Romanos 11
11
Sinia' mawat iyojonk'iye napo Israel jika kia'lis
1'Nakayi jayo'ojwe 'ate, ¿'nakat'iyi jla'am ti Sinia' 'yakawona napo jika kia'lis? ¡Jeyi kat'aja! Siuti ya'am kia'awo Israel jika kia'lek'i'm, 'yaka kijilas mases tajla'm papo Abraham t'ipi, siu'neje ti atajlaja'm papo Benjamín jika kia'lisjimpe. 2Lapakawo ti Sinia' ta'a ti tijnayi siuti 'nelanjie'e ti iyo jika kia'lisa', jak je iyoyiji 'nakayi yamjliyi ti iyojonk'iye. ¿Jet'i 'najanayi siuniwa Sinia' jlamtis yi'i ni ji'wet, ti ijwi'il pak injwejlanik jiwo Elíasjimpe, pakayi ti ijwile pa Sinia' ti iyo t'ajlayeja' siupi iyot'iyipi papo Israel jika kia'lis?, ti wuj ti je 'es siupa iyoyi, ti iyo'ate, 3“'Yaka'niona, iliajne'n kiapo ajwejlanawos, siukiwa tenaja'ak'i'ni siuniwa k'iejliyi ti tiwuniejata initiajnatisi'n. Yamkata ya'am ti si'wanjle'e, 'yina salasis ka kiak iwonisk'i ka silianis.” 4'Yina Sinia' isiujlie ti iyo'ate, “'Yejne'n, pajk'i ti wakal siunapo i'nio' siete mil ti ya'am ti isio' jlele, napoka ni siunapo ti t'akosjlete'l je itiyijinjli'ijyi'ne kiajwe nak Baal ti intaj tiwomaja.”#1 R 19.10,14,18
5Siu'niwa jlomas kiak iyoyi siupuwa jlomas pajk'i, ti po' siunapo Israel jika kia'lis 'wanjle'e 'nak nojwaja'm ti 'wasajne'n ti naka jla'am ni jikap'ijliuskiye ti it'imina, ti ijniejiet'e. 6Jak je iyoyiji siuti kia'iyo ti Sinia' ijniejiet'e nak jikap'ijliuskiye, sekyi'i ti 'yakaja pet ti je niwaka ka jikijmayejes kanses kant'emina. 'Yina siut'itie ka niwakaye siuniwa isis ka iwoyi, ijiate kiak je iyotaja'ni ti ijiate ti nak jikap'ijliuskiye.
7¿Tepi iyo ti kia'iyo? Ti siuti Israel jika kia'lis je i'winis ni siunie iyoyistajajyin'ni, 'yina napokata jla'am napo 'nak nojwaja'm jiwek ti Sinia' ti jla'am ti ijniejiet'e ti i'winis. Jlampet siunapo ijia wuj ti t'o'n ni jlosik iyo, 8iyo niwa Sinia' jlamtis ti iyo'ate:
“Sinia' initiajnat pi jlosik,
'yina je paj kant'ekiyi,
yiyeyi siu'nie jloma awak'i ti kia'iyo.
Sinia' iyo jitietiye, 'yina je i'wijne'n,
siu'neje ti iyo jik'iotiye, 'yina je tipechijyi'n.”#Deut 29.4; Is 29.10
9David iyo 'neje pet 'ate:
“Siuniwa jiliakijnieyejes'ni 'esiji ka inikajyi'n
ka wo'ate siuniwa inkatsalayis,
'yina ka inoyisi'ni jla'am ts'iji
janeyi siunie jawo ni Sinia' ti jan'ye'en napo i'nio'.
10'Esiji ka intosinik'i ape'e niwa jitiete,
'nakayi ti jawo talojoye,
je pajana'a ka 'esieyiji ka ijnats'i pijia'm,
'yina ti kiojieti ni yi' ape'e ti jijliuye.”#Sal 69.22-23
Siunapo je Judíojos inijijwisijyink'iye ka injwa'
11Jayo'ojwe 'ate, ¿kapajat'inie'e ka inets'i pijia'm napok Judíojos, siuti kia'iyo t'opits'i isia'm? ¡Jeyi kat'aja ka kia'iwo! Jak je iyoyi siunapo i'nio' 'wenayi i'yakanayisi pet ti tijwajyi'n, siuti kia'iyo ti iyoyi ni je 'es napo Judíojos, sekyi'i nak itiajlatayisi. 12'Yina siuti kia'iyo i'nio' 'esi, naka ti po' ni t'as kiajwe napo Judíojos, siu'neje ti ikamk'iji'n jak je iyoyi siuti kiak jawoyi ti ja wikie'eyi ti janjwa', ¿tepa jawo ma ja 'esie? ¡Ajwel'ni jlajma ja ijiatayiji ti ja 'esie!
