2 ONDJALULO 8
8
Iilonga yaSalomo
(1 Aak. 9:10-28)
1Osha pula Salomo omimvo omilongo mbali okutunga otempeli nuuwa we. 2Okwa tungulula wo iilando mbyoka e yi pewa komukwaniilwa Hiram, e ta langeke mo Aaisraeli. 3Okwa kwata po oshikandjo shaHamat naZoba 4e ta tungile oshilando Tadmor mombuga edhingililokuma. Okwa koleke iilando ayihe muHamat, opo a pungule mo omaliko. 5Salomo okwa tungulula wo iilando Bethoron shopombanda naBethoron shopohi (okwe yi tungile edhingililokuma li na omiyelo tadhi vulu okupatwa), 6osho wo oshilando Baalat, iilando ayihe moka ta pungula omaliko, niilando moka tamu kala uukambe nomatembakwiita ge. Okwa gwanitha omadhiladhilo ge agehe gomatungo muJerusalem, muLibanon nomoshilongo ashihe moka a li ta pangele. 7-8Salomo okwa longitha miilonga yethiminiko omaluvalo agehe gAakaanana mboka inaa dhipagwa po kAaisraeli, sho ya kutha ko evi lyawo. Muka omwa kwatelelwa Aaheti, Aayamori, Aaperesi, Aahevi nAayebusi, mboka omaluvalo gawo ga kala aapika sigo onena. 9Aaisraeli inaa longithwa miilonga yethiminiko, ihe oya ningi aakwiita, aaniihako, oondjayi, dhomatembakwiita noondjayi dhaakayilinkambe. 10Okwa li aanambelewa 250 metonatelo lyiilonga yethiminiko yomatungo gi ili nogi ili.
11Salomo okwa tembudha omunyekadhi gwe omuna gwomukwaniilwa gwaEgipiti, a zi moshilando shaDavid a yi muuwa mboka Salomo e u mu tungile. Salomo okwa ti: “Omunyekadhi nguka ita vulu okukala muuwa waDavid, omukwaniilwa gwaIsrael, molwashoka eha ndyoka li na oshikethahangano, olyo eyapuki.”
12Salomo okwa yamba omafikilondjambo kOmuwa koshiyambelo shoka e shi tungile komeho gotempeli. 13Okwa yamba omafikilondjambo pamautho gompango yaMoses esiku kehe eyapuki: Omasabati, iituthi yoomwedhi oompe niituthi yopatatu yomomumvo — Oshituthi shiikwiila yaa na efulika, Oshituthi shoshiwike nOshituthi shomatsali giihwa iitalala. 14Ngaashi shu uthwa kuhe David, Salomo okwa pongolola iilonga yesiku kehe yaayambi noyAalevi mboka taa kwathele aayambi mokwiimba omaimbilo nomokutsakanitha iilonga yawo. Okwa topola wo aalangeli yotempeli moongundu okulangela pomweelo kehe, opautho lyaDavid, omumati gwaKalunga. 15Omautho ngoka David a gandjele kaayambi nAalevi omolwoompungulilo niinima yilwe, oga gwanithwa naanaa.
16Iilonga yaSalomo ayihe oya tsakanithwa. Okuza ketameko lyekankameno lyotempeli sigo okehulilo lyetungo iilonga ayihe oya li ye ende nawa.
17Nena Salomo okwa yi kuEziongeber naElat, komatulilo gopEkololo lyaAkaba mevi lyaEdom. 18Omukwaniilwa Hiram okwe mu tumine oosikepa mewiliko lyomalenga ge mwene naantu mboka ya tseya efuta. Oya thayile pamwe naantu yaSalomo yu uka kevi lyaOfir noye etele Salomo oshingoli shondjundo yookilograma 15,000.
Currently Selected:
2 ONDJALULO 8: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.