Mateo 23

Siupa Jesús ijiutkine ape'e papo Fariséojos, siu'neje papo jiwos pet pak Moisés jika'neyasajnaye

(Mc 12.38-39; Lc 11.43,46; 20.45-46)

1Yam'niji kiaka, Jesús iyone 'ate japo t'eyasajnas jla'yi japo i'nio':

2—Siunapo Fariséojos siu'neje napo jiwos pet ni Moisés jika'neyasajnaye yiyits'iji'n nak siunie ji'wet t'ipi pa Moisés, jijweye iyoyi ti 'yijie'ne napo i'nio' ka je injlanis siunie iyo ni inka'neyasajnaye. 3Jak je iyoyiji, k'iuyeyi siuniwa ijwilis jla'yi ti ja alesana, 'yina ká akiniets'i siunie iyo niwa jikeyis. Ijiate ijwilatajas siunie 'es, 'yina je iyoyisi. 4Ka kia'iwo ka je kiojietajats'i niwak ti itilkinisi napo i'nio', jak je iyoyi ka 'noyisi ti iyoyetaja ka inkimis kiajwe. Ka iyot'i jla'm 'ate siunie t'eyasajnaye je 'yakajli paka iwoyi. Tiwet'ianaja ka jijwuki jlasiye ka inkiene pa ka k'iejliyeyi ka inoyeje pa ka ine'yi.

5“K'iejliyi'iji pi iyo kawoyisi je iyojonk'iye ka i'nio' je in'we'en. Ka kia'iwo ka jilisa' siuniwa its'ijwanaja'm jana jletik ti isesk'iji'n, yiji niwa Sinia' jlamtis, jla'yi puwa its'ijwanis jikio'yi.#Deut 6.8 Siuniwa ji'wuye isesamk'i niwa jijwukis.#Núm 15.38-41 6Siuti ijioyetajas inlakijnieyeje, je 'nenisi ka je inses puwa ka ineyits'iji'n, siu'neje ti ijioyetajas kiajwe jana 'najla'wet, i'yenijits'i niwak in'wetis niwa isis ti iyojonk'iye ka ti'wena. 7Jla'yi ti iyojonk'iye ka ti'wena ka titijwilaja ti ti'wenajata ilia'm ka tonitie, ka tiwonaja 'ate, ‘Inka'neyasajnawo’.

8“Siuti asa'am, ke inteliajayi ka kiak tiwona'ase 'ate, ‘Inka'neyasajnawo’. Kajeyepa ti injwanjliyek'i, ijwienjli ni aska'neyasajnawo. 9Siu'neje ti ja ke awoyeyi asnaye pa ka ne'yi kane ajnat'e. Jwankita jla'am siunie ijiate ti Asnayi, ti yi' poliyi. 10Wuj ti je 'esk'i naka siunie ka tiwona'ase'ni 'ate, 'Nak saka anechiyas. Injwajieti ijwienjli ti jla'am ti anechiyas. 11Siuti po' siunie ijialas kawo anechiyasa', 'esiji ka iniwojwa'n askawoye. 12Kajeyepa siunie ti ja iniwunit, nak ja ke tiwok lajaye, jlampet siunie ti je initonit, ja nakaye'eje pet ti ja tiwok lajaye.”

Jesús pansak'iyi siukia iyone papok Fariséojos siu'neje papo jiwos pet pa Moisés jika'neyasajnaye

(Mc 12.40; Lc 11.39-42,44,52; 20.47)

13Jesús kiak iyonayi'ijyi 'ate:

—¡Aswet'ia japoye ti Fariséojosts'ase'm, siu'neje ti asampet ti jiwosts'ase'm nak Moisés jika'neyasajnaye! ¡Ijnoski'lanajyi'n! Jip'onajia'm ni jika 'wuk kiwet ni Sinia' jika anechijiayas k'iye napo i'nio' ti iyotajas ka 'noyisi. Tiwet'ianaja ka asama wek pet ka 'oyeyi, ni'ne ka asama ka wenayi napo i'nio' ti iyoyistaja'ni ka 'noyisi.#23.13 Siojopa v. 14 laje ta'a siupuwa inamtis jlamt'iyijpe ti inkio' tikiena. Iyo'ate: ¡Aswet'ia japoye Fariséojos siu'neje ti asa'am ti jiwosts'ase'm nak Moisés jika'neyasajnaye! ¡Ijnoski'lanajyi'n! Ji'wuki'l jlalayi napo ask'ilieki siu'neje ti je liakiyeyi'i ti jiwoye asts'ajlayeja' injwela'ayi ka insisie. Awo'ate, ¡Sinia' janwomeje ni astes iyo! (23.13)

15“¡Aswet'ia japoye asa'am ti Fariséojosts'ase'm, asam'neje ti jiwosts'ase'm pet nak Moisés jika'neyasajnaye! ¡Ijnoski'lanajyi'n! Jikinieye'ni ti jlekiajla'ni ape'e ni ajnat, jla'yi ti jlekiajla'ni ape'e ni i'niat jlajlik'i, ti jiwoyejyi'n napo i'nio'. ¡'Yina asamk'e'm ti ji'wena ni ijwienjli sekyi'i ti nakaye ti jit'iyasanayi ni aske' siunie jiwoyeyi, jak je iyoyi ti jikajlayeta nakaye ti jit'iminayi'iji ti 'yakamata ape'e ni jitis iyo, jlam'ne ka asama ti 'yu'wase'm ka intatajayi naka ni siunie inlaye 'wet ti laj jlaja!

16“¡Aswet'ia japoye, ti asa'am ti jinianajyi'n k'iye napo i'nio', 'yina jlam 'neje kiak jiwoyeyi pet ti asa'am talojo'ase'm! Siuti po' ni i'nio' ti inijwele jitieyi'i ti yite'n pa Sinia' siupa jawoyi, yi'i jana Sinia' ji'wuk yi Jerusalenne, nak jijwelaye'eje ti laj lajaye siunie iyoyi ti tamti. Jlam'ne pet ti janakayeta jana wikinie maja ti 'najli ti yitinata, yi'i jana Sinia' ji'wuk, nak kiak jiwoyejyi ti jijwela', “'Esiji lapakawo ti laja po' naka, tepa kawo ka jla'm iwoyi.” 17¡'Ne'liasts'ase'm jla'yi ti talojo'yase'm! ¿Tepa yi'i siupi ijiatt'iyiji ti laja po', janakat'e wikinie maja ti 'najli ni'ne ka janakaye Sinia' ji'wuk, ka niwakaye ka int'emina jana wikinie maja ti 'najli ka lajak'ipa ka k'iejliyeyi ka je 'esie ka intajle? 18Siu'neje ti po' naka ti yite'n jana altar ti potie pi k'iejliyi ti janwo, sekyi'i ti kiak jiwoyeyi'ijyi ti jijwela', “Lapakawo ti laj lajaye, niwak siuniwa iyo ni i'nio'.” Jlampet siunie ti yite'n siojona tiwoki 'wajieta' pa Sinia' ti yi' ape'e jana altar, nak kiak jiwoye'ijyi ti jijwela', “Jla'm ijiate jla'am niwak inamtis ti laja po'. Tepa jawo ka jla'm iwo ti ijiatk'i.” 19¡Talojo'yase'm! ¿Tepa yi'i siupi ijiate ti laja poyi? ¿Janakt'e jana siojona tiwoki ji'wajieta' ni Sinia' ni'ne ka janakaye altar, ka janakaye ka int'emina siojona tiwoki 'wajieta' pa Sinia', ka ijiatayi ka 'esie siupa ka intajle? 20Siuniwa jlamtis ti po' ni i'nio', ti yite'n jana altar ti ijiunit, je janakata kan'ye'en, siu'neje niwa yi' ape'e niwa tena ape'e ti i'ye'en. 21Kia'iyojliyi siunie ti ji'lij po', pi k'iejliyi siupa ti janwoyi yi'i jana Sinia' ji'wuk, ti sek yi'i. 22Siu'neje na ti po' niwa jlamtis, ti k'iejlitieje pi iyoyi ti yite'n ni poli, kia'iyojliyi je nakata ka ji'lij poyeyi, yite'n ni siunie jika anechijiayas iyo ni Sinia' ts'iji poliyi, ni siunie yi'i, ni yi'iji'n jla'am ni Sinia', ti yiji'n ape'e.