13'Yina po' siunie jajwi'lase'm asa'am ti je Judíojosts'ase'm. Ya'am ti Sinia' sijliuyi napoka i'nio' kia'iyo 'ate jiwoyeyi, siu'nie isijmaye awo lajaye. 14Lapakawo ti awotajank'iye ka siunapo i'lijwas Judíojos pet ka injlak'al aselia'm, nakayi ti japoye siunapo ti janjwa'. 15Siuti Sinia' jwamjla'a ti je i'yejne'n napoka Judíojos, naka ti it'imina ti 'yakama napo i'nio' yi' ape'e 'ni ajnat, je lajk'i ti jla'am ni Sinia'. ¿Tepa jawo jiat'eje ka Sinia' inkimtie ilia'm? ¡'Wena ja ke iwo 'ate iyo napo i'nio mases ti tekiajlak'i pijia'm! 16Siojona ti tiniajnata ti totiej wita'm ti k'iejli tilisanaja ni niwakiwamak, janak siojona woye ti titiejietajape pa Sinia' ti t'otata,#Núm 15.18-20 'yina siunie 'wanjle'e totiej wita'm ti tiwoki woyejesa', kiak iyo siupa inia'an siupa tiwonaja ti t'otata. Siuniwa jijwetisi'l janak a'la' ti kia'iyo titiejietajape pa Sinia', 'yina siuniwa jikase'l kia'iyo pit iyo janak jitisiuk ti t'otata. 17Siunapo Judíojos napok iyo'ate siojona a'la' jle' iyo'ate olivok, siuniwa jik'ase'l jlameje, 'yina pajk'i ti tijwajakits'i kiwak jik'ase'l t'ipi. Siupet ti asa'am jiwoye pet 'ate siuniwa jik'ase'l janak olivok ti yi' kisie'e. I'notieyi siunie ji'wet siuniwa jik'ase'l ti tijwajakits'i, sekyi'i ink'iuyeta'yi ni ji'wet. Sekyi'i asjweye ijwienjlik'i ti jitiajlayi janak a'la', siu'neje ni jiwoyeyi ti as'wasankiye po'.
18'Yina ká ajwela' ka asa'm ijiatayiji ka 'ana'yi ape'e napoka siunapo ti ijiateje ti jik'asile. 'Esiji ka ataj 'enayi 'ate siu'nie, ti je asa'am ka 'etie pijia'm janak a'la', jla'm ijiatayi wek jla'am niwak jijwetise'l ti 'netiets'i pijia'm, 'yina janak i'nesieyi ti asa'am.
19Ent'a jawoye'yi 'ate, “'Wanjliyi, jlam'ne tijwajakits'i kiwak jik'ase'l, sekyi'i kasts'otieje ki yi'i kiwaka ti tijwajakits'i.”
20Ijiatataja wek, 'yina 'esiji ka 'najanayi paka wonayi ni siunie it'imina ti tijwajak ilia'm siukiwa ji'wole siojona ti ijiateje ti jitisiuk naka jla'am siunie jikakiujnieye, 'yina sekyi'i ti jik'iuyeja' ji'wet'e, lapakawo ti naka jla'am ti je kakiuye, it'imina ti as'wet po'. 'Yina ká anijnonitie 'wenayi jla'am ti ja ajoskiyeyi ni Sinia'. 21Ti Sinia' je kia'iyo ka imp'elisi'n siupuwa ti ijiate ti jik'ase'l japak olivok ti jlameje, 'yina kiak jawo'na ja ke inajwi'yit'a.
22Ijiate a'wena ti wuj ti takap'ijliuski, jla'yi ti a'tiek'i siunie iyoyi. 'Yina 'nesieyi siunie jikap'ijliuskiye iyoyi ti yi'nase'm, jlampet siunapo ti yamk'i isia'm ti t'opits'i isia'm, nak a'tiek'i pet siunie iyone. 'Yina awo'ate, ja ke paja ka atajli ni siunie jikap'ijliuski iyo, 'lojwinie'e ka inlana ilia'm siojona a'la' ti ijiate ti olivok jana jitisiuk.
