Gié 8

1Saul gusi mowi ca deddé go Etién koi.

Saul gel yaué go Kumu koi cindi

A duro wolé lé na, ké osum gelé yaué go Kumu koi go a Jorsalem cindi. Kalang mam ga bo cindi ddasindé ca gesong ga Judé dang Samari. Pajerong ga gié jo mera. 2Kalang ga meré Kumu ’embé Etién. Ké ’elé nain ca maré goi.

3Ama Saul sai dang ca toinyé yaué go Kumu koi. Ddi andong duro gulong goni goni, ddi nyim bainyong dang kandu ga bo cindi, ddi bégé duro gerngang.

Pilip dor Nô do Ddari a ca gesong ga Samari

4Ké ga ba ddasindé lé na, ké geré ’yé ca gesong mam, ké dor Nô do Ddari do Kumu toi. 5Pilip ’yé duro gulong go gumu go Samari, ddi osum doregé kalang ga gulong lé Nô do Krist toi. 6Kiddin ga kalang ga yaué combu ba sol Pilip wa lo gié go dono go kagelokemo na, ké si ’eremé gogé pena ca jo kual goi ddar. 7Habé ga isini turong cong a kederé kalang ga hoamya combu, dang soié go noigé osu. Kalang gang hoamya do sayé, dang ga midili combu wai labia main kain bu’. 8Kalang ga duro gulong go gumu lé mam, gusugé mowegé nain bbani ’eno.

9Kema go pena go ké ba tei Simon wo duro gulong go gumu lé. Ddi la gié go kema go béli. Kalang ga Samari sol kagelokemo ca gié goi lé. Ddi yé wa ddia kema go gumu. 10Karang dang kalang ga gemdong mam si ’eremé gogé cai nain, ké yé wa: Kema lé na dono do Kumu toi do ké ba ta dono do tungu. 11Ké si ’eremé gogé cai nain, cawa ké sol kagelokemo wolé comba ca gié goi go kema go béli lé. 12Ama kiddin ga ké ba bu cindi ca Nô do Pilip ba dorgang na ca Leu do Kumu toi, dang gusong go Jésu Krist koi na, ké desé bainyong dang kandu to kang. 13Simon bang kau bu cindi, ké desei to kang bu’, ddi ’yé kang Pilip kemberam kemberam. Kiddin ga Pilip wa lo gié go dono go kagelokemo dang henga ga gelé nain na, ddi sol kagelokemo.

14Kiddin ga pajerong ga gié ga a Jorsalem ba jé na kalang ga Samari ’yé kual go Kumu koi na, ké gi Piér kang Jâ gusugé. 15Kiddin ga ké ba ’yé Samari na, ké ol ca kalang ga bo cindi na ’ya Habé ga Kumu kai. 16Cawa Habé ga Kumu kai gesin ca kema pena a duroigé ’eno dé, ama ké desega to kang dang gusong go Bagulong Jésu koi mera. 17Kardené Piér kang Jâ si kalndigé caigé, ké ’yé Habé ga Kumu kai.

18Kiddin ga Simon ba sol ca pajerong ga gié si kalndigé ca kalang ga bo cindi ma, ké wai Habé ga Kumu kai na, ddi dor laré ca bogé Piér dang Jâ. 19Ddi yé wa: Ga bung dono lé kua bu’, cawa kema go ’enunga si kalndung cai na, ddi waia Habé ga Kumu kai lé bu’. 20Ama Piér jogu yei wa: Dda kengang laré goin lé basong cong, cawa ji ’erem ca jia kelé kalin do Kumu toi danga laré. 21Ji wo ’eno duro kual lé kua cawa ddaindinya geddang tumu Kumu ’eno. 22Ji jiga bega kibin ca ’eremé goin go isini lé, ji ula Bagulong dang meregdé ca ddi buraga ’eremé goin. 23Cawa ’enung sol ji won danga ddainya do ddainyi, jia guiang go isinwa kua. 24Kardené Simon jogu yé Piér kang Jâ wa: Ga ulageng Bagulong cang ca ddo kual go keng ba yei lé kua bo cang ’eno.

25Pajerong ga gié ga sua lé yé hendé bua, ké dor kual go Bagulong koi bu’, kardené ké boi caigé jogu Jorsalem. Kiddin ga ké wa jogé na, ké dor Nô do Ddari duro gulong combu go Samari kogé.

Pilip kang kema go Etiopi

26Kangito go Bagulong koi yé Pilip wa: Ji sai dang ’era kuaba go goiyong a giyong go ba gesin a Jorsalem ca oré Gasa. Giyong lé na duro gada. 27Pilip sai ’yé. Sela kema go Etiopi wa oré duro giyong lé, ddia adum. Ddia kema go gumu go magé termali Kandas do Etiopi laré gua. Ddi ba Jorsalem ca melaué Kumu. 28Kiddin ga ddi wa boié cai ca jogé tai na, ddi jom duro pus do hondong wa sera. Ddi wa ddoginyé cidab do go cogelé kebu go Kumu koi Esai toi. 29Habé ga Kumu kai yé Pilip wa: Sidu gusu pus lé ’yoab. 30Pilip geré guso, ddi jé kema go Etiopi lé wa ddoginyé cidab do go cogelé kebu go Kumu koi Esai toi, ddi ’engeri wa: Ji sol kual go ji wa ddoginyé lé toi ga? 31Kema lé jogu yei wa: Kema nia durang kual lé toi ’eno ma, ’énung bbal solé toia mena ga? Ddi ol Pilip kondia naia jima durdi duro pus. 32Kua na kual go ddi wa ddoginyei a duro cidab do Kumu toi lé:

Ddi mainya demagu go ké ba ’yani ca oré wali kain,

Ddi main demagu kia go ba ’eré kibi kurad tumu kema go walé tédei kain,

Ddi hanga kibi ’eno.

33Ké lei bbojo, ké nari yo kual goi go cindi cong,

Na wanga go bbalé ca yo kual go moindi koi ga?

Cawa ké ka jomé goi goang cindi duro delinya ’enda.

34Kema go gumu lé ’enger Pilip wa: ’Enung olin, ji main yang dé, go cogelé kebu go Kumu koi lé yé kuala ca wang ga? Na cai ddi bang laba, na ca kema go ddang ga? 35Pilip hangu cidab do Kumu toi a duro ddoginyé lé, ddi dori Nô do Ddari ca Jésu. 36Kiddin ga ké wa oré duro giyong dé na, ké ’yé kiddin ga pena ga kang wo kené, kema go gumu lé ’enger Pilip wa: Sela kang woi kua, na wa narang ca desang to kang ga? [ 37Pilip yei wa: Ji nia bu cindi dang ddaindin pena na, ji bbala desé to kang. Ddi jogu yei wa: ’Enung bu cindi ca Jésu Krist na Kumu Kurondi.] 38Kardené ddi ’erang pus lé dugo. Pilip kang kema go gumu lé gesin cin kang ca Pilip sai desei to kang. 39Kiddin ga ké naiga a cin kang na, Habé ga Bagulong kai ai Pilip, kema go gumu lé selai ddang ’eno, ddi wal giyong toi ’yé dang gusu mowa. 40Ama ké wai Pilip a Asot, kiddin ga ddi wa oré na, ddi dor Nô do Ddari duro gulong go gemdong goni goni mam bera ddi andong a Sésaré.

Currently Selected:

Gié 8: TNG1978

Highlight

Copy