Marcos 12

Jesús yamtiyi siupapo inkijmayewos ijiuski'lajne'n ti jla'am i'yejnap jiwek

(Mt 21.33-46; Lc 20.9-19)

1Jesús iniajnat ti yamtiyi k'iye siu'nie i'yejnap jiwek, iyo'ne 'ate:

—Pojompe pa i'nio' ti yikiaj'l isia'am puwa ts'ejnie tio'#Is 5.1-2 yi'i pa jiwasok, 'yina iwiakajlanit ta'a siojopa sisaj jansajia'm pa t'e', sekyi'i ilisanayi'iji siojopa ji'wuk siupapo jan'yen'ni ape'e ti toj pijia'm. Itimeje ti iwinaja'm papo jikawos ka inkijmajne'n, sekyi'i ti jiwekie'aja ti ya'am ti ijioyi japa ajnat 'wenayi ti tojwe. 2Itijnisi ka intemisi ka inteme ka inkawejnajne'n, sekyi'i ti ijliuye pa jikawo ka jitiej inayi ka poye japa kajnotts'e ka intajiete'n k'iye pa jika anechiyas. 3'Nese papo ti 'wena tiwonajat'iyipi, isimat'iyits'i ti yejes'ni, sekyi'i ijliuyeyi ts'iji wek ti lajk'ipa ka inenis'ni jikiojyi. 4'Yina siupa jikimet ijliuye'eje pa jikiecha jikawo, paka'ne siupi ti ijiate ti iliakiyis, yejesiam'ni japa jletik. 5Sekyi'i ti ijliuyet'itie'eje pa jikiecha, 'yina pak iniayits'i'ne. Je ijwienjli ka je injloyeta'ni papo ijia 'neje, 'yina ti kia'iyone je ijlienis pa ti tijliuktieje, ijia papo ti ijiateje ti ilianisin'ni.

6“'Yina ijwienjlijli'ijyi pa 'wanjle'e, paka jlas ijwienjlita, siupa ti ijiat 'namajaja. Pak tome jlaja ti ijliuye'eje wek, kajeyepa ti jikiowe iyone 'ate, “Je 'es ja ke inwonisi, 'yijene ala pa iyonisi ti yas.”

7“Jak je iyoyiji siuti yiyeyi papoka, 'yina iyoyis'ne 'ate ti inijlok'ijin'ni, “'Yaka 'nakayet'inie'e 'ni siu'nie jinia' jajnajiet'e ti ja jikimita siu'nie ajnat awak'i. ¡Nisiamaja jaliana, sek jane'yi ka sikimitayijina'a!”

8“Ijiatjliyi isimits'i'ne ti ilianis, sekyi'i itietayisi kisie'e.

9“'Yina, ¿ten siupa jitijnisieyi kawoyi pa jikimet pak inwasok? Ya'am awo'ate, janeki papo jikawos ti jantej'we ti janlajne'n, sek jane'yi ka iwoyejyinna'aja papo ijia 'wenayi ti janekiajle paka inkijmaye.

10“¿Jet'i jlamtijiena niwak Sinia' jlamtis ti yi'i ni ji'wet ti iyo'ate:

Siojona sisaj ti siunapo 'wukiu'l jiwos iwit'iane,

'yina jla'm inesi'lieyi ti kiak iniwone 'ate

iyo siojona sisaj jlameje ti tena jikatokiyi jana 'wuk.

11Jla'am pa Saka'niona ti iyo ka kiak iwoyi,

'yina a'wena ti wuj ti 'es siunie iyoyi?”#Sal 118.22-23

12Iyoyisietaja'ni ka inkimits'i ja Jesús kajeyepa ti itiant'iejesk'i ti jlamis ti tijwelajas'ni ti ti'yenajap jiwek papoka inkijmayewos ti ijiuski'lajne'n. Je 'es jla'am ti je ijwiyisie papo i'nio', iliyeyisi wek sekyi'i ti tajlayisi.

