Marcos 11

Jesús yamaja'm japa Jerusalén (Mt 21.1-11; Lc 19.28-40; Jn 12.12-19)

1Ti Jesús siu'neje japo t'eyasajnas ti joye kaneyisi siujlieja Jerusalén, siojowa isi'il Betfagé siu'neje jlaja Betania je tosape'n, yi'i jlaja tikijnaki jle' iyo'ate Olivokiet. Sekyi'i ti Jesús ijliuyejempe japo t'eyasajnas times, 2ti iyone 'ate:

—Maye'ni, jlonieyi wat siojose isi' je kastojwape'n yi'i ni jajioki, 'yina ja 'oyeyi wek ka sek a'wenaye'ena'a ni malekiatiok jlas ti mawat toskijli'ijyi, ti tilie'nitie'e seka'a. Sek jane'yi ka lanayejienie'e ti janamayik'i. 3Siuti ja poye pa jawo'ate ti jan'yasajyi'n, “¿Yot'iyi'ni ti jilienajyi?”, sek jane'yi ka kiak awonayeyijinie'e, “Saka'niona isitia'n kane kiu' ape'e, iyo ka inekialmet ka pajata.”

4Ijiatjliyi yamajan'nijpe. Jak je iyoyiji ti yiyeyisi pa jika'wu jlaja isi', 'yina sek i'winayits'i pak malekiatiok jlas yi'i pa 'wuk kiwet. Sekyi'i ilienayisi.

5'Yina siupapo ti i'winayisi, sekyi'i iyonisi'ne 'ate:

—¿Tepi jiwonayi ni malekiatiok jlas ti jilienajyi?

6Sekyi'i ti kiak iyonayisi ti isiujlisie:

—Saka'niona isitia'n kane kiu' ape'e, je ijiat ka je inekialmet, kiak iyo'ojyi.

Ijiatjliyi tiwenajam'ne ka inekisiji. 7'Yina ti 'nesayisiji, iyoyeyis jika apekiaye puwa ji'wuye jlamis, sekyi'i ti yamayisi ja Jesús kane'yi ape'e pak malekiatiok jlas. 8'Yina siupapo ti je pini' siupuwa ji'wuye jlamis its'ink'i pa 'nayi ajnat'e, ijia papo isima siupuwa a'la'wole ti tajlisi 'lane, ti kiak iyonisi ti yinisk'i siupa iniu'we. 9Jak je iyoyiji siupapo iniank'iye, siu'neje papo 'wanjlejap isia'm iyoyejimpe 'ate ti tanisi ape'e:

—¡Jiwunitieye tena'a siunie ti Saka'niona ji'lij iwijna'm! ¡'Esiji ka Sinia' jikap'ijliuskiye ti 'es ine'ne!#Sal 118.25-26 10¡Wunitie siupa sitis t'ipi David jika anechijiayas ti ja'nets'e! ¡Wunitie pa Sinia' ti yi' poliyi!

11Yamaja'm jlaja Jerusalén ja Jesús, 'yina yamite jlajak 'najla'wet wuj. Itimeje ti yikiajli'ni ti jla'm iyo ka'we'en. Sekyi'i ti yama ti yapi 'niji yi'i jlaja Betania, ti jla'yis japo t'eyasajnas itijwa'm sikioye times tom'niji, lapakawo ti no'otieyi pakayik'i.

Jesús imiesi'n japa higok ka'na'al ti je iyo jlaye

(Mt 21.18-19)

12Yit'i'yipe'eje japa jloma, ti tajlayisia'meje jlaja Betania, Jesús inil'lia'n pakayi. 13Tojwe pa k'iejliyiji pa yi'i japak higok ti i'wine. Jak je iyo ti yiyeyi, i'yent'itiejpe ka jla' poye wat, 'yina ji'wole 'nejie'e ti yiyeyi ti i'yentaja'm. Kajeyepa ti je yiyi siupa k'ie'ni ti iyoyeta jlaye puwa higok. 14Sekyi'i iyone'ne 'ate ti tamti'yi japak a'la':

—¡Ja pajana'a ka titiuwa puwa aye!

Jak je iyoyi siojopo t'eyasajnas ipi'ya pakayi.

Jesús ijiut kisie'e siupuwa ti je 'yujwanit'i ti yi' kiajwe japa 'najla'wet (Mt 21.12-17; Lc 19.45-48; Jn 2.13-22)

15Siuti yiyeyisi jlajak Jerusalén, sekyi'i Jesús ijioye kiajwe jlaja 'najla'wet wuj, pakayi'ne ti ijiutk'i kisie'e siupapo ti takawejnajne'n siu'neje papo tik'iajwajyi'ni, 'yina yajmank'i isia'am siupuwa tejeyisi ape'e puwa jika wikijniest'ejes papoka i'nio' ti jilis its'iuyetis'ni ji'wet'e, siu'neje puwa ji'wetis puwa ojwos ti iwin'ni. 16Siu'neje ti je yi'nate papo ka k'iejliyeyi paka intonis'ni ti 'yuyetajasi. 17Sekyi'i ti ijyijlitayi ti janka'neyasa'n, iyo'ne 'ate:

—Siuniwa Sinia' jlamtis yiji ni ji'wet iyo'ate: “Siujlie'e i'yuk, jle' ja tiwonaja 'ate, “'Najlaye 'wet jak je iyoyiji wikie'eyi siunapo i'nio' ti yi' ape'e 'ni ajnat jajnoyi ti iyoyeta t'ajlayeja'.”#Is 56.7 Jlam'ne ni jiwonayi, ti jiwoyeyi kajlajnatas ji'wukie'.#Jer 7.11

18Siupapo pa'yijis jika anechiyasas siu'neje papo jiwos pet pak Moisés jika'neyasajnaye, ti t'ijieyeyisi pa iyo ti tamti, 'yina iyoyeyisijyi'n paka ji'niayija' ka inlanis. Lapakawo ti je ijwiyisie, 'yaka ti'niejmaki pa t'eyasajnaye iyo. 19Siupa ti ajnaja Jesús ti jla'yis japo t'eyasajnas tajlayisia'm jlajak isi'.

