Mateo 22

Jesús yamtiyi k'iye papo ti jla'm i'yejnap jiwek, siupa anechiyas ti tane papo i'nio' ti tijwa'yiye pa jlas

(Lc 14.15-24)

1Yikiajlayi'iji ja Jesús ti ijwijla'm japo, siojo ti i'yejnap jiwek, ti iyo'ate:

2—Siunie Sinia' jika anechijiayas iyoye'ate siupi i'nio' ti iyo jiliakijnieye ape'e pi jlas ti tijwa'yi. 3Ijliu' papo jikawos ka ijnoyi siupapo pajk'i ti i'yase, 'yina papok siupapo i'yastajets'i je yam'ni. 4Sekyi'i ijliuyet'ijyi wek papo ijia ti iyone 'ate, “Kiak woninie'e papo ja'we'en: Wakal ja asaka, pajk'i ti tajak'i ajnat'e kiwa wakiajas ti yatis, kets'iyejyinna'a, awo iliakijnieyeja' ape'e ni yas ti k'iejli tijwa'yi.”

5“Kia'iyojliyi siupapo anechiyas tantajats'i je yam'ni. Ijio wasoki pi ijwienjli. Jikiecha pi yapili siupa yi'i'ni ti takawejna'n. 6Ijia 'neje siupapo ti isimits'i papok jijliujwajnas pi anechiyas, ti yejes'ni, paj ti ilianayis. 7Siupi anechiyas, ti 'yijenayi pi iyone, 'yina jwesie'ne, sekyi'i ti ijliuye papo jika ijiawos ka ineki ka ilajne'n papok kalankijietas, sekyi'i jwat 'yutieyi isia'm puwa ji'wuki'l. 8Sekyi'i ti janjlo'ojwe papo ijia jikawos 'neje ti iyone 'ate, “Pajk'i ti wakal lajk'ipa ka sitiejli'yi, ti jayo iliakijnieyeja' ape'e ni yas ti k'iejli tijwa'yi. Siojopo ti anajnatta ti ane je p'an napoka ka ijna'yi. 9'Nakayi maye'ni jnayeyits'i siuniwa isi'il jika'wulis, siuniwa inita'a'ni napo i'nio'. Ja'wenayepe paka ajwelajiampe ka ijnoyi siujlie'e iliakijnieye ape'e ni yas ti k'iejli tijwa'yi.”

10“'Yina yam'ni'ne papok jikawos ti ijioyits'i puwak jika'wulis japak isi'. Isiuti papo ti ijiutiek'i wita'm, siupapo t'oniye je isis, siu'neje papo t'oniye isis. Pakayi'ne ti tipoyeyi japa 'wuk siojopa yinisi kiajwe japa inlakijnieye.

11“Paj ti yamat'ipi pa anechiyas ti 'yuyi papo yi 'wuk kiajwe, i'win'ne pak siupa ti je 'yuts'iji'n puwa ji'wuye ti inlakijnieye jla'yis. 12Iyone'ne 'ate, “Isiecha, ¿yot'iyi'ni ti je t'iuts'iji'n siupuwa a'wuye, ti tejeye pet japa inlakijnieye ti potie?” 'Yina je iyo ka inkiujlie pak i'nio'. 13Siupa anechiyas ijliuye'ne papo jikawos ti iyone 'ate, “Jikioye la'nitie, sekjane'yi ka niwakayena'aja niwa jisietis ka ala'nitie. Tatayija'm na ajnaj wuj'weje'n, siunie jane'yi ni jlajlasa, ti wujwa ti ja a'tieja”.”

14Jesús yine ape'e ti iyo'ate:

—Ijiate, 'lojwata napo i'nio' Sinia' tantajats'i ka ijnoyi ni jika anechijiayas, 'yina je 'loj siunapo ijiate ti 'yuyi.

