Luk 3

Kual go doré go Jâ go disé kalang to kang koi

(Matié 3:1–12; Mark 1:1–8; Jâ 1:19–28)

1Duro ddegelé do moac ca bai duro termala do go ddo ca Tiber toi na, Pons Pilat na kelma go gumu a Judé bua, Hérod di termala ca Galali bua, kermi Pilip di ca gesong ga Ituré dang Trakonit bua, Lisanis di ca gesong ga Abilen bu’. 2Anan kang Kaip, ka gemdong ga tibé Kumu. A kiddin lé na, kual go Kumu koi ’yé gusu Jâ go Jakari Kurondi a duro gada. 3Jâ dal kiddin mam kebu kurai go Jurdé. Ddi té berné wa: Ga buga kebegeng, dda ké desegeng to kang, Kumu da burogu isinwa dogeng. 4Main go cogelé kebu go Kumu koi Esai ba pasuang duro cidab doi kain:

Kua, na tumo do kema go pena toi do wa togé berné duro gada,

Nyanageng giyong go Bagulong koi,

Ga la giyong goi ’er tab.

5Ga lebudu sambai dang mam,

Ga tusia kubung dang kedeberong dugo mam,

Ga nyanageng giyong go isini go ba andigedé, ddai ddi ’er tab,

Ga gangela giyong go kurjum kurjum gal gal,

6Main kain na, kalang mam da sol minyé go Kumu koi.

7Kalang ga yaué combu ’yé gusu Jâ ca kondia desegé to kang, ddi yégé wa: Keng kumbulo karndi, na wanga gelegeng ca kenga ger muro ca mainyé do Kumu toi do wa orang ga? 8Ga lageng gié go ba bbal gelé ca keng ba kebugeng. Ddo keng yo gusugeng wa: Abraham na moindena. ’Enung yegenga waldong wang, Kumu bbal ca belé keddang lé kua Abraham moinderei. 9Semo jia ’yoab ca sederé haiyong gaserégé. Sia goni goni goa wa ddara ’eno na, ka seri debi cin tua.

10Kalang ga yaué combu ’engeri wa: Ni da la mena ga? 11Ddi jogu yégé wa: Ddi goang badigé sua na, ddai ddi bi ddi go basé badigé pena bua, ddi goang do na, ddai ddi gusinya main kain bu’. 12Ga ’yo hogé ’yé gusu Jâ ca kondia desegé to kang bu’. Ké ’engeri wa: Go gelé, ni da la mena ga? 13Ddi jogu yégé wa: Ddo keng ’yo hogé go keri go ddo ca so ’eno. 14Asengeriyong kau ’engeri main kain bu’: Ni kau, ni da la mena ga? Ddi yégé wa: Ddo keng ’yo laré kuaba kema penang dono ca hendé do poi ’eno, ama dda gusugeng muageng ca laré go ké wa bogeng.

15Kalang ga ba jomang tugoié na, ké ’erem wa: Jâ na Krist laiga. 16Kardené Jâ jogu yégé mam wa: ’Enung desegeng to kang, ama go pena go ba ddengang dono wa orang, ’enung bbala ca poré giabé gai gangeigé ’eno, ddia desegeng danga Habé ga Kumu kai dang tua bu’. 17Ddianga ’engo doi wo kobi do pié ’ubar cin gasa cong. Ddia nyim gasa gai bégé duro tugulu doi, ama ddi da ul ’ubar dang tua do basé banyong.

18Jâ dorgé kalang Nô do Ddari dang kual go ddang cainé combu. 19Ama Jâ bberaju kelma Hérod cawa ddi boddu kermi tamdi Hérodia, ddi lé henga ga isini ga ddang combu bu’. 20Hérod lé isinwa do ddo wal, ddi ’yom Jâ debi duro gerngang.

Disé go Jésu koi to kang

(Matié 3:13–17; Mark 1:9–11)

21Kiddin ga ké ba disé kalang mam to kang na, kardené ké disé Jésu to kang bu’. Kiddin ga ddi wa olé dang hangong. 22Habé ga Kumu kai gesin cai gené main bulo guso kain. Tumo yaga a dang yé wa: Jia Kurandang go kedereng ba ’yein, gusung mowung cain combu.

To moin ga Jésu kai

(Matié 1:1–17)

23Kiddin ga Jésu ba osum lo gié goi na, ddi bbal mainya ddegelé to subu kain. Kalang ’erem wa: Kondia Josép go Ali koi kurondi. 24Go Matat kurondi, go Lébi kurondi, go Malki kurondi, go Janai kurondi, go Josép kurondi. 25Go Matatas kurondi, go Amos kurondi, go Nam kurondi, go Aseli kurondi, go Nagai kurondi. 26Go Mat kurondi, go Matatas kurondi, go Simai kurondi, go Josak kurondi, go Joda kurondi. 27Go Jonan kurondi, go Resa kurondi, go Jorbabél kurondi, go Salatil kurondi, go Nari kurondi. 28Go Malki kurondi, go Adi kurondi, go Kosam kurondi, go Dalmadam kurondi, go Ar kurondi. 29Go Jésu kurondi, go Alisa kurondi, go Jorom kurondi, go Matat kurondi, go Lébi kurondi. 30Go Simion kurondi, go Juda kurondi, go Josép kurondi, go Jonam kurondi, go Alikim kurondi, 31Go Mela kurondi, go Mana kurondi, go Matata kurondi, go Natan kurondi, go Dabid kurondi. 32Go Jésé kurondi, go Jobéd kurondi, go Bos kurondi, go Sala kurondi, go Nason kurondi. 33Go Aminadab kurondi, go Adim kurondi, go Arni kurondi, go Asrom kurondi, go Para kurondi, go Juda kurondi. 34Go Jakob kurondi, go Isak kurondi, go Abraham kurondi, go Tara kurondi, go Nakar kurondi. 35Go Saruk kurondi, go Ragan kurondi, go Palak kurondi, go Aber kurondi, go Sala kurondi, 36Go Kainam kurondi, go Arpasam kurondi, go Sém kurondi, go Noé kurondi, go Lamek kurondi. 37Go Matasala kurondi, go Enok kurondi, go Jara kurondi, go Malél kurondi, go Kaina kurondi, 38Go Anos kurondi, go Sét kurondi, go Adam kurondi, go Kumu kurondi.

Currently Selected:

Luk 3: TNG1978

Highlight

Copy