Siojopa higok ti je iyo jlaye 'ya'al

(Mt 21.20-22)

20Siupa jloma kiechaye'eje ti k'iejli mot, ti iniuyis ts'e yi'i japa higok siojopa ti Jesús isilaja, 'yina i'yent'itiejespe'ne jla'a 'ya'al ti 'yale tajlape puwa jijwetisi'l japa a'la'. 21Sekyi'i ja Pedro jitiej t'ipa wujwayi siupi ti Jesús isilaja japa a'la', sekyi'i iyone'ne 'ate:

—'Yaka'niona, 'yejne'n siojokia a'la' jisilaja 'neyejek'i, 'yejne'n, 'ya'al.

22Jesús isiujlie ti iyo 'ate:

—Ká akakiuye pa Sinia'. 23Ijiatk'i siu'nie jayo, ti siuti japoye pa kanwone 'ate ka jloye siujlieja tikijnaki, “¡Nitajla'n, nitateja'm ni i'niat!”, 'yina ijiate, siuti kiak jawo janjwankitk'i ni jitienkiujnieye ti siupa iyo kawone, je 'es'ne ka je ijiatayi ka intankiu'n. 24It'imina ti awo 'ate, ti ja k'iejliyeyi pa ja 'ajlayi ti jasetiana, ti ja enayiji ni asts'ajlaye, ataj womak'i. Je ijiat ka je ine askiojyi siupa jit'iejlayi. 25Jak je iyoyi siuti jawoyi ni asts'ajlaye, 'yina 'esiji ka inkiwali'yi pa k'iejliyi pi askiecha iyo'na, ti naka ti jitiajlatayi ti jiwoye jitisa', 'nakayi ti siunie Asna' ti yi' poliyi kiak jawo jankiwali'yi siupa astes iyo ti yiyi ilia'm.#11.25 Siupuwa inamtis yiji siojopa v. 26 jlam je yiji ta'a siupuwa inamtis inkio' lisajnat'ipi ti jlame. Siupuwa ti iyo'ate: Jak je iyoyi siuti ja ke inkiwaliye'yi pa k'iejliyi pa askiecha iyo'nase, siunie Asna' ti yi' poliyi kiak jawo'ojyi pet ja ke inkiwali'yi'i siupa astes iyo (11.25).

Jijweye iyo pa Jesús

(Mt 21.23-27; Lc 20.1-8)

27Paj ti yapilijinisiampe'eje jlajak Jerusalén, sekyi'i ti 'yuyejenisipi jlaja 'najla'wet wuj. Jesús yikiajli'ni ti i'yenk'i'ni puwa seka'a, 'nesa'ni papok Fariséojos, siu'neje papo jiwos pet pak Moisés jika'neyasajnaye, papoka 'neje papo kijilas ti jle' po'. 28Iyonisi'ne 'ate ti i'yasis'ni:

—¿Tepa jitiajle'e siunie ajweye ti jikajli ti kiak jiniwone? ¿Tempa yikiaj'la naka?

29-30Jesús isiujlie ti iyo'ate:

—Kia'awo po' pet na ja'yasayiji'n: ¿Tempa tajleje kia Juan ti inajiejnawo ki jijweye ti it'imina ti lajk'ipa ka intomik'i'ni ti iniejiejne'n papo i'nio'? ¿Ma pak tajle pa Sinia', ni'ne ka papokaye i'nio'? Jejlikiamaye kiu' ka jwelak'i'm, sek jane'yi ka yamana'a pet ka ijwi'lase'm siunie ijwiye atajleje, ni it'imina ti akajli ti awoyi niwaka wask'i'nelaja.

31Sekyi'i ti iniajnatayis kiu' ti inijlok'ijin'ni ape'e kiaka ti ini'yasists'i ape'e, ti iyoyists'i 'ate:

—¿Tepat'e jayoki ti jasiujlieje? Siut'itie ka iyok'iate, “Sinia' tajle”, jawoyena'a 'ate ti jankiults'e'm, “Kiak p'an iyoyetaja, jakajliete ¿yot'iyi'ni jiat'eje ti jikakiuye?” 32'Yina ¿tepat'e jiwo ka inkiults'e'm siuka iyok'iate, “Tajleje napo i'nio'...”?

Lapakawo ti je ijwiye papo i'nio', it'imina ti kiak iyo, 'yaka kiaka Juan ti inajiejnawo ijiatjinipe ti kiaka Sinia' jijwejlanik jiwo ti ijiatk'i. 33Iyoyeyis jiwek 'ate ti isiujlieyisi ja Jesús:

—Je kasts'ajane.

Jesús iyo'ne 'ate:

—Ijiatp'ane kia'awo ja ke ijwi'lase'm pet siunie ijwiye atajleje ni it'imina ti akajli ti alesane niwak wask'i'nelaja.

Currently Selected:

Marcos 11: CRT97

Highlight

Copy