ONDJIMBOLELA 4
4
1Kanuunyalona kandje, owo opala ngiini!
Taa, owa poloka mo ngiini!
Omeho goye taga konita mewiiwili lyoye,
oga fa oonguti.
Omafufu goye oga fa oshigunda shiikombo tayi kuluka kondundu Gilead.
2Omayego goye oga fa oshigunda shoonzi opo dha kululwa,
opo tadhi zi mendipo.
Adhihe odha vala oonkwanambwiyu,
nomokati kadho kamu na nando oyimwe yaa na okanzona.
3Omilungu dhoye odha fa okapaya okatiligane tye,
nokana koye oko okatoye.
Oombandu dhoye meni lyewiiwili lyoye
odha fa oombinga dhondunga yomugranati.
4Othingo yoye oya fa oshungo yaDavid ya tungwa nuulenga
moka mwe endjelela omahuuyanza eyuvi, agehe ogo omahuuyanza goofule.
5Omagundji goye oga fa uumbambyona uyali,
ongaashi uukwanambwiyu wombambi tau napa mokati koongala dha sheneka.
6Oshingulohi sho kwa pepa,
nomizizimba tadhi lelepala,
otandi yi kondundu yomira noshikulundundu shiitsinino.
7Kanuunyalona kandje,
ayihe oye ku opala; ino pumbwa sha.
8Mufuko gwandje, ila,
za nangame kuLibanon.
Za ko kondungu yondundu Amana,
kondungu yondundu Senir nokondungu yaHermon,
okiiholameno yoonime nokoondundu dhoongwe.
9Owa goola ndje, mumwameme,
muyalekwa gwandje; owa goola ndje nekeuko limwe
nokamona kamwe komuumona womothingo yoye.
10Mumwameme, muyalekwa gwandje,
ohole yoye oyo opala ngiini!
Ohole yoye ontoye yi vule omaviinu,
nezimba lyomugwayo gwoye oli vule iizimba ayihe yilwe!
11Omilungu dhoye, muyalekwa gwandje,
ohadhi ndonda omagadhi goonyushi.
Omagadhi goonyushi nomahini oge li kohi yelaka lyoye,
nezimba lyoonguwo dhoye olya fa ezimba lyaLibanon.
12Mumwameme, muyalekwa gwandje,
owa fa oshikunino shokuvululukilwa sha pateka,
owa fa omuthima gwa siikilwa nothithiya yopaumwene.
13Ngoye owa fa oshikunino shomiti dhomigranati
dhi na iiyimati hayi eta olwiho okuliwa,
oshikunino shiihwa yohenna niigwanga yonardi,
14onardi nosaframi, olutope nokanakamuma
pamwe nomiti dhi ili nodhi ili dhiitsinino,
omira, endombo niizimbalela yi ili noyi ili.
15Ongoye othithiya yiikunino,
omuthima gwomeya omanamwenyo
taga kunguluka taga zi kuLibanon.
Omufuko:
16Mbepo yokuumbangalantu, penduka,
nombepo yokuumbugantu, ila!
Pepeleni oshikunino shandje,
opo omazimba gasho ga nika nawa ga taandele.
Omuholike gwandje ne ye moshikunino she,
na lye iiyimati yasho iitoye.
Mbushiki:
Currently Selected:
ONDJIMBOLELA 4: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
