi nu surat iitu. 28Kai om Atod nu Kinoringan nga nokotaayun-a nu dai kou oguton nu oturan owogat po ko' opatut muyu waidon iitu, 29ono yo adang-o mongokan nu nokousaa' yo so tinindobuw-i, mintoron kou yo gumilat, om adang-o mongokan nu kulos-kulos matoi kotolon, intawa mongokan nu raa'. Bang dai muyu ono waalon, owarong gogoma'on muyu. Soko ono ya sono surat mai,

koo tangar so surat oono.

30Lumombuso yo sono so Antiukia duo koyuwan pinili' iiri om minongimpug dii nu lobuw poimaid-i om taaki yo nosiro surat-i. 31Nobasa' yo po iri nosiro, sobana ko nosudu'an nosiro noinsosomodan nu onsi nu surat-i. 32Olaid si Yudas om si Silas, iri poo'abar nu Kinoringan-i montuduk nu kosusulodan-i monginsosamod om posanang nu inawo nosiro. 33Olaid-laid-a nosiro molak-polak dii, suuo yo sono nosiro nu lobuw poimaid-i pouli' om kinodawan nu, “Sompiatag kai ya nu lobuw minonuu' so kou ri,” koo. 34(Nga topuso yo ni Silas nu mogol po iyo so Antiukia.)#15:34: Tinu-tinu solinan silaid-i noporuang ayat iitu.

35Si Paulus om si Barnabas nga minogol po kotinu-tinuan dii montuduk om potuturan nu totongaron nu Tuhan maid nu moomontuduk wokon.

Minutondiang si Paulus om si Barnabas

36Tinu-tinu nowulan kiat nu iri, mutongaro yo si Paulus so si Barnabas nu, “Owarong mululi' kito po sono mongondaa nu kosusulodan so kiawi' bandar, iri pinoobaran to nu tinongaran nu Tuhan-i ong muro-kuro nosiro,” koo. 37Poki'iingolan ni Barnabas si Yuanis Markus, 38nga dai tinumaayun si Paulus, so' dai tinumaan iyo maid-waid musingkaawi' nu gogoma'on nosiro nu gulu ri, om linaiwan-a nosiro ni Markus so Pampilia.#P'rapan 13:13 39Pagka soko iri, minusagka' sono si Paulus om si Barnabas sampai minutondiang nosiro. Owito yo ni Barnabas si Yuanis Markus om sumokoyo yo nosiro nu kapal mian so Siprus. 40Pinili' sono ni Paulus si Silas om owito yo niyo mompanou nu noopod lobuw poimaid so Antiukia ri pokomouli' so nosiro so Tuhan. 41Lumongkopo yo nosiro so wonuo nu Siria om Kilikia, popiot nu koimaidan nu lobuw dii ri.

Currently Selected:

Pinongoorapan 15: TomPWPgLgPn

Highlight

Copy