1 Kurintus 12

Ponaak nu Atod nu Kinoringan

1Kosiono potarang aku suat nu ponaak nu Atod nu Kinoringan.

Oo su kosusulodan ku, moingin aku nu oilaan muyu onu obana suat nu ono. 2Ondomo muyu yo nu, laid dai po kotondu' kou nu Tuhan, nokowaid-waid kou mongusaa' nu tinindobuw nu dai miau. 3Ono yo ko' potarang aku sobana nu, lobuw-o po kuosaan nu Atod nu Kinoringan, dai koputangar nu, “Owusung-o si Yisus!” koo. Soko ono ya d'ado ido koputangar nu, “Si Yisus-o Tuhan!” koo, ong dai kuosaan lobuw oono nu Atod nu Kinoringan.

4Kuwai boroginis ponaak nu Atod nu Kinoringan, nga kiawi' nu ono ido-ido ya Atod nu Kinoringan inungkiaton. 5Osuang ginis nu gogoma'on suat so Tuhan, nga ido-ido ya tomod nu gogoma'on oono, ono yo Tuhan. 6Om pudi pona osuang ginis nu gogoma'on, ido-ido ya Kinoringan su pourug nu ono. 7Ido soido lobuw poimaid, taakan nu Kinoringan nu ponondu'an nu kuosaan iyo nu Atod nu Kinoringan, om pokayon niyo ono monabang nu kiawi' lobuw poimaid. 8Kuwai lobuw taakan nu koo'ilo potuturan nu abar nu Kinoringan, om kuwai wokon taakan nu koo'ilo potarang nu pongoilaan nu olalom. 9Atod-a oono su popiot nu koimaidan nu ido koyuwan, om wokon kopomali' nu lobuw. 10Atod-a oono su popomaal nu koiran-iran, om wokon po polombus nu kodau nu Kinoringan, om wokon po oilo popupinig nu kuosaan ka ido koyuwan nu Atod nu Kinoringan intawa moinat. Kuwai ya koputangar nu boroginis nu tangar, om wokon poorati nu ono. 11Kiawi' oono winaal nu ido yo Atod nu Kinoringan. Ido soido taakan nu musosondiang ponaak musuat nu koinginan nu Atod oono.#Rm 12:6-8

Osuang boogian nu koyuwan nga ido-ido ya koyuwan

12Si Kristus-o po soko ido koyuwan nu osuang boogian. Osuang pona boogian, nga ido yo koyuwan.#Rm 12:4-5 13Soko ono ya pudi toko, kiat-o so lobuw Yaudi kumoo yo so okon ko Yaudi, kouriponan om okon ko uripon. Nodiu' toko yo kiawi' nu ido yo Atod nu Kinoringan, sumiliw nu puimpugan soko koyuwan ni Kristus. Kuosaan inawo toko nu ido yo Atod oono, 14so' koyuwan nu lobuw tu okon-a ko ido yo boogian nga osuang.

15Pudi pona koputangar akod-o nu, “Pagka okon-a ko longon aku, okon ko boogian aku nu koyuwan,” koo, otatap-a nu boogian akod-o nu koyuwan. 16Pudi pona koputangar tolingo nu, “Pagka okon-a ko mato aku, okon-a ko boogian aku nu koyuwan,” koo, otatap-a nu boogian tolingo no nu koyuwan. 17Bang olimbatu koyuwan oono nu mato, dai sono korongou koyuwan-o, om bang olimbatu koyuwan oono nu tolingo, dai kosingud koyuwan oono. 18Nga Kinoringan-o su noposangon nu ongo boogian oono so koyuwan. Nisangon Niyo ido soido boogian so tontong otoop musuat nu koinginan Niyo. 19Bang kiawi' nga ido-ido ya boogian, okon ko koyuwan sono koingoranan.

20Nga osuang pona boogian nu koyuwan, ido-ido ya koyuwan. 21Ono yo ko', dai koputangar mato no so longon nu, “D'aku moingin so ikau!” intawa ulu no mutangar so akod nu, “D'aku moingin so ikau!” koo. 22Ala' nai' ono boogian tokodon nu okugui, oogot po bana so koyuwan. 23Om ono boogian tokodon toko nu oworos kosudaan, ono nai' su maayo kikosudaan. Boogian nu dai oparu' kosiowan-o, sulungan nai' nu pokakas, 24om boogian nu owarong kosiowan-o, dai muru' sulungan nu pokakas. Nousai-o nu Kinoringan koyuwan toko, su' ipatan toko boogian tokodon nu dai oogot-o. 25Winaal nu Kinoringan soko ono, su' kopugogoma'on om dai musosagka' ongo boogian nu koyuwan, ala' nai' mupopoduli'. 26Bang osonsara' ido boogian nu koyuwan, soko kowaid-a osonsara' boogian wokon. Bang royowon ido koyuwan so puimpugan, maid-a sumudu'an kiawi' lobuw.

27Nadi, kou yo soko koyuwan ni Kristus, om ido soido so kou nga boogian nu koyuwan oono. 28Soko ono ya pudi puimpugan nu lobuw poimaid, tinantu yo nu Kinoringan gogoma'on nu boroginis lobuw. Gulu po pinongoorapan, koduo poo'abar nu Kinoringan iri polombus nu kodau Niyo, kotolu moomontuduk iri potarang nu kodau nu Kinoringan, noopod ono lobuw momaal nu koiran-iran, lobuw kopomali', lobuw monabang nu lobuw wokon, wowaidon, om lobuw koputangar nu boroginis nu tangar.#Ip 4:11 29Okon-a ko kiawi' osiliw nu pinongoorapan, intawa poo'abar, intawa moomontuduk. Okon ko kiawi' kopomaal nu koiran-iran, 30intawa kopomali' nu lobuw, intawa mutangar nu boroginis nu tangar, intawa poorati nu totongaron oono. 31Ono yo ko' pogkari'-kari' kou yo mindamo nu ponaak oogot sobana.

Nga kosiono tu montuduk aku so kou nu kogoyaan owarong po ko' wokon.

Currently Selected:

1 Kurintus 12: TomPWPgLgPn

Highlight

Copy