2 Corintios 5
5
1Awojlitieje ti siuniwa ts'isienis ti tiwoki si'wasankiye ji'wukie ti awak'ne ajnat'e, janak kas'yenajap jana 'wuk siojona jlam ti tiliakiki'i jiwekie'e. 'Yina je atayeje'ni japa si'wukie, kajeyepa ti kasts'ajane pa awonaja, kanwastajanna'a janak 'wuk siojona jlam ti tiliakiki'i, Sinia' iwiakajlanit ta'a sik'ioye niwa si'wuki'l ti yi'i poliyi, ti jla'm ijiate ti t'o'n, ti i'nio' je kio' lisanki. 2'Yina ka jla'm iwo wata'a, siuti je 'ekijliyi ape'e 'ni ajnat wuj ti sijliak'ali po', ka iyojliyi'ijyi ka ta'aja ka ijliasaja niwaka si'wuki'l ti yi' poliyi. 3Ja 'nakayeyijna'a ti janakaye ti jamp'o'n sitipe'e, jawo'ate ni si'wu', ja ke kas'najliyek'ijinna'a. 4Siuti je atajlajlijyi kiajwe siujlie'e si'wuk, ajwe'el 'ni ts'isie'n, wuj ti sijliak'ali po', kajeyepa ti je jwajla'a, kiojieti. Je'ne ka ijwil ka tiliena sitipe'e siu'nie si'wu', ajwel ni ts'isie'n, 'wenajliyi ni siunie ja tiwonats'e ti ja tip'onaja sitipe'e siunie ink'ie' si'wu', ajwel ni ts'isie'n ink'ie'. Ja 'nakayeyi ti siojona si'wasankiye ti t'o'n ja netiajnat ni siunie ts'isie'n ti je t'o'n.#1 Co 15.42-44,53 5Siunie i'nio' ti kaslesank'i, naka ni Sinia', naka 'neje ni siunie iwints'e'm siojona jikimet ti 'es jla'am, ti iniajnatts'e ta'a. Janak 'yakajanit siunie janwents'e'm ts'ijiye, siojona jloma ka inetiejenie'e.#Rom 8.23
6Jak je iyoyiji wek pet siu'nie aniwonaja ka k'asayi'i. Kajeyepa ti ijiate, 'yina kasts'ajane pa awonaja siunie ti je atajlaje siu'nie ts'isie'n, ti je kasjnanjlijape'n pi Saka'niona. 7'Nakayi je kasts'ajane paka iyonaja ka sitiete i'we'en pa Saka'niona, 'yina ka lajak'i wek siu'nie sitienkiujnieye ti 'es ti kasts'etk'i pijia'm ti sitiej awomaja. 8Je anikiwita, siu'nie sosik awonaja pit, je ajwela ka je itiajlaja ni siunie ts'isie'n. Jatiajlaja, sek jane'yi ka ijiokieyinie'e pi Saka'niona. 9Jak je iyoyiji, 'wanjliyi ka je itiajlaja, ni'ne ka je iwieki siu'nie ts'isie'n, 'yina ajalasa ape'e ka ikanitieje'ni pa Saka'niona. 10Kajeyepa ti ja lajak'i pa ka injwel ka in'yilta'n k'iye pa Saka'niona, ka inetiejenie'e siojopa jloma ka 'yenta wikie'eyi napo i'nio' siupi jitis iyo.#Rom 14.10 Japakayeyi ti ja kasjwanjlajamk'i'ni siupa ja tiwonats'e pi iyo siupa titiajlatats'e'm, ti ja tenaja siupa awokt'iyipi ti awak'i 'ni ajnat, ka 'esiet'ipi ni'ne ka jeye.
