Gié 9

Saul bé kibi

(Gié 22:6–16; 26:12–18)

1Ama Saul pedé gusi waindo waindo ca ddia deddé anjama ga Bagulong kai. Ddi ’yé gusu gemdong ga tibé Kumu gumu gogé. 2Ddi ’engeri kondi bi maktub do oré duro kulu go yaué go Juib kogé a Damas, ca ddi nia wai kalang ga bainyong, dang kandu ga wa kobé giyong go Bagulong koi na, ddia nyimegé orang nagé a Jorsalem.

3Kiddin ga ddi ba ’yé to gulong go Damas ’yoab na, a kiddin lé padda arinwa do pena wulainyiga a dang lurei dugo kiddab. 4Ddi aserong dugo pac, ddi jé nô wa yoi wa: Saul Saul, ji gelung cindung kainya cawa ga? 5Ddi ’engeri wa: Bagulong, na ji wang ga? Nô lé jogu yei wa: Na ’enung Jésu go ji wa gelang cindung. 6Ama ji sa dang ’era duro gulong go gumu, ka yein henga ga ji da lé a kené. 7Kalang ga oré dang Saul ’eré kebegé kurad, ké jé nô do yo kual, ama ké sela kema pena ’eno. 8Saul sai dang, ddi hangu cindi, ama ddi sela kiddin ’eno. Ké ’yom kobi, ké ’yang nai Damas. 9Wolé subu ddi sela kiddin ’eno bua, ddi da do ’eno bua, ddi sa kang ’eno bu’.

10Anjama go pena wo a Damas go ké tei Ananias, Bagulong boi cindi duro soné go beram beram, ddi yei wa: Ananias, ddi jogu yei wa: Bagulong, ’enung woi kua. 11Bagulong yei wa: Sa kala, ’era duro giyong go ké ba tei go ’eré tab, a ta Judas na, ji ’engergé ca kema go pena go Tarsé go ké ba tei Saul, ddi wa olé kené. 12Ddi sol kema go pena go ké ba tei Ananias duro soné go beram beram andong si kobi cai ca ddia sela kiddin ddang. 13Ananias jogu yei wa: Bagulong, ’enung jé nô a gusu kalang combu ca isinwa mam do ddi ba lang kalang gain a Jorsalem. 14Ddi ’erga kua danga gemdong ga tibé Kumu gumu gogé dono doi ca, nyimé kalang ga wa togé gusondin mam. 15Ama Bagulong yei wa: ’Era, cawa ’enunga paré kema lé, ca kalang ga toigé ddang da sela Gusandang a gusi dang kermelong bua, dang ga Israél bu’. 16’Enung da geli ca ddi ddain da wai gelé go cin combu ca gusandang.

17Kardené na, Ananias sai ’yé, ddi andong gulong, ddi si kalndi ca Saul, ddi yei wa: Kermeng Saul, Bagulong Jésu go ba biga cindin a giyong kiddin ga ji wa orang na, ddi banga giangang gusin ca ji sela kiddin ddang, ji wunang Habé ga Kumu kai bu’. 18Kobipadda henga main gusa habela kain cungurdong a Saul cindi bé dugo, ddi jogu sol kiddin ddang, ddi sai dang, ké desei to kang. 19Kardené ddi di do, ddi jogu wai dono ddang.

Saul dor kual a Damas

Ddi jomang ga anjama a Damas lé wolé muddag. 20Kobipadda ddi osum doré kual a duro kuluyong ga yaué ga Juib kagé waldong wang, Jésu na Kumu Kurondi. 21Kalang mam ga ba jé kual goi na, ké sol kagelokemo, ké yé wa: Kema lé kua, na ddi go gelé kalang ga togé Jésu Gusondi cindegé a Jorsalem ’eno ga? Ddi ’erga kua ca nyimegé ’orang nagé bogé gemdong ga tibé Kumu ’eno ga?

