ONDJIMBOLELA 5
5
1Mumwameme, muyalekwa gwandje,
onde ya moshikunino shandje;
otandi gongele omira niizimba yandje.
Otandi li oshithima shehila lyoonyushi nomagadhi gandje goonyushi,
otandi nu omaviinu nomahini gandje.
Ookuume:
Ookuume, lyeni ne mu kolwe kohole.
Ondjimbo ontine
Omufuko:
2Ngame onda li nda kotha
ihe omwenyo gwandje ogwa tonata.
Pulakena! Omuholike gwandje ta konkola.
Mbushiki:
Mumwameme, kanuunyalona kandje, egulula ndje,
onguti yandje, namuyelele gwandje!
Oshoka omutse gwandje ogwa hipa omume,
nomafufu gandje oga hipa omata guusiku.
Omufuko:
3Ondi ihula nale oonguwo dhandje,
nandi dhi zalulule?
Onda yogo nale oompadhi dhandje,
nandi dhi luudhike ishewe?
4Omuholike gwandje okwa tsu oshikaha she mombululu yomweelo.
Nena omwenyo gwandje ogwe mu tukulukile.
5Onda yambuka ndi ke egulule omuholike gwandje,
niikaha yandje otayi hiha omira,
nominwe dhandje odha menka omugwayo gwomira poshipatitho shomweelo.
6Onde egulula omuholike gwandje,
ihe omuholike gwandje okwa adhika a zi po, a henuka po.
Sho a li ta popi, onda ngwangwanekwa.
Onde mu kongo, ihe inandi mu mona;
onde mu ithana, ihe ina yamukula ndje.
7Aalangeli mboka taa endaenda noshilando,
oya adha ndje.
Oya dhenge ndje noya toshola ndje iilalo;
aalangeli yopomakuma oya kutha po elwaakani lyandje.
8Aakadhona Aajerusalem, otandi mu ganitha:
ngele tamu mono omuholike gwandje,
otamu ke mu lombwela shike?
Mu lombweleni kutya onda pya ompiya yohole.
Ookuume:
9Ngoye omunandjelo mokati kaakiintu,
omuholike gwoye oku na shike e vule yakwawo?
Omuholike gwoye omwaanawa ngiini e vule yakwawo,
sho to tu ganitha ngeyi?
Omufuko:
10Omuholike gwandje omuyelele omushekesheke.
Okwa simana mokati komayuvi omulongo.
11Omutse gwe oshingoli, oshingoli oshiyelele,
nomafufu ge goondhinga omaluudhe ngedhilakola.
12Omeho ge oga fa oonguti pomatondokelo gomeya.
Omayego ge omatokele ga fa ga yogwa momahini
noga dhama nawa.
13Oompanda dhe odha fa iimpungu yiimeno hayi zi eka lya nika nawa.
Omilungu dhe ongoongala dha sheneka tadhi ndonda omira.
14Omaako ge oga fa omitenge dhoshingoli dha dhamithwa ookrisoliti,
nolutu lwe olwa fa omayego goondjamba ga hongwa
nuunkulungu noga siikilwa noosafire.
15Omagulu ge oga fa oongudhi dhomarmera
dha ndjikwa moompadhi dhoshingoli sho sheneshene.
Olupe lwe olwa fa lwondundu Libanon,
lwa tuwalala lwa fa omisendeli.
16Okana ke okatoyetoye,
eeno, ashihe shomuye otashi kolitha ndje.
Osho omuholike gwandje, kuume kandje,
e li ngaaka, ne aafuko Aajerusalem.
Ookuume:
Currently Selected:
ONDJIMBOLELA 5: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
