2 ONDJALULO 7
7
Salomo ta yapulile Omuwa Otempeli
(1 Aak. 8:62-66)
1Omukwaniilwa Salomo sho a hulitha egalikano lye, omulilo ogwa gu megulu e tagu lungunitha po omafikilondjambo ngoka ga li ga yambwa, neadhimo lyOmuwa olyu udha otempeli. 2Aayambi inaa wapa okuya motempeli omolweadhimo. 3Aaisraeli sho ya mono omulilo tagu kuluka megulu, nuuyelele u udha otempeli, oya tsu iipala pevi kolupale lwomamanya, taa simaneke Kalunga taye mu hambelelele uuwanawa we nohole ye yaaluhe. 4Nena Salomo pamwe naantu ayehe oya yamba omafikilondjambo kOmuwa. 5Okwa yamba ekwatathanondjambo lyoongombe 22 000 noonzi 120 000. Osho ngaaka ye naantu ayehe ya sindilile otempeli. 6Aayambi oya thikama mehala ndyoka ye li uthilwa, nokomeho gawo okwa thikama Aalevi taa tanga Omuwa niihikomwa mbyoka omukwaniilwa David e yi longekidhile, yo taa imbi eimbilo tali ti “Ohole ye oyaaluhe”, ngaashi ya lombwelwa kuDavid. Aayambi oya hiki omankuma, manga aantu ayehe ya thikama.
7Esiku tuu ndyoka Salomo okwa yapula wo endiki lyehale lyokomeho gotempeli e ta yambele nkoka: omidhidhindjambo, iikulyandjambo noofu dhiimuna yomekwatathanondjambo. Okwa ningi ngaaka, oshoka oshiyambelo shoshikushu osha li oshishona okuyambela mo omayambo ngaka agehe.
8Salomo nAaisraeli ayehe oya dhanene Oshituthi shomatsali giihwa iitalala omasiku gaheyali. Okwa li ongundu onenenene yaantu ya kongoloka okuza kuupitilo waHamat kuumbangalantu nokongamba yaEgipiti nuumbugantu. 9Oya kala omasiku gaheyali gokusindilila oshiyambelo niishewe omasiku omakwawo gaheyali goshituthi. Mesiku lyahugunina oya zimbuka okudhana oshituthi, 10nomesiku lya landula ko, metimilongombali nagatatu lyomwedhi omutiheyali, Salomo okwa laleke aantu, ya shune komagumbo. Oya li ya nyanyukilwa omayambeko agehe ngoka Omuwa a yambeke nago aantu ye Aaisraeli, David naSalomo.
Kalunga ti ihololele Salomo
(1 Aak. 9:1-9)
11Salomo sho a mana etungo lyotempeli nombala ye e ta tsakanitha ayihe yilwe a halele oku yi tunga, 12Omuwa okwe mu ihololele uusiku. Okwa ti kuye: “Ondu uvu egalikano lyoye nonda taamba otempeli ndjika, yi kale eha moka omayambo taga yambelwa ndje. 13Uuna tandi eta oluteni, ko kaku na omvula, nenge te tumu oombahu, dhi lye po iimeno, nenge te tumu elega mokati kaantu yandje, 14ngele taa galikana ndje e tayi itedhulula notaa pilamene uuwinayi mboka ye u ningile, nena otandi ya uvu megulu, te dhimi po oondjo dhawo e tandi hepulutha ishewe oshilongo shawo. 15Otandi tonatele otempeli ndjika e tandi uvu omagalikano agehe ngoka taga galikanenwa mo, 16oshoka onde yi hogolola e tandi yi yapula, yi kale eha moka te simanekelwa mo sigo aluhe. Otandi yi tonatele noku yi gamena aluhe. 17Ngele oto longele ndje nuudhiginini, ngaashi ho David a ningile, to vulika kiipango yandje e to gwanitha ayihe mbyoka nde ku lombwele, 18otandi ka tsakanitha euvaneko nde li uvanekele ho David, sho nde mu lombwele kutya Israel oku na okulelwa aluhe koluvalo lwe. 19Ihe ngele ngoye naantu yoye itamu vulika kiipango yandje nokomalombwelo gandje ngoka nde ge mu pa, e tamu simaneke ookalunga yalwe, 20nena otandi ke mu tembudha mevi ndyoka nde li mu pele, e tandi ka thiga po otempeli ndjika nda yapula, yi kale eha moka tandi simanekelwa mo. Iigwana koombinga noombinga otayi ke yi sheka noku yi dhina.
21“Otempeli ndjika oya simana ngashingeyi, ihe nena kehe omupitipo ota ka haluka e ta pula ta ti: ‘Omolwashike Omuwa a ningile ngeyi oshilongo shika notempeli ndjika?’ 22Aantu otaa ka yamukula taa ti: ‘Osha ningwa, oshoka oyo oye etha Omuwa. Kalunga kawo, ngoka a tembudha oohekulu muEgipiti. Oyi inekele ookalunga yalwe e taye ya simaneke. Omolwashoka Omuwa e ya etele omupya nguka.’ ”
Currently Selected:
2 ONDJALULO 7: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.