23Siuka kia'iwo wat napo Judíojos ka ilek'i siunie jikakiujnieye iyo, ijiate Sinia' kiak jawo'ojyi pet janekiaj'le ni siunie taj'le, 'yina Sinia' 'yijene pi iyone naka ka kiak iwone. 24Ni siunie awo'ojyi ti ajwe'el, ti asa'am ti je Judíojosts'ase'm, jiwoye'yi 'ate siojona olivok ti kisie' jleliki niwa jik'ase'l, ti jitiajle pit janaka ti tijwajak'i aselia'm, sekyi'i ti 'notiejayi siojona ti ijiate jla'am ti olivok, ti je janak ka astesiukie. 'Esiji, 'yina, ¿tepi iyo napo Judíojos? Ti ijiate jla'am ti niwak jik'ase'l janak olivok, ¡jlajma ijiatayi jla'am ka 'esie, siuka kiak iwotaja pa Sinia' ka inekialta'ana'a ni siunie ti ijiate jla'am ti ji'wet!
Jijwajieti papo Judíojos
25I'lijwas, po' siunie Sinia' 'yakajanitk'i'm ti awotajank'iye pet ka ijwi'lase'm, 'nakayi ti ja lajak'i pet pa ka ijwel ka ijiatayiji ka 'naja'n ti asa'am. 'Naka 'ni siu'nie: ti Israel jika kia'lis jwajla'a ti int'onit kawoyi ni siunie iyo ni Sinia', 'nakayi ti siunapo je Judíojos ja pajlataja'm pet siunie injwajieti. 26Jak je iyoyiji siuti kiak jawoyi, sek jane'yi napoka Israel jika kia'lis wikie'eyeyijna'a pet ka injwajyi'n. Ke iwo pa ti siuniwa Sinia' jlamtis iyo'ate:
“Siunie injwajietiwo jantajla'm jana Sión,
sek jane'yi siunapo Jacob jilis pet
jajnale ni siunie je 'es.#Is 59.20
27Kiak jawo ni siunie jayone ti i'lij jawijna'm,
ka kia'iwo ka ijialtajajna'a ni siunie jloski'la.”#Jer 31.33-34
28'Yina 'najanayi pi jiwonayi ti siunapo Judíojos Sinia' iyo jitiejiejwasa', kajeyepa ti 'yakakiuyis ni siunie jika'niye. 'Yina nak 'nesieyi pet ni siunie iyo ti 'yakakiuyis. 'Wanjliyi ka kiak iwo, 'yina Sinia' yamjliyi ti iyojonk'iye, lapakawo ti papoka jla'am papo jika kijilas mases t'ipi ti jikio' jlele. 29Je'ne ka je 'nakaja siunie Sinia' iyoyi. Siunapo iyo ka inki'mik'i napok isima'ak'i, siu'neje napo iyo ka inoyeje napok iniuyeyeje'eje. 30Ti pajk'i asa'am ti je Judíojosts'ase'm je k'iuyeyi ni Sinia'. 'Nakayi ti kia'iyo ti je its'iuyisie pet pa Sinia', nak 'nesieyi pet ti Sinia' imp'elisina'. 31Ka 'wena iwo wat siunie iyo ni ajwel'ni, ti je iyo ka ink'iuyisie pa Sinia', lapakawo ti Sinia' iyo ka 'nesieyi pet ni jikap'ijliuskiye, kia'iyojliyi pet ti jlamis. 32Kajeyepa ti 'yiniye ka wikie'eyeyi napo i'nio' siunie inkakiujnieye yiyis kiajwe, 'yina Sinia' jla'am ti kiak iyone, lapakawo ti iyo ta'a ka ijnol wita'm napo i'nio' ti jikap'ijliuskiye yi'ne.
33Awo'ate, ¡je pini' siuniwa ijiat ti isis yiyi ni Sinia', siu'neje na 'najankijnieye iyo, siu'neje ni jlosik! ¡Lajk'ipa ka 'najane ka iwone siunie iyo kawoyi! ¡Lajk'ipa ka 'najane paka iwone siupa jike' iyone'ni!#Is 55.8-9 34Iyo niwa Sinia' jlamtis ti iyo'ate:
“¿Tepa yi'i pa ti 'yijene pi iyone pi jitienkiujnieye pa Sinia'?
¿Tepa yi'i pa i'nio' ti iyo jlosikie' pa Sinia'?#Is 40.31; 1 Co 2.16
35¿Tepa yi'i pa ti k'iejliyeyi ti yikiajle ka nejni pet siupa ti t'ajla?
¡Lajk'ipa!”
36Ke iwo pa ti jla'am ti tajle wikie'eyi niwa wask'i'nelaja, siu'neje ti ka lajak'i je kia'iyotaja ka poye, jla'yi ti jikijmatis jla'am.#Col 1.16 ¡Siunie jiwunitieyi jajnok'i! Amén.
Currently Selected:
Romanos 11: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.
