1 Kurintus 8

Suat nu ookanon niusaa' so tinindobuw

1Kosiono sumambut aku nu duduat muyu nu, kowasa ya ka lobuw poimaid mongokan nu niusaa' so tinindobuw ko' dai.

Obana ya nai' totongaron nu lobuw nu, “Oilaan toko nu d'ado ya kuasa nu tinindobuw so toko,” koo ri. Nga koilaan soko ono ourug nu kopusingkooyo-oyoan sono nu lobuw. Nga bang musosamod, ono yo su popiot nu koimaidan toko. 2Iri yo po lobuw monokod nu osuang oilaan, sobana yo dai po nokoilo nu kiawi' mupatut oilaan niyo. 3Nga iri yo po lobuw bana-bana ko osamod nu Kinoringan, iyo yo su songapan nu Kinoringan.

4Suat so mongokan nu ookanon nokousaa' yo so tinindobuw, oilaan toko nu tinindobuw oono soko ponondu'an nu owod-owodon so pomikiran nu lobuw-a. Om oilaan toko ya nu ido-ido ya Kinoringan. 5Osuang nai' pinokokinoringan om pinokotuhan so langit om so wonuo tu, 6nga suat so toko, ido-ido ya Kinoringan. Iyo yo su Amo om minongowangun nu onu yo po, om miau toko suat so Iyo. Tuhan nga ido-ido ya, ono yo si Yisus Kristus. Iyo yo su pinowaidan nu Kinoringan momaal nu kiawi', om Iyo yo su powiau so toko suat so Kinoringan.

7Soko ono pona, okon-a ko kiawi' lobuw poimaid koilo nu d'ado yo kuasa nu tinindobuw oono so iyo, so' ono yo su koopotan mongusaa' nu tinindobuw. Ono yo ko', ono sono tu kakal po nosiro momikir nu ookanon-o po nokousaa' yo so tinindobuw nga songapan-o nu tinindobuw. Nadi, bang mongokan nosiro nu ono, pagka dai obasag koimaidan nosiro, monokod sono nosiro nu kosindoraai so nosiro. 8Sobana yo, ookanon oono dai ya kopongimbarong so toko om Kinoringan. Mongokan ko' dai, d'ado ya kountungan intawa korugian toko.

9Nga, kou opiot-o koimaidan, ingato muyu yo. Adang-o momaal nu koboyayat nu lobuw dai po opiot koimaidan kopomaal nu koraayan. 10Tomod ku yo po soko itu, ono yo bang ikau, opiot-o koimaidan om oilo, mogom mongokan so waloi nu tinindobuw, om osiou ko sono nai nu lobuw dai po opiot koimaidan, kooku' sono iyo mongokan nu ookanon nokousaa' yo so tinindobuw oono. 11Nadi, kopongoraag sono koilaan mu oono nu koimaidan nu lobuw dai po opiot koimaidan-i, ampa si Kristus nga minatoi-a suat so iyo. 12Om bang mongusiba' kou nu koimaidan nosiro, kopongowaal kou nu koraayan suat so inong muyu poimaid om so si Kristus. 13Ono yo ko', bang kourug ookanon oono nu koraayan suat so sulod inong koimaidan, owarong po dai yo su mongokan nu onsi nokousaa' yo so tinindobuw oono, su' dai aku koowit-owit nu inong ku poimaid kopomaal nu koraayan.

Currently Selected:

1 Kurintus 8: TomPWPgLgPn

Highlight

Copy