Romanos 12
12
Siunie ti ijiate ti 'es jiwunitiejeye ti jayina'a ni Sinia'
1Ijiatjliyi 'napo i'lijwas, siuti Sinia' jikap'ijliuskiye yints'e'm, wuj ti anip'elisi'niase ti jayo'ate, ká anitejna'm ni Sinia', niwone 'ate siunie ti tiwonaja ji'wajieta' ti jla'am ti tiwunie, ti i'wasanajyi'n, ti i'notata k'iye, jla'yi ti 'yakanit'ni pa Sinia' siunie jini iyo. Naka ni siunie ti jlonitieta pa Sinia' ti je niliak. 'Esiji ka je aleyi ti ja e'ne ni Sinia'. 2Ke inteliaja siuniwa wask'i'nelaja a'wena siu'nie jloma, 'wanjliyi ka wo'ate pa, “jla'm ijiate siu'nie ti 'es.” 'Yina wo ink'ieye ni astankiujnieye 'nakayi ti ja'wena' jawo siunie jiwoyeyi, sek jane'yi ka intant'iejayijijna'a siunie Sinia' iyo kawo. Ka iyot'iate, ka intant'iejayiji siunie 'es Sinia' itiliaja, jla'yi ti tijnajyi.
3Etijnape pa Sinia' siunie iyonk'iji ti sip'elisi'n, ti jayo'nase 'ate ti apejlanit'i astepe'e: je 'es pa ka jitienkiujnieye kiak iwone ka injwel ka jla'm ijiatayiji ka 'esie, sekjane'yi ti jani'najnat pijia'm. 'Yina 'esiji ka ani'notatayiji, 'otatats'i siunie astankiujnieye, jla'yi ti janijnojlieta wita'm siuti ja ijiatayi ka astankiujnieye poye, ni'ne ti jwajla'aja ti astankiujnieye poye ti Sinia' iwi'nase'm.
4'Esiji ka ataj enayi pet 'ate siuti sa'am ti i'niolts'e'm, jlam'ne ijwienjli siu'nie ts'ajwes, 'yina 'loj siu'niwa sijwa'al ti jikijmaye je ijwienjlik'i. 5Sam pet ti Sinia' jilists'e'm kiak awoki. 'Wanjliyi kas'lojwata, 'yina ani'nopijietak'i wita'm, sekyi'i ti kasjwanjliyek'i.#1 Co 12.12 6'Yina ijwienjli je k'iejliyik'i siuniwa Sinia' iwints'e'm ti iyo si'wajietisa', kajeyepa ti kasjwankitamk'i'ni siunie iyonts'eje ti kasp'elisi'n. Jak je iyoyiji siuti a'm ti injwejlanik jiwo'wa'm, woyi ni siunie jikijmaye iyo ni injwejlanik jiwo. Woyi jika'niyejayi napo i'nio' siunie iyo ni ijwijla'm jana Sinia' jikimet, 'yina siunie atankiujnieye iwi'na'm je t'an pijia'm. 7Siuti a'm ti jiniuyeje'ni napo a'lejwas, 'esiji ká aleyi ti jiniuyeje. Siupet ti a'm ti jit'iyasajne'n napo a'lejwas, 'esiji ká aleyi ti jit'iyasajnen'ni. 8Siuti a'm ti jiniuyeje'ni napo a'lejwas ti jikela'ni, ká aleyi ti jikela'ni. Siuti k'iejliyi pa jiwejna'm ni akiecha, 'esiji ka intajla'm ni ajosik ti 'es siunie jiwoyi. Siuka tijniejieta'a'm ka 'yena siunapo Sinia' jilis, 'esiji ka wujwa ka'yena. Siuti tijniejieta'a'm ka p'elisijne'n napo a'lejwas, nikanit'i siuti jiwoyetaja ni akijmaye.#1 Co 12.4-11
Siunie 'es ka iniwonaja
9'Esiji ka je alakiyeyi'i wek siunie assemijnaye ti jiwoyeyi. 'Esiji ka ine'wajayi siunie je 'es. 'Oye'yi ni siunie 'es. 10'Esiji ka ani'namajapi asa'am ti injwanjliyek'i.#Jn 13.34 Wo lajaye ni akiecha, 'ajnat wat ape'e siunie iyo'naja ti iyo ajaye, wikie'eyi napo a'lejwas.
11Jwajla'a paka woyeyi, ke ink'ijliayeje, nayi wita'm siupa ajosik iyo ti jiniuyeje pa Saka'niona.
12'Esiji ka nikanitie'yi ilia'm siunie asnejejwijiye ti yi'ase. Siuti jane'yase ni aswet'ia, 'esiji ka akat 'okiejak'iye. Ja ke paja ka leyeyi ni asts'ajlaye ti jawoyeyi.
13Nitojmatayi asa'am siunie isitia'n napo a'lejwas Sinia' jilis, 'esiji ka 'esie ka 'yena'yi ilia'm siunapo ti ijio'wase ti ijio isik'i.#Heb 13.2; 1 P 4.9
14Jlampet siunapo ipiejwuyi'asem'ni ka aswet'ia poye, napoka ti 'esiji pet ka ekiajle ilia'm siunie 'es.#Lc 6.27-28; 1 Co 4.12-13; 1 Ts 5.15; 1 P 2.22-23; 3.9 'Yina ká apajwuyi'i'ni pet ka jiwet'ia poye.
15Siuti po' ni inkaj'ni, 'esiji ka kiak awoyeyi pit inkasajyi'n. Jlampet siuti po' napo yape'n, kiak woyeyi pit, noyeyeje ti yape'n.
16Jnojlieta wita'm niwa askiojwa'l. Ká anijnonitiejyi'n; wo 'ajajnajwasa' siunapo i'nio' jiniliaja ti laj pet lajaye. Ká ajwela' ka ijiatayiji ka 'najanajyi'n.#Pr 3.7
17Ká atayitieyi siunapo ti je 'es ni yi'nase'm. Jalasa ka woyeyi siunie 'es ti jleyeyetaja napo i'nio'. 18Siunie jlaj yi'i ti jikajlajyi, ti jikamaja jikiowe'e napo i'nio', nak 'esiji ka woyeyi. 19I'lijwas ti ts'ama'ase, je 'es ka tayitieyi ni siunie je 'es, 'yina ejlo'o wek Sinia' jlam ti jawo lajaye. 'Yina jlam'ne siuniwa Sinia' jlamtis iyo'ate, “Ya'am ti jayo lajaye, iyo pa Saka'niona.”#Deut 32.35 20'Yina po'neje siunie iyo'ate, “Kojnie'n ni atajiejwa ti inil'lia'n. Jlampet siuti isi'im, 'yayi'ni 'niati, jant'emina ti ja ke jlasiye ni t'ajwejli ti jajwejlanit'ni.”#Pr 25.21-22 21Ká anine'nate k'iye siunie je 'es, 'nakayi ti ja ke intate isia'm. 'Esiji ka ama ti jatate isia'm ti jawoyi ni siunie 'es.
Currently Selected:
Romanos 12: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.
