Hebreos 4

1It'imina ti 'esiji ka ajoskiyeyi. Ijiatataja wek ti siuniwa Sinia' jlamtis ti ijwi'il ti iyotaja pet ka 'yakanaja pak ajnat siupa yi'i ti ininop'it. Joskiyeyi 'lojwinie'e ka poye pa ka 'wanjliye kisie'e ka 'yuktajanie'e janak ajnat. 2Kajeyepa ti kiak awoki ti tiwok saka'niyejats'i ti tijwelats'e niwak Sinia' jlamtis ti isis, iyot'iyipi papok i'nio' ti tijwelaja. 'Yina siupi its'iuyistiejesi je isisiji'n, kajeyepa ti je iniwome siupapo ti ijiate ti jitienkiujnieye po' ti iyoyi. 3Jlampet ti sa'am ti sitienkiujnieye po' ja'yuyeje janak ajnat ti inop'it ji'wet, siojona ajnat Sinia' ijwi'il ti iyo'ate:

“Nak it'imina ti pansak'i siunie awone kajeyepa ti sijwesie, 'yina awo'ne 'ate,

'Wanjliyi ja ke 'yajlinitk'iye ka 'noyi siunie ajnat a'yi ti aninop'it.”#Sal 95.11

'Yina paka ajnat ti inop'it ji'wet jlam po' ta'a ti 'nelanjie'e ti Sinia' itimayi pi jikijmaye ti k'iejli poyet'ipi 'ni ajnat. 4'Yina po' siuniwa inamtis ti yi'i niwa Sinia' jlamtis ti iyo'ate ti ijwil pet siojona jloma ijwienjli sikio' itij'we times tom'niji:

“Siojona jloma ijwienjli sikio' itij'we times tom'niji

Ti itimayi pi jikimet, japak yajapajyi'n ti ininop'it.”#Gén 2.2

5Sekyi'i ti yikiajlayi'i siunie ti iyo'ate:

“'Wanjliyi ja ke i'yakanisi siunie ajnat ti inop'it ji'wet.”

6Siupapo i'nio' iniant'iyisipe ti ipi'yayisieta niwak Sinia' jlamtis ti isis, 'yina siuti takakiunisi it'imina'ne ti je i'yakanisi janak ajnat ti inop'it ji'wet. 'Yina po' pet siunapo ijia Sinia' 'yajlinit k'iye ti ijioyi janak ajnat. 7Paj ti ji'lij iwinats'e ti sa'am, jlampa je piniye niwa najkapis yam'nijiye, iyo niwa David jilisajna' siuniwa ajwe'ejle ti awo'ate:

“Siu'nie jloma ti jape'yaye ni Sinia' siunie jawo,

'yina ká at'onitie'yi k'iye.”#Sal 95.7-8

Siuti iyo'ate “Siu'nie jloma”, janaka siojona jloma ti jla'am ti tipayiji jloma ti ink'ie'. 8Jlamt'i'nepe ka pakaye Josué ka i'najlinit k'iye papo i'nio' ka'noyi japak ajnat ti inop'it ji'wet,#Deut 31.7 'yina Sinia' je kiak iyotaja'ni ka injwel'ni japa ka jikiechaye ka jlomaye.

9'Yina ijiatjliyi, a'wenaja ti po 'neje siojona ajnat ti kia'iyo inop'it ji'wet ti tejeye pet siunapo Sinia' jilis, ti 'yotat'ni. 10Jak je iyoyiji siuti po' ni 'yuyi janak ajnat, nak ininop'itayi pet ni jikijmaye, iyot'iyipi pet pa Sinia' ti kia'iyo ti ininop'ite pa jikijmaye. 11Jak je iyoyiji pet ti sa'am 'esiji ka ijialasaja janak ajnat, 'yina je 'esiji'ni pet ka poye pa ka inekk'i siunie ji'niayi iyot'iyipi papok i'niot'ipi ti 'yakakiuyis, it'imint'iyijpe ti jiwet'ia poyis.

12Kajeyepa ti siuniwa Sinia' jlamtis ji'wasankiye po', jla'yi ti jijweye po', siu'neje ti ijiate ti 'yakajla'm ti 'yaka'm ape'e siunie sijnat jitiok ti tijwela ka inkajla'm siunie ti jikiwitawa times,#Is 49.2; Ef 6.17 'yina je ijwietanitia'm ni i'nio' ni jlosik, ti yajma'm yame ni siunie jikiowe, 'yina itijwi'ni ti yikiajli'ni ni jitienkiujnieye, siu'neje ni iyo kawoyi ni jisiak'al ni i'nio'. 13Lajk'ipa ka ne'yi siuniwa jilisajna' jla'am pi Sinia' ka 'najane paka iwone ka injwe'el ka inijwekia'm ti jla'am pi Sinia'. 'Yina ja ke injla'an wikie'eyi niwa wask'i'nelaja ti jitiete i'wi'in, jla'am ti ja kas'ye'en siupi awoki, ka netiejenie'e siojona jloma ti yi' jlaja.

Jesús jla'am ti pa'yijis jika anechiyas wuj

14Jesús ti Sinia' jlas, nak saka pa'yijis jika anechiyas wuj, ti pajk'i ti i'yakajna'm ni poli. Tempi it'imina ti je 'es ka ilikiape ni siunie awonaja ni sitienkiujnieye ti 'es. 15Jlajmiliet, siunie saka pa'yijis jika anechiyas wuj, je naka ni siunie ti je 'yijene paka iwone ka kasp'elisijne'n ni iyo siuniwa sijliak'ali. 'Yina siuniwa inkajejlasayejes yits'e kia'iyo niwak yiyi, ijwienjliyi jla'am siunie ti 'wena t'asap'e naka ti je iyoyi ni jike'. 16Naka'ne, siunie ti je 'esiji ka kaskip'e ni Sinia', 'yina ja ijioki siunie jikap'ijliuskiye 'wet, 'nakayi ti ja kasp'elisijne'n, siu'neje ti jasitiana kanoyits'e'm.

Currently Selected:

Hebreos 4: CRT97

Highlight

Copy