22Ama Saul dor kual dang dono waindo waindo, kiddin ga ddi wa gelé ga Juib ga jomé a Damas ca Jésu na Krist na, ké wa kual go mainyang nai ’eno.

23Kiddin ga Saul ba lé main kain wolé nain na, ga Juib nyan kual dang gusugé ca deddei. 24Ama Saul jé kual go ké ba nyani lé mam, ké wa golei kebu berem teba dang soindo ca ka deddei. 25Ama anjama ga Saul kai goliang soindo, ké naiang nai ca berem go gumu go gulong lé koi, ké gesinyi dang guju kara berem dong.

Saul a Jorsalem

26Kiddin ga Saul ba ’yé Jorsalem na, ddi dar ca jomé kang ga anjama, ama ké mam lei muro cawa ké bu cindi ca kondia anjama go cindi ’eno. 27Kardené Barnabas goli ’yang nai gusu pajerong ga gié. Ddi yégé kual go Saul koi go ba sol Bagulong a giyong, dang kual go Bagulong ba yei bu’. Ddi yégé kual go Saul ba dori a Damas dang Jésu Gusondi basé muro. 28A kiddin lé na, Saul jomang nagé ’enda, ddi ’yé sageré duro gulong go Jorsalem mam, ddi dorgé kual dang Bagulong Gusondi basé muro. 29Ddi dorgé ga Juib ga yo kebu go Grék kual bua, ddi main kualang nagé bu’, ama ké dar ca ka deddei. 30Kiddin ga karmei ba jé kual lé na, ké goli ’yang nai Sésaré ca giei oré Tarsé.

31Kardené yaué go Kumu koi a ca gesong ga Judé man, dang Galali, dang Samari, ddaindigé jalgé juam, ké wai dono, ké bi Bagulong hormo. Ké wai jégené a gusu Habé ga Kumu kai, ké bé cainé cainé belé combu.

Ené wai labia

32Piér dal ca gesong mam, wolé go pena ddi ’yé ta kalang ga bo cindi ga ba jom a Lida. 33Ddi wai kema go ké tei Ené dang woié a ca gaselong ddegelé margem a kiddin lé, cawa ddi ddanga hoamya do sayé. 34Piér yei wa: Ené, Jésu Krist bin labia, sa dang nyana gaselong gain. Kobipadda Ené sai dang. 35Kalang ga jomé Lida dang Saron mam na, ké soli, ké bé kebegé gusu Bagulong.

Ké belé Tabita dang cindo a duro ga maré

36A Jopé tama pena do ké ta Tabita wo kené. (Dang kebu go Grék na, ké ta Dorkas, to do poré na buar.) To lé gié ddar, to jégen kalang ga nyagé waindo waindo. 37A duro wolé lé na, hoamya la, to ma. Ké pelo, kardené ké aio debo duro kulu go porio dang. 38Anjama ga Jopé jé ca Piér na wo Lida, toa ’yoabang Jopé, ké gi kalang sua gusi, ké yei wa: Ji ’erang cindeni kala, lo liling ’eno. 39Piér sai ’yé kala dang nagé. Kiddin ga ddi ’erga, ké nai dang nai duro kulu go porio dang. Kandu ga wamburong mam ’yé gusiang ’elé. Ké geli badigé ga karang dang ga gemdong ga Tabita ba cogenu, kiddin ga toang cindo dé. 40Ama Piér taigé dong mam, ddi poi gomdi dugo, ddi ol. Kardené ddi belé cindo guso, ddi yé wa: Tabita, sa dang. To hangu cindo. Kiddin ga to ba sol Piér na, to sai jom dang. 41Piér sai ’yom kuaba jagena, to sai dang. Ddi té kalang ga bo cindi dang ga wamburong, ddi bigang na dang cindo. 42Nô lé aju gusu kalang ga Jopé mam. Kalang combu bu cindi ca Bagulong. 43Piér jom wolé combu a Jopé ta Simon go hongu sumu do dalba.

Currently Selected:

Gié 9: TNG1978

Highlight

Copy