23“¡Aswet'ia japoye, asa'am ti Fariséojosts'ase'm, siu'neje ti asampet jiwosts'ase'm nak Moisés jika'neyasajnaye! ¡Ijnoski'lanajyin wata'a! 'Wanjliyi ka kia'iwo ka ajwela' ka je akajlanayi niwak siuniwa je 'esijiyi, ti jijwela' ka ajotieyi pa Sinia', ka awoye ji'wajieta', iyoye 'ate niwaka menta, siu'neje niwa anís, siu'neje niwa comino,#23.23 Inwomki 'wole impenik jijlinkitis ti ikaniti. Puwaka t'ipi ti je t'otata, jla'yi ti je tiwok lajaye (23.23) ti jlekiajlayi pi Sinia' siojona tajlaja'm ti ji'yakana'ni itijwa'm niwa sikioye.#Lev 27.30 'Yina ti je woye lajaye nak inka'neyasajnaye, it'imina ti je woyeyi, ti ijiate jla'am ti laja po' ni siunie yi'i niwa Sinia' jlamtis siuniwa ti tajleje ni i'nio' ti 'es, ti tijnajyi, jla'yi ti jikap'ijliuskiye po' ni i'nio', siu'neje ni inemijnaye. Niwaka'ne ni siuniwa ti ijiate ti 'es ka awoyeyi, 'yina je paj ka aleyeyi ka ekiajlayi pi Sinia' siojona tajlaja'm ti ji'yakana'ni itijwa'm niwa sikioye, siu'neje niwa ijia ti kia'iyo ti isis. 24¡Asa'am siunapo iniantajank'iye napo ijia, 'yina ti talojo'yase'm! ¡Siuti ji'wena' jana kataki ti iniujwa'm ni ja'yayejyi'n jitionayi kisie', jlam'ne jitima siojona jikiayi kosoki po' ti wujwata!

25“¡Aswet'ia japoye ti asa'am Fariséojosts'ase'm, siu'neje ti asampet ti jiwosts'ase'm nak Moisés jika'neyasajnaye! ¡Ijnoski'lanajyi'n wata'a! Jijwela' ka alejajiamk'i niwa asat jijwa'al, siu'neje niwa aska teti'l niwa ji'yekiuniejiamk'i, jlam'ne ka ijiatayiji ka alejajiamk'i najataja jla'am jiwek kisie'e ti jilija', jlam'ne je jilija' jik'ioyi, ti je jlase' ni yiji ti tipoyiji siuniwa asoski'la iyo, siu'neje niwa akajlajnatis. 26¡A'am siunie Fariseo ti talok'ia'm! ¡Najnat ka lej jitiowaja'm ni at jiwe, siu'neje ni ji'yekiujniam'ni, jiwekie'ejana'a pet ka 'esieja'm kisie'e!

27“¡Aswet'ia japoye, asa'am Fariséojos siu'neje ti asa'am ti jiwosts'ase'm pet nak Moisés jika'neyasajnaye! ¡Ijnoski'lanajyi'n wata'a! Jiwoye 'ate niwa t'o'l napo i'nio mases ti isis jiwek kisie'e ti jikie' t'elinak'i ti lemi. Jlam'ne ki iyo ni jitiowaja'm ineli 'nejie'e niwa tipoyiji, jla'yi ki iyo ni jisiuti. 28'Yina niwak in'yiniyeyi. Ti kisie'e 'yiniye ka ijiatayi ka insisie, jlam'ne ki iyo ni astowiji tipoyeyiji ni iyo niwa asoski'layis, siu'neje ni ti wuj ti je 'es ti jiwoyeyi, ti yiji niwa asosikis.