Sinia' yikial pijia'm ni jilisanik
11Jlam'ne kasts'ajane pa awonaja ti naka ti jla'm ijiate jla'am ti ja ke kasjweye, 'ejejiena'a napo i'nio' ka ilesa'n niwak Sinia' jlamtis. Siupa Saka'niona wuj ti itiant'iejts'e, jla'yi ti yiminta ka kia' awoyeyi pet, ka ijiatayiji ka intant'iets'e. 12'Yina je ka ijwil ka inijwela'ase'm kiu'ujwe, ka sek ne'yi ka kassonit. 'Wenajliyi jla'am ti awoktajank'iye ka poye paka k'iejliyeyi siupa it'imina ti kassoniti'n, sekyi'i ti janikanitie pet sitipe'e, jla'yi ka 'najanayi ka akiujlieyi napoka siunapo initoniti'n ti ijwil ka 'najanisi siunie je 'yaka ape'e, ti je tajla'm siunie ijnosik. 13Siuti kiak aniwonaja 'ate iyo napoka jitiej je isis, 'yina naka ti awunitie pa Sinia'. Jlampet siunie ti kiak aniwonaja iyo napo isis, naka pet ti insisieyi. 14'Yina Sijwajieti jlemijnaye naka ti awoki saka anechiyasa', jakayi ti kasts'ajanayi pa awonaja ti po' siunie ijwienjli i'nio' ti iniwe'n ape'e wikie'eyi napo i'nio' ti no'we ti iyo masesa'. 15'Yina Sijwajieti iniwe'n ape'e napo i'nio', jak je iyoyiji siunapo 'wasajne'n je pa iyoyeyi siunie ti jlamis ti itiliaja ka woyisi. Najata jla'am ti iyoyi siunie iyo ka woyi siunie i'nio' iniwe'n ape'e, siu'neje ni iniu kisie'e ti tajli ni a'no', ti naka ti isisi.
16Nak it'imina ti aleki ti awoki siunie sitienkiujnieye iyone siunapo i'nio' ti k'iejliyi pi iyone pi yi'i pi jikiecha. 'Wanjliyi ijiate ti sitienkiujnieye kiak t'ipa iyoyetajapi ti ena'a pa Sijwajieti, 'yina 'nakayi je pa kia' iyoyeyi. 17Jak je iyoyi ti po' siunie ti inijwankitik'i pi Sijwajieti, ika pet ti ink'ie', siunie jilisanik ti ink'ie'. 'Yina siuniwa wask'i'nelaja paj yam'niji. Poye pet siuniwa wask'i'nelaja ink'iejyis 'nakayi.
Papo i'nio' 'esi pa Sinia' ka lajak'i pa Pablo ti isijme'n
18Wikie'eyi niwaka Sinia' jla'am ti ilisane. Jla'am ti kastoni ka ijioki, ka lajak'i pet pa Sijwajieti siupi iyoyi. Sekyi'i ji'lij iwints'e'm ti ijliuyits'e'm ni siunie jikijmaye, ka kia'iwo pet napo i'nio' ka ini'nopijieteje ti jla'am. 19Ka iyo'ate ti pak it'imina ti Sinia' kiak iyone napo i'nio', ajwel pa Sijwajieti ti jlam jla'am pa Sinia' ti itione, ti ini'nopijieteje wita'm. 'Yina jitiej je yiji'ni 'ate, siunie iyo ni jloski'la iyo napo i'nio'. Sekyi'i iwints'e'm siunie sikijmaye, ti ja 'nakayeyi ti jantant'ieje napo i'nio' naka. 20Ijiate ti sa'am ti je kasto'we ti Sijwajieti jikawosts'e'm. Jak je iyoyiji ti awoki samtikie' naka ni inka'niye ti 'es, 'yiniye ka jlama pa Sinia' ka ijnalas napo i'nio'. Jak je iyoyiji pet ti ya'am wuj ti 'ejejie'nase'm ti etijnape pa Sijwajieti, ti awo'ate, ¡nijwankitayik'i pi Sinia'! 21Sijwajieti je iyoyi paka k'iejliyeyi paka jikeye, 'yina Sinia' iyojwa'n inkeye' ti sit'iminik. Sekyi'i ti kasjnajietajats'i, siuti awakiap ni Sijwajieti.
Currently Selected:
2 Corintios 5: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.
