MIKA 4
4
Epangelo lyOmuwa lyaaluhe lyombili
(Jes. 2:1-4)
1Momasiku tage ke ya ondundu hoka kwa tungilwa otempeli,
otayi ka ninga ondeendeka yi vule adhihe,
otayi ki itumba kombanda yoondundu adhihe.
Iigwana oyindji otayi ka matukila kuyo,
2naantu yayo otaa ka tya:
“Natu londeni kondundu yOmuwa,
tu ye kotempeli yaKalunga kaIsrael.
Ote ke tu nongeka shoka a hala tu longe;
otatu ke enda momapola e ga hogolola.
Oshoka elongo lyOmuwa otali zi muJerusalem;
okuza muSion ota popitha aantu ye.”
3Oye ta loteke oontamanana mokati kiigwana,
mokati kiigwana iinankondo popepi nokokule.
Otaa ka hambula omagonga gawo omatemo
nomagongamwele gawo iimwitho.
Iigwana itayi ka ya we kiita,
itayi ilongekidhile we olugodhi.
4Kehe gumwe ota ka kala nombili
mokati komiviinu nomikwiyu dhe,
nokape na ngoka te mu halutha we.
Omuwa Omunankondoawike oku uvaneke shika.
5Oshigwana kehe otashi simaneke nokuvulika kuKalunga kasho shene, ihe tse otatu ka longela nokuvulika kOmuwa Kalunga ketu aluhe sigo aluhe.
Israel ota galuka muupika
6Omuwa ota ti: “Esiku otali ya, uuna tandi ka gongela aantu mboka nde ya geele, oomboka ya hepela muupika. 7Oya lemana noya kala kokule noyaandjawo, ihe otii ka ninga etameko epe kwaamboka ya thigala po, oyo notaa ka ninga oshigwana oshinene. Okuza kesiku ndyoka otandi ka ninga omukwaniilwa gwawo kondundu Sion sigo aluhe.”
8Nangoye, Jerusalem, moka Kalunga ha tonatele aantu ye ngaashi omusita, oto ka ninga oshilandopangelo shuukwaniilwa, ngaashi wa li nale. 9Omolwashike to kugu mokulekule? Omolwashike to hepekwa ongomukulukadhi ta thetwa? Ku na we omukwaniilwa? Omugandjindunge gwoye a mana oondjenda? 10Igonyeni e tamu tongo, ne aantu yaJerusalem, mwa fa omukulukadhi ta thetwa, oshoka ngashingeyi omu na okuthiga po oshilando, mu kale mombuga. Omu na oku ka ya kuBabilon, ihe Omuwa ote ke mu hupitha miikaha yaatondi yeni. 11Iigwana oyindji oya gongala, yi mu ponokele. Otayi ti: “Jerusalem oshi na okuyonagulwa po! Otwa hala okumona oshilando shika sha kumunwa po.” 12Ihe iigwana mbika inayi tseya shoka shi li momadhiladhilo gOmuwa. Kayi uvite ko nokutya oya gongelwa, opo yi geelwe ngaashi iilya ye etwa kolupale, opo yi yungulwe.
13Omuwa ota ti: “Aantu yaJerusalem, indeni, mu ka geele aatondi yeni! Otandi mu pe oonkondo mwa fa ontsezi yooniga dhiiyela nomakondo goshikushu. Otamu ka tatagula iigwana oyindji, nomauyamba ye ga yuga, otamu ke ga etela ndje, ngame Omuwa guuyuni auhe.”
Currently Selected:
MIKA 4: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