“Ekiajle ni anechiyas siunie jikimet, jlampet ni siunie ti Sinia' tajle nak ja ekiajlayinie'e ni Sinia'”

(Mc 12.13-17; Lc 20.19-26)

15Jlampa yama 'niji kiaka siukia iyoyi, siojopo Fariséojos yama'ni ti ijioyisi ja Jesús, 'yina wakal ti inijloyisk'ijin'ni ti jan'yasis'ni, ka pakaye ti jantajlatisi jiwekie'e siuti jankiujlie. 16Sekyi'i ti ijliuye japo t'eyasajnas pet, siu'neje japo 'yuyisk'i pet japo Herodes, ti ijioyisi ja Jesús. Yiyisi ti kiak iyonayisi 'ate:

—Inka'neyasajnawo, kasts'ajane ti a'am je niliak paka a'leja', jla'yi ti ijiatk'i siunie jiwo ti jika'neyasa'n ti jijwe'el pa Sinia' ji'niayi. Siunie iyo napo i'nio' je injlan'ni, kajeyepa ti je ji'yene paka ne'yi pa ka t'oniye iwo. 17'Yina 'esiji ka ajwel pet siupi ja awoyi: ¿Mi 'est'iyiji ka ikat'ina ape'e siuniwa inkat'ijnieyejes ijioyi'ni nak anechiyas Roma jlele, ni'ne ka jeye?

18Jesús 'yijene ta'a pi iyone ti jlam tiwonaja, sekyi'i iyone'ne 'ate:

—¡Ijnoski'lanajyi'n wata'a! ¿Yot'iyi'ni ti jiwoyeyi ka sejlita? 19'Wenkinak'i'm siojopa wikiniet'aj, siojopa ijniujli ti takat'iniejata ape'e puwak inkat'ijnieyejes.

Yamisiji'ni. 20Sekyi'i iyo'ne 'ate:

—¿Tempi jipe'el siu'nie yi'i, siu'neje ni jle'?

21Sekyi'i iyoyis'ne 'ate:

—Anechiyas Roma jlele jipe'el.

Jesús sekyi'i iyo'ne 'ate:

—Jakajliete, ekiajlayi siunie tajle ni anechiyas Roma jlele siunie jikimet pet, jlampet ni siunie tajle ni Sinia' ti jikimet pet, nak ekiajlayi pi Sinia'.

22Ti ipi'yayisie ti kiak tiwonaja, 'yina kawojlit'iyisipi pa. Sekyi'i ti tajlayisi.

Jesús ijwi'il siunapo 'yajle'n ti ijiate ti janapits'i pijia'm

(Mc 12.18-27; Lc 20.27-40)

23Pope siojopo Saducéojos, japok ijwil papo 'yajle'n ka je inapits'i pijiame.#Hch 23.8 Ijioyisi ja Jesús kiak jloma ti iyonisi 'ate:

24—Inka'neyasajnawo, siupa Moisés t'ipi iyo'ate niwa jilisajna', “Siuti 'yalata pa, 'yina ti laj jilisayi ilia'm siojopa yitaja, siunie ji'yini ape'e nak jank'iuyeje jana ji'liela. 'Nakayi ti japoye napo janto'm ape'e, siuti japoye napo jilis.”#Deut 25.5-6 25'Yejne'n, pope kiapo i'nio' ti ji'niayi ijwienjli 'ne awak'i. Siukia isijlita kiak tijwa'yi, 'yina laj jilisa' ti 'yala. Ti po' ki ji'yini kiak its'iuyetaja'ne jakia ji'liela siukia tome'e. 26'Yina kia'iyojliyi laj jiwek jilisayi ti 'yala'aja. Siukia tomtiejek'i pet kia'iyojliyi jiliaye iyo kiapo jikiliawot mases. Paj ti nojwa'a kiapok ijwienjli sikio' itij'we times tom'niji, tiwet'ianaja ka injwanjli paka jilis poye. 27'Yina siojokia asejnia paj ti 'yala. 28Jlajmiliet ti ijwi'il napo i'nio' ti siupapo 'yajle'n janapits'i pijia'm ti jantajli ni a'no', ¿tepat'e yi'iyi siupa ijiate ti jik'iemjla jakiak i'nioki, siukiapo ijwienjli sikio' itij'we times tom'niji? 'Yina ti itij'we kiapok ti yitajak'i.

