Mark 4

Kual go kera ca go gesé gasa

(Matié 13:1–9; Luk 8:4–8)

1Jésu osum gelé kalang com kebu tagu do Galali, kalang combu yau gusi, ddi nai duro kuburo, ddi jom kené, kalang ga yaué combu mam ’eré kebu gung. 2Ddi gelgé henga nainyang kual go kera. Ddi yégé duro gelé goi wa: 3Ga jageng, go gesé andong ca oré gesé. 4Kiddin ga ddi wa gesa duro yagé goi na, gasa ga pena ba duro giyong. Ceddong ’yé goldigé. 5Gasa ga pena ba ca gara, kiddin ga gesong cumba ’eno, kobegépadda ké gar cawa gesong nainya toigé ’eno. 6Kiddin ga teba ba andong ’erga dang na, ké lué, cawa gaserégé wo ’eno, ké haiyong. 7Gasa ga pena ba duro tasi, tasi lé malgu nain, suyomegé. Ké bega caigé ’eno. 8Ama gasa ga pena ba ca gesong ga gur, ké gar, ké malgu nain, ké té karang, ké si cindegé, ga pena to subu, ga pena to jis, ga pena aru. 9Jésu yé wa: Keng nia dang gesemegeng na, ga jageng ddara.

Jésu yé kualang kera cawa ga?

(Matié 13:10–17; Luk 8:9–10)

10Kiddin ga Jésu ba jom suguddongang kalang ga yaué combu na, kalang ga jomé gusi kang anjama ga moac ca sua, ké ’engeri kual go kera lé toi. 11Ddi jogu yégé wa: Ké bugeng solé kual go mendem go Leu do Kumu toi kua, ama a gusu kalang ga ddang na, ké yégé kual mam danga kera.

12Cawa dang solé kandia sela, ama kandia solé to ’eno,

Dang jo, kandia ja, ama kandia jo to ’eno,

Ké nia jé to na, ka belgu gusu Kumu, Kumu da burogugé.

Jésu por kual go kera toi ca kema go gesé gasa

(Matié 13:18–23; Luk 8:11–15)

13Kardené Jésu ’engergé wa: Keng sela kual go kera lé toi ’eno ga? Na mena ma keng da sol kual go kera lé toi mam ga? 14Go gesé gasa na kual go Kumu koi. 15Kalang ga pena mainya gasa ga ba ba ca giyong kain, ké jé kual, Sidan ’erga jeddugu kual go ké gesi duro ddaindigé lé cong. 16Ké ga ké gesegé ca gara na mainya ké ga jo kual, kobegépadda ké ’yeiang gusu mowa. 17Ama gaserei wo ’eno a duro ddaindigé, ama ké ’yom gusugé wolé bbani, kiddin ga solé go kegero kau gelé go cin na sai ca kual go Kumu koi na, kobegépadda ké ddé bo cindi gogé cong. 18Kalang ga pena mainya gasa ga ba ba duro tasi kain, na ké ga jo kual. 19Ama tabelang do delinya toa dang kédi do gusu mowa go laré koi, kang tabelang do henga ga ddang togé andong duro ddaindigé, suyom kual lé, ddi wa ’eno. 20Kalang ga pena mainya gasa ga ba ba ca gesong ga gur kain, na ké ga jo kual bua, ké jé toi bu’, ké bé caigé, ké si cindegé, ga pena to subu, ga pena to jis, ga pena aru.

Kual go kera go ca tua

(Luk 8:16–18)

21Kardené Jésu ’engergé wa: Ké ’yé ca kemba bbasang ca laba, to sua gasulong ga? Na a ca kiddin ga ddang ’eno ga? 22Cawa henga mam ga ké ba wosegé na, toigé da turong dang, henga mam ga duro mendem na, ka andigé duro arinwa dong. 23Keng nia dang gesemé ga jo na, ga jageng ddara.

24Jésu yégé com: Ga si cindegeng ddara ca henga ga keng ba jégé. ’Engo do guajena do keng ba gesang na, Kumu da gesegengang na kain bu’. 25Cawa kema goang henga, ké da jogu bi cainé, ama kema goang henga ’eno na, ka ’yé henga ga ddiang nagé kobi henyé lé cong.

Kual go kera go ca gasa ga ba gar kaindigé pena

26Jésu yégé com: Sela, Leu do Kumu toi gené mainya kema go gesé gasa gai duro yagé kain. 27Kardené ddi woi kung soindo, joguddu ddi sai dang, gasa gar, malgu dang, ama ddi sela malgé gogé ’eno. 28Gesonga garé gasa, tumu jua na habelé, kardené ké bé caigé, kardené ké na. 29Kiddin ga gasa ba na na, kema ai marem ca walegé cawa kiddin ga walegé bbal.

Kual go kera ca laidong cindo

(Matié 13:31–32, 34; Luk 13:18–19)

30Jésu ’engergé com: Na da gel Leu do Kumu toi gené mainya wa kain ga? Na da gelo danga kual go kera goni ga? 31To mainya laidong cindo. Kiddin ga kema ba geso cin gesong na, cindoa karang nyém, ddi gasa mam a duro delinya. 32Ama kiddin ga ké ba geso na, to gar, to malgu nain, ddi gasem mam, to si keleia bbal ca ceddong ga dang ’erga nyan gulondigé to tunu doa.

33Kardené Jésu gelgé kual go kera go main kain lé combu go ké bbal ca joi. 34Ddi yagé kual go pena kalin ’eno, ddi yégé kual mam danga kera, ama kiddin ga ddi kaindi kang anjama gai na, ddi porgé kual lé toi mam.

Jésu nar kal doarang

(Matié 8:23–27; Luk 8:22–25)

35Duro wolé dang borndo Jésu yégé anjama gai wa: Dda na haddegeng tagu kuaba koné. 36Ké ddé kalang ga yaué combu, ké ai Jésu toigé duro kuburo, kuburo ga ddang wo kené ’yoabang nagé bu’. 37Kal sai dang doyé nain. Doyé papsong duro kuburo bera kuburo wonang kang. 38Jésu woi kung to kuburo, ddi candu caiyang janga, ké libi, ké yei wa: Bagulong, ji sela ca na wa basong ’eno ga? 39Jésu lebu to kung, ddi sai dang, ddi nar kal, ddi yé kal dang doyé: Ga delgeng, ké delé, kiddin delé juam bbani ’eno. 40Kardené Jésu ’enger anjama wa: Keng lé muro cawa ga? Keng bu cindi ’eno dé ga? 41Ama ké lé muro bbani ’eno, ké ’enger gusugé wa: Kema lé kua na wang ga? Cawa ma kal dang doyé sai jé kual goi kain ga?

Currently Selected:

Mark 4: TNG1978

Highlight

Copy