“Siunie tajle ni anechiyas nak ja ekiajlayi pit ni anechiyas, jlampet siunie tajle ni Sinia' nak ja ekiajlayi pit ni Sinia'”

(Mt 22.15-22; Lc 20.19-26)

13Siupapo Fariséojos, siu'neje pa Herodes jikawos, po' papo tijliukie'ni kajnoyi ja Jesús kan'yasis'ni, sek jane'yi ka poye pa paka ji'lija ka inwet'ianisk'i, 'yina ka pakaye wek ka injwelis ka intajlatisie, lapakawo ti iyoyisijyi'n paka jitis iwo. 14Siuti yiyisi iyonisi'ne 'ate:

—'Yaka'niona, kasts'ajane pa awona ti a'am i'nio' je niliak'ia'm, jla'yi ti je inkajli siunie iyo napo i'nio', kajeyepa ti je 'yene paka t'oniye iwo pa i'nioye, najata jla'am siunie Sinia' iyotaja kawo napo i'nio' ti jika'neyasane. It'imina ti ja'yasaja'n ti jayok'iate:

—¿Ma 'est'iyiji ka 'yakat'inie ape'e niwa inkat'ijnieyejes anechiyas Roma jlele t'ajla'ni napo, ni'ne ka jeye? ¿Ma jatisie ni'ne ka ejloye'e jiwekie'e?

15Jlam'ne Jesús 'yijene pi iyone ti siupa tiwonaja ti tejlita, sekyi'i iyo'ne 'ate:

—¿Yot'iyi'ni ti sejlita? Toniemet japa wikiniet'aja janjwanjli ja'ye'en.

16'Yina titiuniejayi, sekyi'i Jesús i'yasam'ne papoka ti iyone 'ate:

—¿Tempa jipe'el ni siu'neje ni jle' ni yi'i?

Iyo'ne 'ate papoka ti isiujlieyisi:

—Siunie anechiyas Roma jlele naka.

17Sekyi'i ti Jesús kiak iyonayi 'ate:

—Ijiatp'ane, siunie tajle ni anechiyas Roma jlele nak ja ekiajlayi, jlampet siunie tajle ni Sinia' 'yina nak ja ekiajlayi'ijyi pet ni Sinia'.

Kanwojlijinisipi pa ti ipi'yayis ti kia'iyo.

Ti'yasanaja siunapo 'yajle'n ka ijiatayi ka inapits'i pijia'm

(Mt 22.23-33; Lc 20.27-40)

18Po' siunapo Judíojos 'neje ti jle' iyo'ate Saducéojos, 'yina papoka ti ijioyi ja Jesús, ti takakiunisi ka inapits'i pijia'm napo 'yajle'n.#Hch 23.8 Jak je iyoyiji ti kiak iyonisi 'ate:

19—'Yaka'niona, siukia Moisés iliyisajap siu'niwa jilisajna' ti iyo'ate, “Siunie i'nio' laj jilisayi ilia'm siojopa yitaja, 'yina paj ti 'yala wek, siuti po' siunie ji'liela 'esiji ka pakayi ti janeyi, sek jane'yi pak janekial pijia'm pi jikilia masa ti jilis poyi jla'm ilia'm japa ji'liela.”#Deut 25.5-6 20Kajeyepa ti pojompe papo i'nio' ijwienjli sikio' itij'we times tom'niji ijwienjlik'i, siupi isijli laj jilisayi ilia'm siojopa yitaja ti 'yalajimpe. 21Jak je iyoyiji ti siupa ji'yini tome'e, pak its'iuyetaja'ne pet, 'yina kiak iyojliyi laj jilisayi ilia'am japa ji'liela, ti 'yala'aja pet. Siupa tomtaja'a pet siupa je pajk'i ti 'ya'al jikilia masa, kiak iyojliyi paj ti 'yala'aja wek ti laj jilisa ilia'm japaka ji'lielajas. 22Paj ti nojwa'a jiwek papoka ni nojwa'm, siojopa ask'ilieki 'yal 'neje. 23'Yina siuti ijwi'il napo janapits'i pijia'm napoka 'yajle'n 'esiji, 'yina awo'ate, ¿tepat'e jane'yi siupa ti ijiatayiji ti ja jik'iemjlaye siupapo ijwienjli sikio' itij'we times tom'niji?, 'yina ti itij'we ti jijwa'yis.