29Jesús isiujlie ti iyo'ate:

—Wuj ti jikamats'iji'n, tepa jawo ka kiak je iwo 'yaka je intant'iejayi niwak Sinia' jlamtis yi'i ni ji'wet, siu'neje na jijweye iyo ni Sinia'. 30Kajeyepa siuti kiak jawo ka inetieje janak jloma ti janapits'i pijia'm napok 'yajle'n, napo i'nio' ja ke inekiajle'e ka injwa'yits'iji'n ayinie asejnia. Wikie'eyi janwoyena'a 'ate siunapo injlojwajnas yi' poliyi, ti kia'iyo je isitia'n papo ka jijwa'yisa'. 31Jlajmiliet siuti ajwe'el ti janapits'i pijia'm napok 'yajle'n, ¿jet'i ji'yena'ijyi siunie Sinia' iyo'nase ti iyo'ate, 32“Yam ti Abraham Jiniak'i'm, siu'neje napo Isaac, Jacob.”?#Ex 3.6 Je jlam jiwek ni awoyi ti ajwe'el naka ti Sinia' jlam ti Jinia' napok siunapo 'wasajne'n, 'wanjliyi ka kia'iwo ka pajak'i pa ka 'na'al.

33Ti ipi'yayisie ti kia'iyo ja Jesús, 'yina kawojlit'iyisipi pa japo i'nio' ti ipi'yayisie ja jika'neyasajnaye.

Sinia' jlamtis siupi jitis puwa ijia

(Mc 12.28-34)

34Siojopo Fariséojos, ti 'yijenayi pi iyone ti siojopo Saducéojos Jesús 'yajwejlank'i wita'm, sekyi'i initotk'i'ne wita'm. 35Jak siojo tajla'm japok jiwos pet pak Moisés jika'neyasajnaye, ijioyi'ni ja Jesús ti iyo ka ijnejlit, ti iyone 'ate:

36—Inka'neyasajnawo, ¿tepat'e yi'i pa siuniwa Sinia' jlamtis ti 'yaka'm ape'e niwa ijia?

37Iyo'ne 'ate ja Jesús ti isiujlie:

—“Emi'n ni Saka'niona ti Ana', nayi wita'm ni akiowe, ajosik kia'iyojliyi, siu'neje ni atankiujnieye.”#Deut 6.5 38'Nak jitis siuniwa ijia. 39Siunie tomik'i 'yiniye ti iyo'ate, “Emi'n ni akiecha niwone 'ate jiwo ti jininemi'n.”#Lev 19.18 40'Niwajata 'niwak siuniwa times Sinia' jlamtis ti 'yaka'm ape'e niwa ijia, siuniwa yiji pet nak Moisés jika'neyasajnaye, siu'neje niwa taka'neyasane papo Sinia' jijwejlanawos t'ipi.

Injwajieti ti Sinia' jijliujwanik

(Mc 12.35-37; Lc 20.41-44)

41'Yina ti je taljli'ijyi wita'm japok Fariséojos ti initotk'i wita'm, Jesús iyo'ne 'ate ti i'yasa'm:

42—¿Tepi iyo pet pi astankiujnieye ape'e nak Injwajieti ti Sinia' jijliujwanik? ¿Tempi jijwela ka intajla?

Isiujlisie ti iyo'ate:

—David pak tajla.

43Sekyi'i Jesús iyo'ne 'ate:

—Tepa jawo ka kiak je iwo, ¿tepi iyo pa David, ti Sinia' jikimet initataja'm, sekyi'i ti yamtijiena ti iyo'ate, “'Yaka'niona”? Niwak jlamtis ti iyo'ate:

44“Saka'niona iyone 'ate ni Ika'niona,

Wejen 'ne to'm ijwiyeje,

jlampa jayinana'a akiajwe napo akojwas.”#Sal 110.1 45¿Yot'iyi'ni jiat'eje ti jijwela' ka pakaye ka intajla pa David ti David kia'iyo iyo jika'nionaja'?

46Tiwet'ianaja ka poye paka inkiujlie ja Jesús. Jakayik'i ti lajk'ipa ka ji'lij injweyi'i ka in'yas'ni ka k'iejliyeyi paka in'yasane.

Currently Selected:

Mateo 22: CRT97

Highlight

Copy