Gié 17

Paul kang Silas a Tésalonika

1Ké hal Ampipolis dang Apoloni, ké ’yé Tasalonika, kiddin ga kulu go yaué go Juib kogé wo kené. 2Paul andong gusugé ca hada doi, ddi main kual duro cidab do Kumu toi wolé go jurgum jurgum cai subu. 3Ddi poderégé kual lé toi waldong wang, ddi gelgé wa: Na gad Krist gel cin, kardené ka beleiang cindi a duro ga maré. Jésu lé go ’enung wa doregeng kual goi kua na, ddia Krist. 4Ga pena a duroigé ’yé kual gogé, ké jomang Paul kang Silas. Combu a duro ga Grék ga meré Kumu dang kandu ga gemdong combu lé main kain bu’.

5Ama ga Juib lé ddéngi bbani ’eno. Ké yau kalang ga daberong ga daldé kalin, ké si kalang ga yaué combu ségeldé, ké saiang kual gendei duro gulong lé bbani ’eno. Ké ’yé ta Jason ca daré Paul kang Silas ca golegé orang tumu kalang. 6Ama kiddin ga ké ba waiagé ’eno na, ké ’yom Jason kang karmei ga pena ’yang nagé tumu gemdong ga gulong lé. Ké osum ceb alelé, ké yé wa: Kalang ga toin delinya mam, cakcak kua ké caga kua bu’. 7Jason ’yégé tai, ké mam tebenang go ddo ca so goi, ké yé waldong wang, kelma go dang wo kené go ké ba tei Jésu. 8Kiddin ga kalang ga yaué combu dang gemdong ga gulong ba jé kual lé na, kederegé homdégé. 9Kiddin ga Jason kang kalang gai ba boiégé laré na, ké sai ddégé ’yé.

Paul kang Silas a Béré

10Kiddin ga teba ba ka na, ké ddé Paul kang Silas ’yé Béré, kiddin ga ké ba gesin a gulong lé na, ké andong duro kulu go yaué go Juib kogé. 11Kalang lé danga ’eremé go ddari ddi Juib ga Tasalonika, cawa ké ’yé kual go Kumu koi danga ddaindigé pena, ké angel cidab do Kumu toi waindo waindo ca ka solé kual go Paul wa gelegé la cindi ga? 12Na ca ma kalang combu a duroigé bu cindi, a duro ga Grék na, kandu ga gemdong dang bainyong bu cindi combu main kain bu’.

13Ama kiddin ga Juib ga a Tasalonika ba jé ca Paul wa doré kual go Kumu koi a Béré bu’ na, ké ’yé kené, ké si kalang ga yaué combu ségeldé, ké saiang kual gendei. 14Kobegépadda Paul karmei gii kuaba go kebu kurai go gumu go ddoaga, ama Silas kang Timoté ji Béré. 15Kalang ga bogé Paul lé ’yang nai bera Atén, kardené ké boi caigé jogu Béré ca yogé Silas kang Timoté kual go Paul koi, ddi ’yubegagé ca kandia ’era waiei kala.

Paul a Atén

16Kiddin ga Paul wa amé Silas kang Timoté a Atén na, kederé homi bbani ’eno, cawa ddi sol gulong go gumu lé wonang koliyong. 17Ddi main kual dang ga Juib a duro kulu gogé go yaué bua, dang kalang ga toigé ddang ga meré Kumu bua, dang ké ga yaué dang nai to gasgo waindo waindo bu’. 18Ga pena ga naderong a duro ga Epikerién kang ga Sitokién waii, ké osum yé kualang nai bu’, ké ’enger gusugé wa: Ddi go herajé lé kua dar ca yoa mena ga? Ga pena yé waldong wang. Ddi wa dora kumurong ga kergé kual gogé, ké yé main kainya ca Paul wa dora kual go Jésu koi go ba belang cindi a duro ga maré. 19Ké ’yomi ’yang nai tumu ga bedang ca kubung go Arépag, ké ’engeri wa: Ni dar ca solé kual go herua go ji wa gelei lé toia mena ga? 20Cawa ni wa joa kual go herua a kebin, ni dar ca solé kual lé toi dé. 21(Cawa kalang ga Atén dang kalang ga ddang ga ba jom duroigé na, ké go lo henga ga ddang ’eno, ké joma ca yo kual dang jo kual go herua mera.)

22Paul sai ’eré ca kubung go Arapag duroigé ddar, ddi yégé wa: Keng kalang ga Atén, ’enung sol kenga ga meré koliyong gani gani mam. 23Kiddin ga ’enung wa dalé a duro gulong gogeng go gumu na, ’enung sol koliyong gageng ga keng wa melauegé, ’enung wai dandang do pena do keng ba pasu kual ca main kain: Kumu go kema ba selai ’eno. Kumu go keng ba selai ’eno ma, keng wa melaui lé na, ’enung wa doregenga kual goi. 24Kumu go debé delinya dang henga ga dura mam na, ddia Bagulong go dangang dugo, ddi go jomé duro kulu go yaué go kalang ba gaddi ’eno. 25Ddi go daré henga pena a gusu kalang ’eno, cawa ddia go bo kalang mam jomé goang cindegé bua, dang habé ga pogé bua, dang henga mam bu’. 26Na a gusu kema go pena ma, ddi debang kalang ga jomé ca delinya kua mam. Ddi nyan saman dogé tumu din dang gesong gagé ga jomé kedelégé. 27Ddi lé main kainya ca kandia darai, kandia da waii laiga, cawa kema goni goni a duroina kau, Kumu na suguddong dang nai ’eno. 28Cawa:

Na wai jomé goang cindena a gusi bua,

Na wa oré bua, na wa lo gusuna bu’.

Main kalang gageng ga pena ga pasé kera kau ba yani kain:

Na karndi bu’.

29Cawa na nia Kumu karndi na, ddo na ’eremé wa: Kumu na main kula go luguinya, kau doarna, kau keddang ga kalang ba habeli dang narua dogé kain ’eno. 30Saman do kalang ba sela ’eno na, Kumu da semgen, ama cakcak kua na, ddi té kalang a kiddin gani gani mam kandia bega kebegé. 31Cawa ddi si wolé go ddi da kaidé kual ca kalang mam, dang kual go geddang a gusu kema go ddi ba pari. Hendé doi na belé go ddi ba beliang cindi a duro go maré.

32Kiddin ga Paul ba yégé kual go ca kalang da belang cindegé a duro ga maré na, ga pena lei bbojo, ama ga pena yé wa: Ni dar ca jo kual goin lé ddang com. 33Kardené Paul ddégé, ddi ’yé. 34Ama ga pena a duroigé ’yé dang nai, ké bu cindi, Dénis wo duroigé, ddia pena a duro kalang ga bedang ga Arépag kai, dang tama do pena do ké ba ta Damaris, dang kalang ga pena ga ddang bu’.

Currently Selected:

Gié 17: TNG1978

Highlight

Copy