Gié 18

Paul a Korint

1Kardené Paul sai a Atén ’yé Korint. 2Ddi wai Juib go pena go ké ba tei Akila a kené, ké woi a ca gesong ga Pont. Ddi saga a ca gesong ga Itali kang tamdi Preskila, cawa Kulod go ddo ca si ca ga Juib mam, kandia ddé Rom. Paul ’yé gusugé. 3Cawa gié goga pena, na go cogené kulu go badigé, ddi jom kanga ga nagé pena ca lo gié lé. 4Duro wolé go jurgum goni goni kau, Paul ’yé doré kual duro kulu go yaué go Juib kogé. Ddi dar ca ddia doregé ga Juib kang ga Grék kual toi arin carara.

5Kiddin ga Silas kang Timoté ba saga Masadon na, Paul wa doré kual gusu ga Juib ca Jésu na Krist waldong wang waindo waindo. 6Kiddin ga ga Juib ba sai tebenang nai, ké nyangdiei na, ddi ddagégé badigé gai ususu dogé caigé, ddi yégé wa: Keng nia basong na, na wané dogeng, dulang ciné ’eno. Cakcak kua na, ’enung wa ora gusu kalang ga toigé ddang. 7Ddi ddégé, ddi andong ta kema go ké ba tei Titus Justus, ddia go melaué Kumu, gulong goia dur kulu go yaué go Juib kogé. 8Krispus, gumu go magé kulu go yaué go Juib kagé bu cindi ca Bagulong dang kalang ga tai gulong mam. Kalang ga Korint combu ga ba jé kual go Paul koi na, ké bu cindi, ké desegé to kang.

9Bagulong yei Paul kual duro soné go beram beram dang soindo, ddi yei wa: Ji lo muro ’eno, dura kual waindo waindo, sugoié ’eno. 10Cawa ’enung wo kenang nain, kema go bbalé ’yomoin ca loin henga ga isini wo ’eno, cawa kalang gang wo kéné combu a duro gulong lé. 11Paul jom a Korint ddegelé pena dang golo ca gelegé kalang kual go Kumu koi.

12Duro saman do Galion ba di termala do Rom a ca gesong ga Akai na, ga Juib dai kebegé pena ca Paul. Ké ’yomi yang nai tumu ga bedang. 13Ké yé waldong wang: Kema lé kua si kalang ségeldé ca kandia melaua Kumu dang kual go so goni ba nari.

14Ama kiddin ga Paul ba dar ca yogé kual na, Galion yégé ga Juib wa: Ai keng ga Juib, keng nia ’erang gusung dang kual go isini kau ga wané nain na, ’enung da jé kual gogeng. 15Ama na ca mainyé go kual danga kual go gusung koi ca so gogeng na, na kual gogeng, keng gang nyanai, ’enung go kaidé kual ca kual go main kain ’eno. 16Ddi taigé a duro bedang dong. 17Kardené ké ’yom gumu go magé kulu go yaué go Juib kogé go ké ba tei Sostén, ké osum tei duro bedang ama Galion solgé semgin kalin.

Paul boi cai jogu Antiog

18Paul jom wolé combu a Korint, kardené ddi ddé karmei, ddi nai duro kuburo ca oré Siri dang Preskila kang Akila. Ca kebu go doré go ddi ba dori na, ddi del cai a Sénikeré, kardené ddi sai nai kuburo. 19Ké ’yé Epés, ddi ddé Akila kang Preskila kené, ddi bang andong duro kulu go yaué go Juib kogé. Ddi main kualang ga Juib. 20Ké oli ca kondia jimang nagé wolé combu, ama ddi dara ’eno. 21Ddi ddégé, ddi yégé wa: Kumu nia dar na, ’enunga jiga gusugeng. Kardené ddi nai kuburo a Epés, ddi ddégé, ddi ’yé.

22Ddi dé kuburo a Sésaré, ddi ’yé Jorsalem ca lo yaué go Kumu koi waigi, kardené ddi col ’yé Antiog. 23Ddi jomang nagé sam, kardené ddi dal ca gesong ga Galat dang Prigi ca ddia bogé anjama dono.

Apolos a Epés dang Korint

24Juib go pena go ké tei Apolos go ké woi a Alésandré ’yé Epés, ddi dor kual dar bbani ’eno bua, ddi sol cidab do Kumu toi ddar bu’. 25Ké geli giyong go Bagulong koi, ddi téddé kual, ddi dor kual dang gelé ca kual go Jésu koi kerab kerab, ama ddi sola desé go Jâ koi to kang mera. 26Ddi osum yo kual duro kulu go yaué go Juib kogé basé muro, kiddin ga Preskila kang Akila ba jé kual goi na, ké goli ’yang nai ca oré gelei giyong go Kumu koi ddar.

27Kiddin ga ddi dar ca oré Akai na, karmei jégenei, ké pasu maktub gusu kalang ga bo cindi ga a ca gesong lé ca kandia ’yaiang gusu mowa, kiddin ga ddi ’yé kené na, ddi jégen kalang ga bo cindi ca wai do Kumu toi nain. 28Ddi ddiga ga Juib dang kual go mainyé tumu kalang mam, ddi gelgé a duro cidab do Kumu toi waldong wang, Jésu na Krist.

Currently Selected:

Gié 18: TNG1978

Highlight

Copy