Rom 2

Kual go kaidé go Kumu koi

1Ji go kaidé kual ca kamdin na, jo go soang toin ’eno, cawa kiddin ga ji wa kaidé kual ca kamdin na, ama ji nia lé henga ga main nagé kain bu’ na, ji kaidé kuala ca gusin bu’. 2Na sol ca Kumu nia kaidé kual ca kalang ga lo henga ga main kain na, na cindi. 3Ji go wa kaidé kual ca kalang ga lo henga ga main kain lé na, ama ji bang wa logé bu’, ji ’erema ca ji da nyurodu a duro kual go kaidé go Kumu koi ga? 4Ji dora olum do Kumu toi do nain dang ’yomé go ddaindi kel ga? Ji sol ca olum do Kumu toi wa goloin ca jia ’era bega kibin ’eno ga? 5Ama ca cain osua doa bua, dang ddaindin laua doa bu’ na, ji wa serang kual go kaidé go gumu cain duro wolé go mainyé do Kumu toi, kiddin ga ddia kaidé kual goi go geddang. 6Ddia boi kema goni goni bbalé ca gié goi go ddi ba lei. 7Kalang ga lo henga ga ddari bua, ga daré henga ga hormo bua, ga daré jomé goang cindegé bera kuddum bu’ na, Kumu da bigé jomé goang cindegé bera kuddum lé. 8Ama kalang ga lo tebenang nai bua, dang ké ga kainyé gelé go cindi cong ca lo henga ga isini bu’ na, Kumu da kaidé kual caigé dang mainyé doi. 9Kalang ga lo henga ga isin na, ka wai gelé go cin dang kederé ’endua bu’. Na ca ga Juib tumu jua, kardené sai ji ca kalang ga toigé ddang dé. 10Ama ké ga lo henga ga ddari na, Kumu da bigé hormo dang jalua juam bu’. Na ca ga Juib tumu jua, kardené sai ji ca kalang ga toigé ddang dé. 11Cawa kalang mam tumu Kumu na pena.

12Kalang ga ba lé isinwa basé solé so go Mois koi ’eno na, ka basong basé so lé bu’, ama ké ga ba sol so ma, ké lé isinwa na, ka kaidé kual caigé danga so lé bu’. 13Cawa kalang ga mowoi Kumu gusi na, na ké ga jo kual go so koi mera ’eno, ama na ké ga magé so goi. 14Kiddin ga kalang ga toigé ddang ga basé solé so go Juib kogé nia magu so lé na, ké ganga belé main kain, ama kanga so lé ’eno. 15Ké gel waldong wang ca kual go so koi go ké ba pasi duro cidab na, wo duro ddaindigé bu’, kual go duro ddaindigé bua, dang ’eremé gogé bu’ na, gelga henga ga isini dang henga ga ddari bu’. 16Henga ga kalang ba légé duro wasuai mam na, Kumu da kaidé kual caigé a duro wolé go kaidé kual a gusu Jésu Krist, main Nô do Ddari do ’enung ba dorgengang na kain.

Ga Juib kang so go Kumu koi

17Ama ji té gusin jia go Juib, jia si ddaindin ca so bua, ji pedé gusin dang Kumu bu’. 18Jia sol henga ga Kumu kederei ba dargé bua, so gelein ca jia para henga ga ddari bu’. 19Ji yé wa: Jia go ’yomé ga bibé haiyong bua, jia arinwa do kalang ga duro delem togé bu’. 20Jia go gelé ga mamiyong narua bua, jia go gelé jia solé henga mam a duro so, dang kual go cindi bu’, ji ’erem ca jia sol henga mam a duro so dang kual go cindi bu’. 21Ji go wa gelé kalang kané na, ji bang gelu gusin ’enoa cawa ga? Ji go wa doré kalang kual, kandia koié henga ’eno, ji bang koi henga cawa ga? 22Ji go wa yo wa, kandia lo béli ’eno, ji lé bélia cawa ga? Ji go wa doré koliyong kel na, ji wa koié henga a duro kuluyong ga koliyong kaga cawa ga? 23Ji pedé gusin dang so go Kumu koi, ama ji bi Kumu hormo ’eno, cawa ji maga so goi ’eno. 24Cawa ké pasu duro cidab do Kumu toi yé wa: Kalang ga toigé ddang yé kual go isini ca Kumu, na ca keng ga Juib.

25Ji nia magu so na, mandeli walé goa na ddar, ama ji nia maga so ’eno na, mandeli doin walé goa na henga ga kalin. 26Kema goa wala mandeli ’eno ma, ddi magu so go Kumu koi na, Kumu gesia main kema go walé mandeli kain ’eno ga? 27Kema go wala mandeli ’eno, ama ddi magu so go Kumu koi na, ddia kaidé kual cain ca ji go magé so lé ’eno, ji goang so go pasé kobin bua, ji go ba wal mandeli bu’. 28Ama Juib go cindi, na Juib go walé mandeli do gusi mera ’eno, 29Ama Juib go cindi na, na Juib go walé mandeli do duro ddaindi, na walé go so go pasé koi ’eno, ama na go Habé ga Kumu kai kogé. Kumu na pedé Juib go cindi go main kain lé, ama kalang pedei ’eno.

Currently Selected:

Rom 2: TNG1978

Highlight

Copy