Rom 1

Paul légé waigi

1Na ’enung Paul go gié go Jésu Krist koi. Kumu teng beleng paja go gié bua, ddi parung ca ’enunga dura Nô do Ddari bu’.

2Kumu dor kebu ca Nô do Ddari la tumu din, duro cidab do arin carara gusu ga cogelé kebu goi. 3Nô do Ddari la, do Kurondi Bagulondena Jésu Krist toi, ddia kema go ba woi a to moin go kelma Dabid koi. 4Ama Kumu geli waldong wang ca ddia Kurondi go dono, na a gusu Habé ga Kumu kai bua, dang belé goi goang cindi a duro ga maré bu’. 5Na ca Krist ma, Kumu leng wai ca ’enung belu paja go gié ca hormo do Krist toi, ca kalang cindegé kaindigé kaindigé mam, kandia bu cindi bua, kandia ja kual goi bu’. 6Keng ga Rom, keng wa duro kalang ga Kumu ba tégé lé ca kandia belu ga Jésu Krist kai.

7’Enung pasu maktub la gusugeng keng mam ga a Rom, ga Kumu kederei ba ’yogeng bua, ddi togeng ca kenga jima kalang gai bu’. Dda Baina Kumu dang Bagulong Jésu Krist, ké bugeng waiang jalua juam.

Paul dar ca ddia oré solé ga Krist kai a Rom

8Tumu jua na, ’enung lé Kumu guang désé caigeng mam a gusu Jésu Krist, cawa bo cindi gogeng aju a duro delinya mam. 9Cawa Kumu go ’enung wa lo gié goi dang ddaingung pena ca doré Nô do Ddari do Kurondi toi na, ddi sol ca kual guang la cindi. Ddi sol ca ’enung ’erem caigeng waindo waindo. 10Kiddin ga ’enung wa olé caigeng waindo waindo na, ’enung ol Kumu ca ddi nia dar na, ddi bung dono ca ’enung oré waiegeng. 11Cawa tabelang dogeng leng nain ca ’enung oré solegeng, ca ’enung segeng busu do Habé togé ca keng waia dono. 12Kual go ddo mam na, ’enung dar ca jomé duroigeng ca na mam waia jégené, dda ’enung wai jégené ca bo cindi gogeng bua, keng kau waia jégené ca bo cindi guang bu’.

13Karmeng, ’enung dar ca keng sela waindo waindo, ’enung dar ca oré solegeng ca gié guang waié wo duroigeng, main ddi ba waiang a duro kalang ga toigé ddang kain, ama ké narung bera labegé. 14Cawa na gié guang ca oré gusu kalang mam, kalang ga solé dang kalang ga basé solé bua, kalang ga nadurong dang kalang ga mamiyong bu’. 15Na ca ma ’enungang tabelang ca ’enung doregeng keng ga ba jom a Rom Nô do Ddari bu’.

Nô do Ddari dono doa

16Ca doré Nô do Ddari na, dasé leng ’eno, cawa toa dono do Kumu toi do minyé kalang mam ga bo cindi, na ca ga Juib tumu jua, kardené ca kalang ga toigé ddang bu’. 17Nô do Ddari gel waldong wang ca Kumu belé kalang geddang tumoi, to do so dang to do karé na, na bo cindi mera, main ké ba pasuang a duro cidab do Kumu toi kain. Kema goni goni belé geddang tumu Kumu ca bo cindi na, ddia jomang cindi.

Mainyé do Kumu toi wo ca isinwa do kalang togé

18Kumu gelgu mainyé doi a dang, ca isinwa dang wané do kalang togé mam do ba nar kalang ca solé kual go cindi. 19Kumu kaidé kual caigé ca kalang bbala ca solé Kumu ca henga ga ddi ba gelegé waldong wang. Kumu ddi banga gelegé henga le waldong wang. 20Cawa kiddin ga Kumu ba debu delinya din bera labegé na, henga ga bbala solang cin ’eno wo kené, to do poré na dono doi do bera kuddum bua, dang ddi bang gusi bu’. Kalang bbal ca solei ca gié goi go ddi ba lei lé, na ca ma ké bbal ca soang toigé ’eno. 21Ké sol Kumu ama ké bi hormo ’eno bua, ké lei dési main kondia Kumu gogé kain ’eno bu’. Ama ’eremé gogé belé kalin yag bua, mader dogé belé ddaindigé delem. 22Ké yé waldong wang, ka ga nadurong nain, ama ka ga mamiyong. 23Ké melaua Kumu go hormo go jomang cindi bera kuddum ’eno, ama ké melaua tiddin do kema go maré toi bua, dang do ceddong togé bua, dang do pagé ga gondigé poddin poddin togé bua, dang henga ga nyardang ddaindigé togé bu’.

24Na ca ma Kumu ddégé ca kandia la gié go tabelang do ddaindigé kua go ddisin bua, kandia la henga ga dasé dang gusugé bu’. 25Ké kelangu kual go Kumu koi go cindi dang kual go poi bua, ké melawu henga ga Kumu ba debegé bua, ké légé gié bu’. Ké melaua Kumu bang go debé henga mam ’eno, na ddi go bbalé melaué bera kuddum. Amin.

26Na ca ma, Kumu ddégé duro tabelang do dasi. Kandigé kau kelangu dibé gogé go kanduai ca lo henga ga bbala ca lo ’eno. 27Bainyong kau lang main kain bu’, ké kain woié go kandu kogé cong, ké lé tabelang do ’ela ’ela dang gusugé, bainyong lé henga ga dasiang kamdigé, ka wai kual go kaidé bbal ca isinwa dogé.

28Ca ké ba dar ka solé Kumu ’eno na, Kumu ddégé duro ’eremé gogé go isini ca kandia la henga ga kedegégé ba dar ca lo. 29Ddaindigé wonanga henga ga isini bua, dang wané bua, dang mala mala bua, dang terin bu’. Ké wonang ddéngi bua, dang deddé go temai bua, dang bojé bua, dang bandu bua, dang kual go babé bua, dang kual go cumboddé bu’. 30Ké yé kual go isini ca kamdigé bua, ka Kumu kai ga tebena bua, ka kalang ga cin osua bua, ka kalang ga ca osua bua, ka kalang ga pedé gusugé bu’, ka kalang ga lo isinwa do herua bua, ka kalang ga jo kalndigé gelé gogé ’eno bu’. 31Ka kalang gang narua ’eno bua, ké maga kebu gogé go doré ’eno bua, ké sela kalang nyageigé ’eno bu’. 32Ké sol kual go kaidé go Kumu koi ddar, ca kalang ga lo henga ga main kain lé na, kandia bbala maré, ama ké dda isinwa lo goa ’eno, ké ’yé dura tumu tumu bua, gusugé mowegé ca kalang ga lo isinwa main kain lé bu’.

Currently Selected:

Rom 1: TNG1978

Highlight

Copy