29“¡Aswet'ia japoye, asa'am Fariséojos, siu'neje ti jiwosts'ase'm pet ni Moisés jika'neyasajnaye! ¡Ijnoski'lanajyin wata'a! Jilisanayi niwa t'o'l papo Sinia' jijwejlanawos t'ipi, ti jilisanayiji, jla'yi ti jilisanayi niwak jipelis ti sisajma'l, i'nio mases t'ipi ti jlosikis po'. 30Sekyi'i ti jiwoyeye'ijyi 'ate, “Ka samat'ipi ka iwieki siupuwa jlomas yit'ijyipi papo saka kijilas t'ipi, sam je anoktieje ti ilianisin'ni papo Sinia' jijwejlanawos t'ipi.” 31¡'Niwaka siuniwa asamtis iyo 'yakajanitk'i ti asa'am pet ti jika kia'lits'ase'm, papok siupapo iliant'ijyimpe papok Sinia' jijwejlanawos t'ipi! 32¡'Nakayi jlam wonayi'ni 'ate asa'am ti jatemayi siunie iyo ti 'nelanjie'e, kiapo aska kijilas mases!

33“¡Injlajasts'ase'm, kajeyepa ti jitiajlayi niwak injlajas! ¿Jijwelat'e ka ajwayejinie'e siojona jloma ti jiliaye janejyi ni i'nio', ka Sinia' i'yenta ti jansa'a, ti jankiene ni jwat ti je paj ka 'no'me? 34Kiaka'ne siukia ti jant'emina ti jajliu'wase napok injwejlanawosa', siu'neje napok siunapo i'nio' ti 'yijejne'n, siu'neje napo inka'neyasajnawosa'. Napoka'ne siunapo ti jalanajyi'n, ijia napo ja k'iejwata'yi jana cruz, ijia napo ja k'ajajyi'n ka inetie kiajwe niwa 'najla'wetis ti askimita. Ja jotieyi'ni niwa isi'il ti ja ataye'yi ilia'm. 35'Yina naka'ne siunie Sinia' jantajlat'ase'm ti jansa'ase'm wikie'eyi siukiapo i'nio' ti isis ti tilianajan'ni, tajlap'e pa Abel t'ipi,#Gén 4.8 siupi i'nio' ti 'es t'ipi, paj ti yiyet'iyipi pa Zacarías,#2 Cr 24.20-21 Berequías jlas, siupi jilianat'ipi ti jlenayi ts'e yi'i japa altar, jik'ioyi japak Sinia' ji'wuk siupa ti tilisana. 36Ijiatk'i siu'nie awoyi ti 'nak jant'emina napo i'nio' siunapo yiji pet siujlie'e jloma, ti Sinia' jiwak jane'yi ape'e.

Jesús ti yapat'ipi ape'e japak Jerusalén

(Lc 13.34-35)

37“¡Jerusalén, Jerusalén, jiliajnen'ni kiapo injwejlanawos,#1 R 19.10; Jer 26.20-23 sisajas jikiene siukiapo Sinia' jikawos ti ijliuta'a'ni! ¡Je ijwienjliyiji ka je ijiuttie'ni isiajwe napo ales, iyoye'ate jana ajwenta ti ijiuttie'ni jikiajwe niwa jilis, 'yina ka jakayeyi ka awoyi! 38'Yejne'n, jijwelt'inie'e ka i'nio' ine'yi ni a'wet. 39Jajwi'lase'm ti 'nak jantajlap'e ti ja ke si'wena, janak siojona jloma ti jiwoye'ate, “¡'Esiji ka Saka'niona iwejna'm ni 'es ka inoyeje, naka ni i'nio' ti 'nes ti name ki iyo ni Saka'niona!”#Sal 118.26”

Currently Selected:

Mateo 23: CRT97

Highlight

Copy