24Jesús isiujlie ti iyo'ate:

—Jikamats'iji'n, 'yaka je intant'iejayi niwa Sinia' jlamtis siu'neje ni jijweye iyo. 25Siuka netiejenie'e jana jloma ti siunapo 'yajle'n janapits'i pijia'm, ja ke injwa'yits'iji'n, ayinie asejnia kia'iyojliyi, 'yina ti jawo 'ate siunapo Sinia' jijliujwajnas poli jlele. 26Jlajmiliet, siunie iyo ti janapits'i pijia'm napo i'nio' napo 'yajle'n, ¿jet'i jlamtijiena'ijyi niwa Sinia' jlamtis yi'i ni Moisés jip'esinik siunie ti ijwi'il siojopa a'la' ti tak'ayi'ni pi jwat ti 'lajna'm? Pakayi ti Sinia' iyone 'ate pa Moisés, “Ya'am ti Abraham jiniak'i'm, Isaac jiniak'i'm, siupa Jacob jiniak'i'm 'neje.”#Ex 3.6 27'Yina siunie Sinia' siunapo ti 'wasajne'n napok jinia', 'wanjliyi ka pajak'i pa ka 'na'al jijweye po' ape'e, 'yina 'yijene ti yikial pijia'm. Wuj ti jikamats'iji'n.

Sinia' jlamtis siunie ti 'yaka'm ape'e niwa ijia

(Mt 22.34-40)

28Sekyi'i 'nesajampe'eje pa ijwienjli siupapo taka'neyasane pak Moisés jika'neyasajnaye ti ijioyi ja Jesús, 'yina ti 'yijenayi pi iyone ti siupapo Saducéojos iniewitijin'ni, jla'yi ti je t'a'ni ti isiujlie papo ti i'yas'ni. It'imina'ne pet ti iyo'ate ti jlama pet ti i'yase'n:

—¿Tepat'e yi'i pa siuniwa Sinia' jlamtis ti 'yaka'm ape'e niwa ijia?

29Jesús iyo'ate ti isiujlie:

—Sinia' jlamtis siuniwa 'yaka'm ape'e niwa ijia naka siunie ti iyo'ate, “K'iuyeyi, Israel jika kia'lis, Sinia' ti Saka'niona, ijwienjli jla'am ti Saka'niona. 30Emi'n ni Sinia' ti Aka'niona, nayi wita'm pi iyo pa akiowe, nayi wita'm pi iyo pa asak'al, nayi wita'm pi iyo pa atankiujnieye, siu'neje ti janayi wita'm pa iyo pa ajweye.”#Deut 6.4-5 31Siunie tomik'i iyo'ate, “Emi'n ni akiecha, wone 'ate iyo ti a'am ti jininemi'n.”#Lev 19.18 'Yina lajk'i paka jikiecha ka inka'm ape'e 'niwaka.

32Sekyi'i iyo'ne 'ate paka ti taka'neyasane pak Moisés jika'neyasajnaye:

—'Esiji 'ni Ika'niona, ka jla'm awo wat siunie jiwoyi ti ijwienjli ni siunie ijiate ti lajk'ipa ka jikiechaye. 33Ti siuti jayimi'n ni Sinia' ti janiayi wita'm pi awone pa isiowe, janiayi wita'm pa iyo pi ijiusik, siu'neje ti janiayi wita'm ki iyo pa ijwiye, siu'neje ti emi'n ni isiecha ti jayone 'ate awone ti ya'am ti aninemi'n, jla'm ijiate ti 'es, 'yina ti 'yaka'm ape'e siuniwa tilianajan'ni, siu'neje ti tiwunie ti tonitieje pa Sinia'.#Os 6.6

34Ti Jesús i'wi'in paka taka'neyasane pa Moisés jika'neyasajnaye ti jlosik ijyiwiteje ape'e siupuwa ti'yasajajan'ni, sekyi'i iyone'ne 'ate:

—Je into'we ni Sinia' jika anechijiayas.

