Mark 3

Kema go kobi sayu

(Matié 12:9–14; Luk 6:6–11)

1Kardené Jésu andong duro kulu go yaué go Juib kogé, kema go telai sayu wo kené. 2Ké mam nyim cindegé toi keddo ca kondia da bi labia duro wolé go jurgum ga? 3Jésu yei kema go telai sayu wa: Sa dang, ’er tumu kalang kua mam. 4Kardené ddi ’enger ké ga wa soloi wa: So guana ddana lo henga ga ddari a duro wolé go jurgum laba, ca na la isinwa ga? Ké minyu kema laba, ké deddu kema ga? Ama ké sugoi kebegé kurad. 5Jésu kongu solgé mam dang mainyé dang kederé homé ca ’eremé gogé go isini. Ddi yei kema lé wa: Tara kobin, ddi tari. Kobi lé wai labia main toné kain. 6Ga Parisié andong a duro kulu go yaué go Juib kogé dong, kobegépadda ké yau kang kalang ga Hérod kai, ké nyan kual ca deddé Jésu.

Kalang combu ’yé gusu Jésu

7Jésu kang anjama gai ’yé kebu tagu do Galali. Kalang ga yaué combu sai a Galali kang Judé kobi. 8Dang ga Jorsalem, dang ga Idumé, dang ga ca kurai go Jurdé, dang ga gulong go luré Tir dang Sidon, kalang combu ’yé gusi cawa ké jé henga mam ga ddi wa lo. 9Jésu yégé anjama gai kandia nyanai kuburo go wusin cawa ddo kalang ga yaué combu ddoderei ’eno. 10Cawa ddi bu kalang combu labia. Ké ga hoamya mam ké sié gusi ca ka cilei. 11Kiddin ga habé ga isini ba soli na, ké aserong tumoi, ké yei wa: Jia Kumu Kurondi. 12Ama Jésu sigang dono ddo kandia toré toi dang ’eno.

Jésu par pajerong gai ga gié

(Matié 10:1–4; Luk 6:12–16)

13Kardené Jésu nai ca kubung go gumu dang. Ddi té ké ga ddi ba dargé, ké ’yé gusi. 14Ddi par moac ca sua ga ddi ba tégé pajerong ga gié. Ddi pargé ca kandia jimang nai ca ddia giégé ca doré kual. 15Ddi bigé dono do taié habé ga isini cong. 16Kua na ké ga moac ca sua ga ddi ba pargé lé. Simon go Jésu ba tei Piér. 17Jak kang kermi Jâ, ka Sébedé karndi (Jésu tégé Boanerjé, to do poré na alé karndi). 18André dang Pilip, dang Bartélemy, dang Matié, dang Tomas, dang Jak go Alpé kurondi, dang Tadé, dang Simon go Kanan. 19Dang Judas Iskariot, ddi go ba ai Jésu gangeldi bogé kalang gai ga tebena.

Jésu kalndi dar ca golei

20Jésu jogu andong gulong, kalang ga yaué combu jogu yau ddang com, Jésu kang anjama gai wa kiddin ga do henga ’eno. 21Kiddin ga kalndi ba jé kual lé na, ké andong ’yé ca ka oré golei cong, cawa ké yé wa: Ddi suagu ’enda.

Jésu jogu yégé ca kual go ké ba si cai

(Matié 12:22–32; Luk 11:14–23; 12:10)

22Kalang ga gelé so go Kumu koi ga ba sai a Jorsalem yé wa: Ddianga habé ga isini kelmagé go ké ba tei Bélsébul kederei, kané yé wa: Habé ga isini kelmaga boi dono do taié habé ga isini cong. 23Kardené Jésu tégé gusi, ddi ’engergé kual go kera lé: Mena ma Sidan bbal ca taié gusi cong ga? 24Leu nia gosindé sua tebenang guso na, leu lé go ’eré ’eno. 25Gulong nia gosindé sua tebenang gusi na, gulong lé go ’eré ’eno. 26Sidan nia sai tebenang gusi na, ddi gosinda sua, leu doi dang dono do ’eré ’eno, ama dono doi toa ka.

27Kema go andong ta kema go osi gulong ca huré henga gai na, ddi saddia kema go osi lé tumu jua ma, kardené ddi sai huré henga gai dé.

28’Enung wa yogenga cindi waldong wang: Isinwa doni doni mam do Adam karndi togé na, ka buraga, dang kual go isini goni goni go ké wa yoi mam. 29Ama kema goni goni goa yé kual go isini ca Habé ga Kumu kai na, ké go burogoi ’eno bering, isinwa lé jia cai bera kuddum. 30Jésu yégé kainya cawa ké yé wa: Kondia dang habé ga isini kederei.

Jésu ’yoi kang karmei

(Matié 12:46–50; Luk 8:19–21)

31Jésu ’yoi kang karmei ’erga, ké ’eré kebu gulong dong, ké gi kema ca togoi. 32Kalang combu luré Jésu dang jomé, ké yei wa: Sela, ’yoin kang karmein ’eré wo dong, ké wa darein. 33Jésu ’engergé wa: Na wanga ’yoang kang karmeng ga? 34Kardené ddi kongu sol ké ga jomé lurei lé, ddi yé wa: Sela ’yoang kang karmeng woi kua. 35Cawa kema goni goni go lo kederé daré ga Kumu kai na, ddia kermeng dang temdeng dang ’yoang.

Currently Selected:

Mark 3: TNG1978

Highlight

Copy