Sekatajak'i 'yina tikipajayi'ni ka k'iejliyeyi pa ka ti'yasajajan'ni.#Lc 10.25-28

Sinia' jijliujwanik ti Injwajieti

(Mt 22.41-46; Lc 20.41-44)

35Ti Jesús taka'neyasa'n kiajwe jlaja 'najla'wet wuj, i'yasa'm papo ti iyo 'ate:

—¿Yot'iyi'ni siunapo taka'neyasane ni Moisés jika'neyasajnaye, ti ijwi'il ni Sinia' jijliujwanik ti Injwajieti ka napok intajla papo David jika kia'lis t'ipi? 36Siupa David, siojopa Sinia' jikimet initataja'm ti yamtijie'n ti iyoye 'ate:

“Saka'niona iyone 'ate ni Ika'niona,

Wejen 'niji ijwiyeje,

'yina je ijiate ka je yinna'a akiajwe napo atajiejwas ti ja 'ask'i'ni.”#Sal 110.1

37¿Yot'iyi'ni ka intajla'm papok David jika kia'lis naka ti jla'am ti Injwajietiwo ti jlam'ne David kia'iyo iyo jika'nionaja?

Siupapo i'nio' ti je pini', je jlase' pi iyo ti yimi'n ti its'iuye ja Jesús.

Jesús ijiutkina ape'e papoka jiwos pa Moisés jika'neyasajnaye

(Mt 23.1-36; Lc 11.46-54; 20.45-47)

38Jesús yiniji pa t'eyasajnaye siu'nie ti iyo'ate:

—Asosik enitiejyi'ni k'iye siunapo jiwos ni Moisés jika'neyasajnaye, siuti t'iskiunk'iji'n yimi'n ti 'yuts'iji'n siuniwa ji'wuye ti je lis. Iyojonk'iye ka titijwilaja, siuti ti'wenajata ilia'm, jla'yi ka tonitie. 39Jlampet ti yiyis kiajwe siuniwa 'najla'wetis je wus, je 'neni ka je ineyits'ik'iji'n siuniwa in'wetis ti isis, siu'neje ti ijioyi japa inlakijnieye ti iyo ka ti'wena. 40Tajlanek'i napo ask'ilieki niwa ji'wuki'l, jla'yi ti je iliakiyisi'i ti iyoyis t'ajlayeja' ti inistajanitisi ni jloski'la ti iliaki napo i'nio'. Awo'ate, ¡ja kiojietaja'nine siunie ja tiwonaja ti ja tisiejek'i'yi!

Siojopa ask'ilieki iyoyi ji'wajietayi pa Sinia'

(Lc 21.1-4)

41Ti je taljli'ijyi ts'e yi'i jlaja 'najla'wet wuj, Jesús teje'yi siojopa titietajak'i'ni isia'm puwa wikijniest'ejes tiwoki in'wajietiye ti tekiajlaja pa Sinia', ti i'ye'en papo ijioyi ti itietik'i'ni isia'm, jlam'ne siupa i'nio' jwajla'a i'wi'in wuj jla'am japa itietek'i isia'm. 42Ijyiwitat'ipi ilia'm siojopa ask'ilieki, ti p'ijliusie, ti 'nesa pet, ti itietek'i isia'm japa jika wikiniet'aj jlase' ti timesk'i jiwek ti laj lajaye. 43Jesús tanat'iyi'nijpe japo t'eyasajnas, sekyi'i ti iyonayi 'ate:

—'Yenak'i siojokia ask'ilieki, p'ijliusie. Ijiatk'i siunie awo ti siojokia jika wikiniet'aj jlase' ti itietek'i isia'm siojona tena'a'ni, 'yina 'yaka'm ape'e siojopa itietek'i isia'm siojopo i'nio' ti ijiate jla'am ti jwajla'a i'wi'in. 44Kajeyepa ti siojopo i'nio' itietek'i isia'm, janaka siojona jika wikiniet'aj 'wanjle'e ti i'yaka'n, 'yina jlam'ne pet siujlieja ask'ilieki janaka pet siojona ti jika wikiniet'aj jlase' iniatie'e'ni 'yina iniayi wita'm ti itietek'i isia'm, ti jitiej iyontaja'ni pet ka jlak lajaye.

Currently Selected:

Marcos 12: CRT97

Highlight

Copy